Read kumam Génesis 47 Bible Online

Génesis 47 - kumam bible

Génesis 47

¹Xi'tzun José q'malte tqanil te Faraón ex chi kyja': Ma tzul nmane kyuk'ix wermaniye, tzajni qe tuj tx'otx' Canaán ex ma che ul tuj tx'otx' Gosén kyuk'il qe kyẍne'l, qe kywakẍ ex tkyaqilju at kye, chi José.

²Etztzun t-sk'o'n José jwe' terman, ex e tzaj ti'n twitz Faraón tu'n tojtzqinte Faraón kywitz.

³Xitzun tqanin Faraón kye terman José kyja': —¿Alkye aq'untl b'a'n kyu'ne? Chi Faraón. Xitzun kytzaq'we'n: —Pastoril ẍne'l qo'ye ik tza'nx qe qxe'chele, aqo'ye tmajena.

⁴Ma qo ule tu'n qtene tuj tx'otx' lu, tu'nju at nim we'yaj tuj Canaán ex minti' kywa qẍne'le. B'inchama xtalb'il, q'ontza amb'il qeye tu'n qnajane tuj tx'otx' Gosén, che chi qe terman José.

⁵Xitzun tma'n Faraón te José kyja': —Ma tzul tmana kyuk'ix qe termaniya tu'n kyten tuk'ila.

⁶Tuj tkwenta ta' tx'otx' Egipto. Q'onxa tnajb'il tmana ex qe termaniya tuj tb'anil tx'otx'. E kynajan tuj tx'otx' Gosén, ex qa ma tz'el tnik'a ti'j qa at qe xinaq at kyxol at kynab'l kyi'j alumaj, q'o'nka qe te kwentil walune, chi Faraón.

⁷Ax ikx xi q'i'n Jacob tu'n José twitz Faraón, ex kub' ky'iwla'n Faraón tu'n Jacob.

⁸Xitzun tqanin Faraón te Jacob kyja': —¿Jte'xi ab'q'iya? Chi Faraón.

⁹Xi ttzaq'we'n Jacob: —Ma chin japune twi' 130 ab'q'i ex noq in chin b'etje'ye. Mya ela'xi ab'q'i qine ex nimku ma tzik'x wu'ne. Na'nx tjapun wab'q'iyile ik tza'n kyab'q'iyil qtzan nxe'chele, ex ax b'etin xjal qe, chi Jacob.

¹⁰Kub'tzun ky'iwla'ntl Faraón tu'n Jacob, ex b'aj tq'olb'en tib' tuk'il.

¹¹Kyja'tzun xi tq'o'n José tnajb'il tman kyuk'ix qe terman tuj tx'otx' Egipto, tuj tx'otx' mas tb'anil attoq tuj, tuj tx'otx' ti'jele tnam Ramesés, ik tza'nx otoq tma Faraón.

¹²Xi tq'o'n José twa tman, kywa qe terman ex kywa qe txqantl xjal ate' tuj tja tman, ik tza'nx in b'aj tu'n teyle te jun ja xjal.

¹³Minti'toq kywa xjal tuj tkyaqil tx'otx' Egipto. Atzunte we'yaj noq kyja' xi' tuj tilil. Ch'ixtoq kykyim xjal tu'n we'yaj tuj Egipto ex tuj Canaán.

¹⁴B'aj tchmo'n José tkyaqil kypwaq aj Egipto ex qe aj Canaán, aju otoq tz'okx kychjo'n twi kywa, ex xi tk'u'n pwaq lu tuj tja Faraón.

¹⁵Tej minti'tltoq kypwaq aj Egipto ex aj Canaán, kykyaqil aj Egipto e pon q'malte te José kyja': —Q'ontza qwaye. Mya b'a'n tu'n qkyime twitza tu'n we'yaj, noq tu'nju minti'tl qpwaqe, che chi.

¹⁶Xitzun ttzaq'we'n José: —Qa minti'tl kypwaqe, kyi'ntze kyalune ex jaku txi nq'o'ne kywaye te t-xel kyalune, chi José.

¹⁷Xitzun kyi'n aj Egipto kyalun tuk'il José, ex xi tq'o'n kywa kyi'j kychej, kyẍne'l, kywakẍ ex kybur. Xi tq'o'n kywa te kyxel kykyaqil kyalun tuj ab'q'i lu.

¹⁸B'ajtzun ab'q'i lu, e pon tuj juntl ab'q'i q'malte te José kyja': —Tat, mlay kub' qewane twitza minti'tl qpwaqe, ax ikx teya qe qalune. Minti'tl mas tu'n t-xi qq'o'ne teya, noq o'kx aku qo'ye ex qtx'otx'e.

¹⁹Mya b'a'n tu'n qnaje tuk'ix qtx'otx'e twitza. Qo tlaq'onxa tuk'ix qtx'otx'e te twi qwaye. Jaku qo oke te tmajen Faraón, tuk'ix qtx'otx'e tu'n tajb'en te. Q'ontza iyaj tu'n qanq'ine, tu'n mi'n qkyime, ex tu'n mi'n tnaj tx'otx', che chi aj Egipto.

²⁰Kyajtzun tlaq'o'n José tkyaqil tx'otx' tuj Egipto tu'n tok te Faraón. Kykyaqil aj Egipto xi kyk'ayin kytx'otx' tu'nju nimxix we'yaj. Kyajtzun tkyaqil tx'otx' tuj tkwent Faraón.

²¹Atzun qe xjal tuj tkyaqil tx'otx' Egipto e ok te tmajen Faraón.

²²O'kxku kytx'otx' qe pal minti' laq'et tu'n, tu'nju in kyk'mo'ntoq kywa tu'n Faraón. Atzun in che wa'ntoq ti'j aju in xi tq'o'ntoq Faraón kye. Tu'ntzun jlu minti' xi kyk'ayin kytx'otx'.

²³Xitzun tma'n José kye xjal kyja': —Ja'lo ma che laq'ete wu'ne tuk'ix kytx'otx'e tu'n kyoke te Faraón. Lu kyiyaje lu tu'n tku'x kyawa'ne.

²⁴Ti'j twitz kyawale kjawil, kxel kyq'o'ne tjwe'yin b'yuj te Faraón, atzun kyaje b'yuj kyjel ten te kyeye, tu'n tku'x awet ex tu'n kywa'ne kyuk'ix kyk'wa'le ex kykyaqil qeju ate' kyuk'ile, chi José.

²⁵Xitzun kytzaq'we'n: —Tat, ma qo klete tu'na. Kukxwit tb'inchaya xtalb'il qeye, ex qo okele te tmajen Faraón, che chi xjal.

²⁶Kub'tzun tq'o'n José aju ley lu kyib'aj xjal tuj tx'otx' Egipto ex ax ta' ja'lo, tu'n t-xi q'ot tjwe'yin b'yuj twitz awal te Faraón; o'kx kytx'otx' pal minti' ok te Faraón.

²⁷Kyja'tzun tten e kub' ten aj Israel najal tuj Egipto. E ok tajwil tx'otx' Gosén, ex nimxix kyajlal o chmet.

²⁸Ten Jacob wuqlaj ab'q'i tuj Egipto, ex japun twi' 147 ab'q'i.

²⁹Tej ch'ixtoq tkyim Israel, tzaj ttxko'n tky'ajal aju José tb'i, ex xi tma'n te kyja': —Qa taja tu'n tb'inchanteya xtalb'il weye, chin kub'sale twitza, q'o'nktz tq'ab'a tjaq' nkuxe ex q'mantza jun yol axix tok ti'j aju tu'n tb'inchanteya wi'je. Chin kub'sale twitza mi'n chin ku'x tmaqu'na tuj Egipto.

³⁰Ok nkyime ex ok npone junx kyuk'il qtzan nxe'chele, chin elex ti'na tuj Egipto, ex chin okex tmaqu'na junx kyuk'il, chi Jacob. Xitzun tma'n José te kyja': —Kb'antel wu'ne ik tza'n ma tmaya, chi José.

³¹Xitzun tma'n Israel te kyja': —Q'mantza jun yol axix tok twitz Dios, chi Israel. Xitzun tma'n José jun yol axix tok twitz Dios, ex kub' mok'e' Israel tib'aj twi twatb'il tu'n tk'ulun te Dios.