Read kumam Génesis 48 Bible Online

Génesis 48 - kumam bible

Génesis 48

¹Te tib'ajxi jlu, pon tqanil tuk'il José, otoq yab't tman. Xi'tzun José tuk'il ex xi ti'n Manasés ex Efraín, aqeju kab'e tky'ajal.

²Tej tb'inte Jacob otoq tzul José aju tky'ajal lolte te, jaw tipuman tib', kub' qe' twi twatb'il,

³ex xi tma'n te José kyja': Aju Dios at tipumal tu'n tb'ant tkyaqil tu'n kub' tyek'un tib' nwitze tuj tnam Luz tuj tx'otx' Canaán, ex kub' ky'iwla'n qine tu'n.

⁴Tzaj tma'n weye kyja': Wu'ne kchmetel nim tb'aja ex nim tiyjila. Ti'ja che elel nimku k'loj xjal. Kxel nq'o'ne tx'otx' lu kye tiyjila che ul itz'j te tib'ajxi, ex k'okel te kye te jumajx, chi Dios.

⁵Atzun ja'lo, weye Efraín ex Manasés, aqeju kab'e tky'ajala e ul itz'j tzalu tuj Egipto tej na'nxtoq wule tuk'ila tuj tx'otx' lu. Weye qe jlu ik tza'n Rubén ex Simeón.

⁶Atzun qe tk'wa'la che ul itz'j kyib'ajxi qe jlu, atzun qe teya, ex noq tu'nju kyerman kyib' tuk'il Efraín ex Manasés at kyoklen ti'j etzb'il kyuk'il.

⁷Tej wajtze tuj Padan-aram kyaj kyim Raquel aju ttxu'ya tuj tx'otx' Canaán, tej ch'ixtoq nkanune tuj Efrata, ex ku'x nmaqu'ne tuj tb'eyil Efrata, aju ax juntl tb'i Belén, chi Jacob.

⁸Til Israel qe tky'ajal José ex xi tqanin te kyja': —¿Alkye qe jlu? Chi Israel.

⁹Xi ttzaq'we'n José te tman: —Atzun qe nky'ajale o che tzaj tq'o'n Dios tzalu, chi José. Xitzun tma'n tman te kyja': —Che tlaq'b'antza qe nwitze tu'ntzun kykub' nky'iwla'ne, chi tman.

¹⁰Myaxix b'a'ntoq tb'aq' twitz Israel tu'nju otoq tijin. Tu'ntzun jlu minti'xix in tiltoq. E je'x tlaq'b'a'n José qe tky'ajal twitz tman; atzun te e tzaj tchle'n, el ttz'ub'an kywitz,

¹¹ex xi tma'n te José kyja': —Minti'toq ximan wu'ne tu'n twile twitza; atzunte Dios o tzaj tq'o'n amb'il weye tu'n twile kywitz qe tk'wa'la, chi Israel.

¹²E je'l ti'n José qe tky'ajal kywi tch'ek tman, kub' mok'e' ex pon takl tib'aj twitz max twitz tx'otx'.

¹³E tzajtzun ti'n qe kab'e tky'ajal, ate Efraín tuj tb'anq'ab', ex ate Manasés tuj tnayaj, ex e pon tlaq'b'a'n twitz tman. Kyja'tzun kyaj ten Efraín tuj tnayaj Israel ex Manasés tuj tb'anq'ab'.

¹⁴Tejtzun kyxi tnuqpi'n Israel qe tq'ab' kyib'aj, aj tq'o'n tb'anq'ab' tib'aj twi Efraín aju tz'inb'aj; atzun tnayaj tib'aj twi Manasés, maske atoq tzikb'aj.

¹⁵Kub'tzun ky'iwla'n José tu'n Jacob, ex chi kyja': Aju Dios o niman nchmane Abraham ex nmane Isaac te, aju Dios kwentin qine tu'n atxix tej wul itz'je ex kukx ja'lo,

¹⁶aju anjel in chin klete tu'n tuj nimku mya b'a'n, awt ky'iwlante kye ku'xun lu, ex kukxwit tzaj na'n nb'iye kyi'j qe ku'xun lu, tuk'ix tb'i Abraham aju nchmane, ex tb'i Isaac aju nmane. Chmet-xwit nim kyiyjil twitz tx'otx', chi Jacob.

¹⁷Mya b'a'n e'la tuj twitz José tu'nju kub' tq'o'n tman tb'anq'ab' tib'aj twi Efraín. Tu'ntzun jlu tzaj ttzyu'n José tq'ab' tman, tu'n tel ti'n tib'aj twi Efraín ex tu'n tkub' tq'o'n tib'aj twi Manasés,

¹⁸ex xi tma'n te tman kyja': —Mi'n, tat. Mik'x ttenju. Ate Manasés tzikb'aj. Atzun q'onka tb'anq'ab'a tib'aj twi', chi José.

¹⁹Atzunte tman minti' o tkuya ex xi tma'n te kyja': —B'a'n wu'ne, nky'ajal. B'a'n wu'ne. Ax ikx te ku'xun lu k'okel te jun k'loj xjal nim toklen. Atzunte tz'inb'aj mas toklen ktel twitz tzikb'aj, ex che okel qe tiyjil te nimku k'loj xjal, chi tman José.

²⁰Tujxtzun q'ij lu e b'aj tky'iwla'n qe kab'e ku'xun lu ex tma kyja': —K'ajb'el kyb'iye kyu'n aj Israel te jun ky'iwb'il, ex ok kyma': Awt Dios ky'iwlante kyeye ik tza'n tb'incha kyi'j aj Efraín ex aj Manasés, che chilo, chi Israel. Kyja'tzun xi tq'o'n Israel mas toklen Efraín twitz Manasés.

²¹Xi tma'n Israel te José kyja': —Weye chin kymele; atzunte Dios ktel kyuk'ile ex che ajele tu'n tuj kytx'otx' qe kyxe'chele.

²²O txi nq'o'ne mas nim tx'otx' teya kywitz qe termaniya, aju el wi'ne kye aj Amorreo tej nq'ojine kyi'j tu'n nspadiye ex tuk'ix xob'l npleche, chi Israel.