Read kumam Génesis 7 Bible Online

Génesis 7 - kumam bible

Génesis 7

¹Xi tma'n Qman Dios te Noé kyja': Tokxa tuj matij barc kyuk'ix qeju ate' tuj tjaya, tu'nju ma wile o'kx aya tz'aqlxix kyxol xjal ate' tuj tq'ijlalil ja'lo.

²Kyxol kykyaqil wiq txkup saq qe, che okex ti'na wuq tman ex wuq ttxu'; atzun qeju tz'il qe, k'okex ti'na noq o'kx jun tman ex jun ttxu'.

³Ax ikx che okex ti'na wuq tman ex wuq ttxu' ti'j teyle junjun wiq chyu'j ex txqantl txkup in che lipan twitz kya'j, tu'ntzun tkyaj klet kyiyjil twitz tx'otx'.

⁴Porke tb'ajlenxi wuq q'ij, tzul jb'al wu'ne q'ijl ex qonik'an tuj 40 q'ij. Che najel wu'ne kykyaqil qeju itz', aqeju e kub' nb'incha'ne twitz tx'otx'.

⁵Tb'inchatzun Noé tkyaqilju o tma Qman te.

⁶Otoq japun Noé twi' qaq syent ab'q'i tej ttzaj nimxix a' twitz tx'otx'.

⁷Okxtzun Noé tuj matij barc kyuk'ix qe tky'ajal, tuk'ix t-xu'jil ex qe tlib', tu'ntzun mi'n kynaj tu'n a'.

⁸Qe txkup saq qe ex qeju tz'il qe, qe chyu'j ex txqantl txkup in che lipan twitz kya'j ex qeju in xi kyjaqu'n kyk'u'j twitz tx'otx',

⁹e okx tuk'il Noé tuj matij barc, jun tman ex jun ttxu', ik tza'nx otoq tma Dios.

¹⁰Tujtzun twuqin q'ij tzajtzun nimxix a' twitz tx'otx'.

¹¹Tuj ab'q'i tej tjapun Noé twi' qaq syent ab'q'i, tuj wuqlaj tajlal tkab'in xjaw, tujtzun q'ij lu e jaqet kykyaqil qe twi a' t-xe nintz mar, jaqet ttzi kya'j, ex tzaj q'eqab'.

¹²Q'ijl ex qonik'an tuj 40 q'ij kub' q'eqab' twitz tx'otx'.

¹³Tujx q'ij lu okx Noé tuj matij barc, tuk'ix Sem, Cam ex Jafet, aqeju tky'ajal, tuk'ix t-xu'jil ex qe ox tlib'.

¹⁴Ax ikx tkyaqil wiq txkup at tjaq' k'ul, teyle te junjun tiyjil, tkyaqil wiq alumaj, teyle te junjun tiyjil, tkyaqil wiq txkup in xi kyjaqu'n kyk'u'j twitz tx'otx', teyle te junjun tiyjil ex tkyaqil wiq chyu'j ex txqantl txkup in che lipan twitz kya'j, teyle te junjun tiyjil,

¹⁵e okx tuk'il Noé tuj matij barc, mojmoj kyten.

¹⁶Tman ex ttxu' te tkyaqil wiq qeju e okx, ik tza'nx o tma Dios te Noé. Kyokxlenxi b'aj qe jlu, oktzun tlamo'n Qman tlamel matij barc.

¹⁷Tzajtzun nimxix a' twitz tx'otx' tuj 40 q'ij. O ch'iy a' ex jaw iqan matij barc tu'n.

¹⁸Nim jaw ch'iy a' twitz tx'otx' ex jaw laq'e' matij barc tib'aj.

¹⁹Nimxix jaw ch'iy a' ex japun b'aj kyib'aj kykyaqil witz mas ma' kywa'l ate' twitz tx'otx'.

²⁰Jaw ch'iy a' wuq var tuk'il mey kyib'aj qe witz mas ma' kywa'l.

²¹E najtzun kykyaqil qeju najl twitz tx'otx': Qe chyu'j ex txqantl txkup in che lipan twitz kya'j, qe alumaj, qe txkup te tjaq' k'ul, qe txkup in xi kyjaqu'n kyk'u'j twitz tx'otx' ex kykyaqil xjal.

²²E kyim kykyaqil qeju ate'toq twitz tx'otx', aqeju itz'toq qe ex in jatz kyxew.

²³O'kx te Noé kyaj klet kyuk'ix qeju ate'toq tuk'il tuj matij barc; atzun qe txqantl b'i'x e naj: Qe xjal, qe alumaj, qe chyu'j ex txqantl txkup in che lipan twitz kya'j ex qe txkup in xi kyjaqu'n kyk'u'j twitz tx'otx'.

²⁴Atzunte a' kyaj ten 150 q'ij twitz tx'otx'.