Read kumam Génesis 43 Bible Online

Génesis 43 - kumam bible

Génesis 43

¹Kukx at nim ta'w we'yaj kyib'aj xjal.

²Tej tb'aj kywa'n Jacob kyuk'ix qe tk'wa'l aju triw tzaj kyi'n tuj Egipto, xi tma'n Jacob kye tk'wa'l kyja': —Kyxi'ye juntl maj ex kylaq'ontze ch'intl triw te qwa, chi Jacob.

³Xi tma'n Judá te tman: —Aju xinaq tzaj tkyuwsa'nxix qeye kyja': Mi'n che ultle wuk'ile qa mi'n ma tzul kyi'ne kyitz'ine, chi xinaq.

⁴Qa ma txi ttzoqpi'na qitz'ine tu'n t-xi' quk'ile, jakutzun qo'xe laq'ol triw;

⁵qatzun mi'n ma txi ttzoqpi'na, mlayx qo'xe, tu'nju tzaj tma'n xinaq qeye kyja': Mi'n che ultle wuk'ile qa mi'n ma tzul kyi'ne kyitz'ine, chi xinaq, chi Judá.

⁶Tmatltzun Israel: —¿Tiqu'n kyb'inchaye mya b'a'n lu wi'je? ¿Tiqu'n xi kyma'ne te xinaq qa attoq juntl kyitz'ine? Chi Israel.

⁷Xitzun kytzaq'we'n: —Axte xinaq tzaj qaninte ti'j qten ex kyi'j qeju ate' tuj qja, chi kyja': ¿Itz'xpe kymane? ¿Atpe juntl kyermaniye? Chi xinaq. Atzun qeye xi qma'ne ik tza'nx tten. ¿Baqa o na'ne ti'j qa tu'n ttzaj tqanin tu'n t-xi qi'ne qitz'ine tuk'il? Che chi.

⁸Xitzun tma'n Judá te Israel aju tman kyja': —Q'ontza ku'xun tuj nkwente. Jaku qo'x naje tu'ntzun qanq'in ex tu'ntzun mi'n qkyim, mi aya, mi qo'ye ex mi qe qk'wa'le.

⁹Tuj nkwente jaku ten ku'xun, ex weye ktzajel tqanina tajlal. Qa minti' ma tzul wi'ne juntl maj, qa minti' ma kub'tl nq'o'ne twitza, atzun qine at wile twitza te jumajx.

¹⁰Noqwit minti' o we'ye, mawtlo b'ant-xi kab' maj qqane ja'lo, chi Judá.

¹¹Xitzun ttzaq'we'n Israel aju kyman kyja': —Qa ik tten, kyb'inchamniye jlu: Kyq'onkuxe tuj kysake aqeju ti'xti tb'anilxix in che tzaj tq'o'n tx'otx', ex kyi'nxe teju xinaq te jun oyaj: kyi'nxe ch'in bálsamo, ch'in ta'l kab', ch'in perjum, ch'in tq'olil tze' mirra, ex jun b'yuj kywitz tze' b'a'n kyk'axunjtz.

¹²Kyi'nxe kab' maj tajlal pwaq ik tza'n xi kyi'ne tnejel maj, ex kywitzelkuye che okex q'onte pwaq aju ajtz q'o'n tuj kysake, tu'nju b'alo noq e tzpet ti'j.

¹³Kyuk'inxe kyitz'ine ex kyxi'ye juntl maj tuk'il xinaq lu.

¹⁴Awt Dios, aju at tipumal tu'n tb'ant tkyaqil tu'n, tz'aq'nan tuj tanmi xinaq lu tu'n ttzaj q'aq'an tk'u'j kyi'je, ex tz'etzwit ttzoqpi'n juntl kyermaniye tuk'ix Benjamín. Atzun weye, qa ma chin kyaj tene minti' nk'wa'le, malo b'ant-x, chi kyman.

¹⁵Xitzun kyi'n tky'ajal Jacob qe oyaj ex kab' maj tajlal pwaq ik tza'n tnejel maj, tuk'ix Benjamín xi kyi'n. Kub'tzun b'e kyu'n, e ku'x tuj Egipto ex e okx twitz José.

¹⁶Tej ttil José uk'intoq Benjamín kyu'n, xi tma'n te tmayordom tuj tja: —Q'inxa qe xjal lu max njaye. B'yon kub'a jun wakẍ ex b'inchan b'aja tu'nju che wa'l qe xjal lu wuk'ile te chilkuq'ij ja'lo, chi José.

¹⁷Tb'inchatzun mayordom tkyaqil ik tza'nx otoq tma José, ex e je'x ti'n qe xjal tuj tja José.

¹⁸Atzun kye tzaj t-xob'il kyi'j tej kyxi q'i'n tja José, ex in kyma'ntoq kyxolx: Ma qo tzaj q'i'n tzalu b'alo tu'n tlaj pwaq aju aj q'o'n tuj qsak tej qaj. Ja'lo k'okel tzoqpaj qi'j ex qo okel te tmajen kyuk'ix qe qbur, che chi.

¹⁹Tejtzun kypon ttzi ja, e je'x laq'e' ttxlaj mayordom tu'n kyyolin tuk'il,

²⁰ex xi kyma'n te kyja': —Ay tat. Tej qul aje tnejel maj, axix tok laq'ol triw qo'ye,

²¹ex tej qpone tuj lugar jatum tu'n tex aq'b'il qu'ne, jaqet ttzi qsake, jatz knet pwaq ttzi t-sak teyle te junjun qeye, ex cabalx ta'toq tajlal pwaq. Ja'lo, lu ma tzul qi'ne.

²²Ax ikx ma tzaj qi'ntle pwaq tu'n tlaq'et triw qu'ne. Minti' b'a'n qu'ne alkye ku'x q'onte pwaq ttzi qsake tej qul aje tnejel maj, che chi.

²³Xitzun ttzaq'we'n mayordom kye kyja': —Qe' kyk'u'je ex mi'n che xob'e. Aju Kydiose ex Tdios kymane, aloju ku'x q'onte pwaq kytzi' qe kysake. O nk'ame aju kypwaqe oktz kyq'o'ne twi triw, chi mayordom. Etztzun q'i'n Simeón tu'n mayordom tuj pres ex xi ti'n kyuk'il qe terman.

²⁴Jurat e okx ti'n mayordom tuj tja José, xi tq'o'n a' kye tu'n tel tx'jet kyi'j kyqan, ex xi tq'o'n kywa kybur.

²⁵Atzun kye, b'ant tten oyaj kyu'n, ex e ayon akux nnu'l José te chilkuq'ij, tu'nju otoq kyb'i atzun tu'n kywa'n tja.

²⁶Tejtzun tul José tja, xi kyq'o'n te qe oyaj otoq tzaj kyi'n, ex e kub' ẍmeje' twitz tejxi tpon takl tib'aj kywitz max twitz tx'otx'.

²⁷Xitzun tqanin José kye tza'ntoq ate', ex xi tqanintl: —¿Tza'n ta' kymane, aju tij xjal tzaj kyma'ne weye? ¿Itz'xpe? Chi José.

²⁸E kub'tzun mok'e' twitz ex xi kytzaq'we'n: —B'a'n ta' qmane aju ajb'el teya, ex itz'x, che chi.

²⁹B'aj tke'yin José ex o til Benjamín aju titz'in, aju tal ttxu', ex xi tqanin kye: —¿Apetzun kyitz'ine lu, aju kymaye weye? Xitzun tma'n te kyja': —Awt Dios ky'iwlante teya nky'ajal, chi José.

³⁰Ẍib'xix pon tuj tanmi José tej ttil aju titz'in, xi tjyo'n jatum tu'n tok ten oq'el ex ax okx naj tuj tkwart, ex atzun ok ten oq'el.

³¹Tejtzun tb'aj oq', el ttx'jo'n twitz, etz tuj tkwart, ex xi tma'n kye tmajen: Kyq'on kub'e wab'j, chi José.

³²Part o wa'n José, part o che wa'n qe terman, ax ikx part o che wa'n qe aj Egipto, aqeju ate'toq tuk'il, porke ik'b'ilxix tuj kywitz aj Egipto tu'n kykub' ten wa'l junx kyuk'il aj Hebreo.

³³E kub' qe' qe terman José ik tza'nx otoq txi tma'n kye ex ik tza'nx kyab'q'iyil; tnejel kub' qe' aju tnejel tzikb'aj, ex mankb'il kub' qe' aju ch'i'p. B'i'xtzun e lab'in tu'n jlu, ex noq o b'aj kyke'yin tuj kywitz.

³⁴Xi tq'o'n José aju chib'j tkub' twi tmes te kychi' qe terman; atzun te Benjamín jwe' maj tchi' tzaj tq'o'n twitz kye ttzik. E k'an ex e tzalaj junx tuk'il.