Read kumam Génesis 45 Bible Online

Génesis 45 - kumam bible

Génesis 45

¹Minti' o tipatl José tu'n mi'n tjaw oq' kywitz kykyaqil qe ajb'el te. Tu'ntzun jlu jaw tq'ajq'ajel twi' ex tma: Kyexe kykyaqile tzalu, chi José. Kyja'tzun, mi jun ajb'el kyaj ten tuk'il tej t-xi tma'n kye ttzik qa kyerman kyib'.

²Oktzun ten José oq'el kyuwxix, o kyb'i kykyaqil aj Egipto, ex pon tqanil jlu max tuj tja Faraón.

³Xitzun tma'n José kye terman: —Aqine José. ¿Itz'xpe nmane? Chi José. Atzun kye terman minti' o b'ant ttzaq'wenjtz kyu'n, tu'nju b'i'x e sek'paj twitz José.

⁴Xitzun tma'n José kye terman: —Che laq'etze ntxlaje, chi José. Atzun kye e je'x laq'e', ex xi tma'n kye: —Aqine José aju kyermaniye, aju tzaj kyk'ayine tuj Egipto.

⁵Atzun ja'lo, mi'n che b'isune ex mi'n tzaj kyq'oje kyxole ti'j ju ntzajlen kyk'ayine tzalu, tu'nju ate Dios tzaj samante weye tu'n wul neje kywitze tu'n kyklet xjal.

⁶Ma b'ant-xi kab' ab'q'i ttzajlen we'yaj twitz tx'otx', ex tuj jwe'tl ab'q'i ja'lo mi a'l jun xjal k'awal mi kchmol twitz awal.

⁷Ate Dios tzaj samante weye tu'n wul neje kywitze tu'n tkyaj klet kyiyjile twitz tx'otx', ex tu'n kykolpete tuj jun tumel ma'xix toklen.

⁸Tu'ntzun jlu, mya kyu'ne in tzaj kysama'ne tzalu, noq o'kx tu'n te Dios, ex ax te o tz'ok q'onte weye te onil te Faraón, te nejenel tuj tja ex te gobernador tib'aj tkyaqil tx'otx' Egipto.

⁹Kyxi naje tuk'il nmane ex kymanxe te kyja': Chitzun José aju tky'ajala: Ate Dios o tz'ok q'onte weye te gobernador tib'aj tkyaqil tx'otx' Egipto. Tzaja wuk'ile jurat naj.

¹⁰Atzun knajala tuj lugar Gosén, kyuk'ix qe tk'wa'la, qe tal tchmana, kykyaqil qe taluna ex tkyaqilju at teya. Kyja'tzun, niqayin ntxlaje ktela.

¹¹Atzun kxel nq'o'ne twaya tu'nju atx jwe' ab'q'i we'yaj, tu'ntzun mi'n tkyima tu'n meb'yil, aya ex qeju ate' tuj tjaya ex tkyaqilju at teya, che chikuye te nmane.

¹²Lu witz'ine Benjamín, ax ikx kyeye che okele testiw ti'j, qa aku qine in chin yolin kyuk'ile.

¹³Kytx'olb'anxe te nmane ti'j tkyaqil woklene tok tzalu tuj Egipto, ex ti'j tkyaqilju ma kyile tzalu. Kyxi naje q'ilte nmane, chi José xi tma'n kye.

¹⁴Tzajtzun tchle'n José aju titz'in Benjamín tb'i, ex ok ten oq'el. Ax ikx te Benjamín ok ten oq'el chle'ntoq José tu'n.

¹⁵El ttz'ub'an José kywitz kykyaqil qe terman, ex ok ten oq'el tej kytzaj tchle'n. Te tib'ajxi jlu, e ok ten qe terman yolil tuk'il.

¹⁶O pon tqanil lu tuk'il Faraón tuj tja, chi kyja': Ma che ul qe terman José, ex o jaw tzalaj Faraón kyuk'ix qe ajb'el te.

¹⁷Xitzun tma'n Faraón te José kyja': —Q'manxa kye termaniya tu'n tok kyq'o'n tiqatz kychej tu'n kyaj tuj Canaán,

¹⁸ex e ttzaj kyi'n kyman kyuk'ix qe kyxu'jil ex kyk'wa'l, ex e kyul wuk'ile. Kxel nq'o'ne kye aju tb'anil tx'otx' tzalu tuj Egipto, ex che wa'l ti'j tb'anil wab'j ktzajel tuj tx'otx' lu.

¹⁹Q'manxa kye tu'n kyxi kyi'n carwaj tzalu tuj Egipto tu'n ttzaj kyi'n kyxu'jil ex qe kyk'wa'l, tuk'ix kymane, ex e kytzaj tzalu.

²⁰Mi'n che ok we' ti'j aju at kye ma chixin, porke k'okel te kye aju q'inumab'l at tzalu tuj Egipto, chi Faraón.

²¹B'anttzun kyu'n qe tky'ajal Israel ikju. E je'x tq'o'n José carwaj kye ik tza'nx otoq tma Faraón, ex xi tq'o'n kywa tuj kyb'e.

²²Ax ikx xi tq'o'n José jun paq t-xb'alun teyle junjun; atzunte Benjamín xi tq'o'n ox syent saq pwaq te, ex jwe' paq t-xb'alun.

²³Ex xi t-sama'n José laj bur tjaq' iqtz tb'anilxix attoq tuj Egipto. Ex lajtl bur xi' tjaq' iqtz triw tuk'ix wab'j ex chib'j, tu'n tb'aj tu'n tman tuj tb'e ok ttzaj.

²⁴B'aj tq'olb'en tib' José kyuk'il qe terman ex xi tma'n kye kyja': Mi'n che q'ojle tuj b'e, chi José. Kub'tzun b'e kyu'n.

²⁵E ajtztzun tuj Egipto, ex e pon tuj Canaán jatum najltoq Jacob aju kyman.

²⁶Xitzun kytx'olb'a'n te kyman kyja': Itz'x te José, ex a in kawin tib'aj tkyaqil tx'otx' Egipto, che chi. B'i'x naj tnab'l Jacob tu'n jlu, ex minti' xi tniman.

²⁷Tej tb'aj kytx'olb'a'n tkyaqilju otoq tma José kye, ex tej tlonte Israel qe carwaj otoq che tzaj t-sama'n José te q'ib'l te, jaw tzalaj nim,

²⁸ex tma kyja': Ax tok itz'x José aju nky'ajale. Ma chinxe tuk'il, ex ok wila'ye na'nxtoq nkyime.