Read kumam Génesis 42 Bible Online

Génesis 42 - kumam bible

Génesis 42

¹Tejtzun tb'inte Jacob attoq triw tuj Egipto, xi tma'n kye tky'ajal: ¿Ti in b'ant kyu'ne tzalu, noq nno'k kyke'yine tuj kywitze?

²Ma nb'iye at triw tuj Egipto. Kyku'xe tuj, ex kylaq'ontze triw te qwa, tu'n qanq'in ex tu'n mi'n qkyim, chi Jacob.

³E ku'xtzun laj ttzik José laq'ol triw tuj Egipto,

⁴atzunte Benjamín aju titz'in José, minti' xi tzoqpi'n tu'n Jacob tu'n t-xi' kyuk'il ttzik, tu'nju o ximan Jacob ti'j, mya yajku tzaj jun mya b'a'n ti'j tuj b'e.

⁵Xi kyuk'in kyib' qe tky'ajal Israel kyuk'il txqantl xjal, aqeju xi'ynitoq laq'ol triw tuj Egipto, tu'nju attoq we'yaj tuj tkyaqil tx'otx' Canaán.

⁶Atoq José tok te gobernador tuj tx'otx' Egipto, ex ax in k'ayintoq triw kye xjal in che tzaj kyuj kykyaqil tnam. Tej kypon qe ttzik, e kub' ẍmeje' twitz, ex pon takl tib'aj kywitz twitz tx'otx'.

⁷Tej tke'yinte José qe ttzik el tnik' kyi'j, ex o tb'incha ik tza'n minti' ojtzqi'ntoq kywitz tu'n. Kyuwxix o yolin kye ex xi tqanin kye kyja': —¿Jatum ẍe tzaje? Chi José. Xitzun kytzaq'we'n: —Xqo tzaje tuj tx'otx' Canaán laq'olte triw, che chi.

⁸El tnik' José kyi'j qe ttzik; atzun kye, minti' el kynik' ti'j.

⁹Ultzun ti'j tk'u'j José qe twitzik' otoq che ok kyi'j, ex xi tma'n kye kyja': —At kyeye nnik' tuj kyk'u'je ma che ule tzalu. Noq ma che tzaje ke'yilte jatum b'a'n tu'n kyoktze q'ojlel ti'j tnam lu, chi José.

¹⁰Xitzun kyma'n te kyja': —Mi'n, tat. Aqo'ye ajb'el teya. Laq'ol triw ma qo ule tzalu.

¹¹Qkyaqile junx qmane, ex b'a'n xjal qo'ye. B'ajx qo ke'yine jatum b'a'n tu'n qokxe q'ojlel ti'j jun tnam, che chi.

¹²Xi tma'n José kye: —Noq tten kyu'ne. Ma che tzaje ke'yilte jatum b'a'n tu'n kyoktze q'ojlel ti'j tnam lu, chi José.

¹³Xitzun kyma'n te kyja': —Ajb'el qo'ye teya, kab'laj qb'ete qerman qib'e ex junx qmane. Atzun najl qo'ye tuj tx'otx' Canaán. Aju qitz'ine mas ch'in o kyaj ten tuk'il qmane; atzun juntl noq o kub' naj, che chi qe terman José.

¹⁴Xitzun tma'ntl José kye kyja': —Ik tza'n ma txi nma'ne, noq ke'yil ti'j tnam ma che ule.

¹⁵Atzun k'elel nnik'e kyi'je: Kxel nma'ne jun yol ax tok kyeye twitz Faraón, mlay che exe tzalu qa na'nxtoq tul kyi'ne kyitz'ine.

¹⁶E taj jun kyeye q'ilte kyitz'ine, atzun qe txqantl e kykyaj ten tuj pres. Kyja'tzun k'elel nik' kyi'je qa ax tok aju ma kymaye; qatzun mi'n, at nnik' tuj kyk'u'je, chi José.

¹⁷E okx tq'o'n José ox q'ij tuj pres.

¹⁸Tuj toxin q'ij xi tma'n kye kyja': In chin xob'e twitz Dios, kyja'tzun kyb'inchame jlu ex che anq'ile:

¹⁹Qa ax tok b'a'n xjal qeye, e tkyaj ten jun kyeye tuj pres; atzun txqantl e kyaj, ex e taj kyi'n triw te kywa qeju ate' tuj kyjaye tu'nju at we'yaj ma chixin.

²⁰Kyi'ntz naje aju kyitz'ine tu'n tel nnik'e qa ax tok kyyole, ex mlaytzun che kyime, chi José. Atzun kye, kyb'incha ikju.

²¹In kyma'ntoq kyxolx kyja': —Ax tok mya b'a'n o qb'incha ti'j qitz'in. Minti' xi qb'i'n tyol tej tkub'san qwitz maske o qil yajb'il te ex tb'is. Tu'ntzun jlu ma tzaj mya b'a'n lu qi'j ja'lo, che chi.

²²Xitzun tma'n Rubén kyja': —¿Myapetzun o txi nma'ne kyeye kyja': Mi'n kyb'inchaye mya b'a'n ti'j q'a, nchiye? Atzun kyeye minti' xi kynimane nyole. Lu ja'lo in xi qchjo'n tu'n tlaj tkamik, chi Rubén.

²³Atzun kye minti'toq b'a'n kyu'n qa nne'ltoq tnik' José ti'j kyyol, tu'nju ajb'en jun xjal pjulte yol kyxol.

²⁴Eltzun tpa'n tib' José kyi'j ex ok ten oq'el. Te tib'ajxi ul meltz'aj jatum ate'toq, ok ten yolil kyuk'il, etz ti'n Simeón kyxol, ex kywitzx qe, b'aj tk'alo'n.

²⁵Xitzun tma'n José kye majen tu'n kyku'x nojsa'n kysak tu'n triw ex tu'n taj q'o'n tpwaq teyle te junjun ttzi t-sak, tuk'ix kywa tu'n tajb'en tuj kyb'e tu'n t-xi q'o'n kye. Iktzun b'ant kyi'j.

²⁶Oktzun kyq'o'n kyiqatz kybur ex e ajtz meltz'aj.

²⁷Tej kypon tuj lugar jatum tu'n tex aq'b'il kyu'n, el tpju'n jun ttzi t-sak tu'n tjatz ti'n ch'in triw te twa tbur, ex o til tpwaq tku'xtoq ttzi t-sak.

²⁸Xitzun tma'n kye terman: Ma tz'ajtz q'o'n npwaqe, lu tku'x ttzi nsake. Kykyaqiltzun tzaj nim kyxob'il, in che lu'luntoq wen tu'n kyxob'il ex in kyma'ntoq kyxolx: ¿Titzun ma tb'incha Dios qi'j ja'lo? Che chi.

²⁹Tejtzun kypon tuk'il Jacob aju kyman tuj tx'otx' Canaán, xi kytx'olb'a'n te tkyaqilju otoq b'aj kyi'j, che chi kyja':

³⁰—Aju xinaq in kawin tuj tx'otx' ma chixin o yolin kyuwxix quk'ile ex o qo ok q'o'ne tu'n qa noq ke'yilte jatum b'a'n tu'n qokxe q'ojlel ti'j ttx'otx'.

³¹Atzun qeye xi qma'ne te kyja': B'a'n xjal qo'ye. B'ajx qo ke'yine jatum b'a'n tu'n qokxe q'ojlel ti'j jun tx'otx'.

³²Kab'laj qb'ete qerman qib'e ex junx qmane. Jun o kub' naj, ex aju mas ch'in o kyaj ten tuk'il qmane max tuj tx'otx' Canaán, qo chiye.

³³Atzunte xinaq, aju kawil tuj tx'otx' ma chixin, tzaj tma'n qeye kyja': Atzun k'elel nnik'e kyi'je qa ax tok kyyole: Kyq'onkje jun kyermaniye wuk'ile, kyi'nxe kywa qeju ate' tuj kyjaye tu'nju at we'yaj ma chixin, ex kyxi'ye.

³⁴Kyi'ntze kyitz'ine tu'ntzun tel nnik'e kyi'je qa b'a'n xjal ex mya ke'yil ti'j tx'otx' qeye. Maxitzun k'elex ntzoqpi'ne juntl kyermaniye. Ax ikx kyeye, jakutzun txi q'ot amb'il kyeye tu'n kyb'ete noq jatumchaq tuj tx'otx' lu, chi xinaq qeye, che chi.

³⁵Tejtzun tetz kyqo'n triw tuj kysak, lu tch'u'ẍil tpwaq teyle te junjun tku'xtoq ttzi t-sak. Tej kyke'yinte qe tch'u'ẍil kypwaq, tzaj t-xob'il kyi'j, ax ikx tzaj t-xob'il kyman.

³⁶Xitzun tma'n Jacob kye kyja': —Che elel b'aj kyi'ne qe nk'wa'le; José mi a'l qxol, ax ikx Simeón. Kyajtle tu'n t-xi kyi'ne Benjamín. Tkyaqil jlu mya b'a'n te weye, chi Jacob.

³⁷Xi tma'n Rubén te tman kyja': —B'ix kub' tb'yo'na kab'e nky'ajale qa mi'n ma tz'ajtz wi'ne Benjamín tuk'ila. Q'ontza tuj nkwente ex k'ajetz wi'ntle tuk'ila juntl maj, chi Rubén.

³⁸Xi tma'n Jacob te: —Mlay ku'x nky'ajale kyuk'ile. O kyim José ex o'kx te Benjamín atx. Qa at jun ti'xti ma tk'ulb'a tuj kyb'eye, kyu'ne chin kymele tu'n b'is, porke ma chin tijine.