Read kumam Génesis 8 Bible Online

Génesis 8 - kumam bible

Génesis 8

¹Ultzun Noé tuj t-ximb'etz Dios kyuk'ix kykyaqil qe txkup ate'kxtoq tuk'il tuj matij barc. Tzaj tq'o'n Dios jun kyq'iq' tib'aj tx'otx' ex kub' laq'e' a';

²e maqet qe twi a' t-xe nintz mar, maqet ttzi kya'j ex we'tzun jb'al.

³Cheb'ale kub' ti'j a'. Tb'ajlenxi 150 q'ij, otoq kub' laq'e' a'.

⁴Atzun kub' ten matij barc kywi witz tuj Ararat tuj wuqlaj tajlal twuqin xjaw.

⁵Atzunte a' in kub' laq'e'toq, ex tuj tnejel q'ij tuj tlajin xjaw, maxitzun tq'ancha'lin kywi' junjun witz mas nmaq kywa'l.

⁶Tb'ajlenxitzun 40 q'ij, okx tjaqo'n Noé aju tventanil matij barc otoq b'ant tu'n.

⁷Etztzun ttzoqpi'n jun joj; atzunte joj noq o lipan tik', nne'lxi laq'e' ex nnu'lxi laq'e' ti'j matij barc tejxi tkub' tzqij a'.

⁸Te tib'ajxi joj, etz ttzoqpi'n Noé jun paloma tu'ntzun tke'yinte qa otoq tzqij a' twitz tx'otx'.

⁹Minti' knet jatum tu'n tkub' we' tu'nju atxtoq a' twitz tx'otx'. Ajtzun meltz'aj jatum ta'toq matij barc. Etz tq'o'n Noé tq'ab' tzyulte ex okx ti'n tuk'il.

¹⁰Ayon Noé wuq q'ijtl. Etztzun t-sama'n juntl maj aju paloma.

¹¹Ch'ixtoq tok yupj tej tul meltz'aj paloma q'i'ntoq jun tal t-xaq tze' olivo tu'n ttzi'. Tu'ntzun jlu el tnik' Noé ti'j kyja'toq tkub' tzqij a' twitz tx'otx'.

¹²Ayon Noé wuq q'ijtl. Etztzun t-sama'n juntl maj aju paloma; atzunte paloma minti' ul meltz'aj juntl maj.

¹³Tuj ab'q'i tej tjapun Noé twi' 601 ab'q'i, tuj tnejel q'ij tuj tnejel xjaw, tzqij twitz tx'otx'. Eltzun ti'n Noé aju tmaqsil matij barc ex o til otoq tzqij twitz tx'otx'.

¹⁴Tuj 27 tajlal tkab'in xjaw otoq b'aj tzqij twitz tx'otx'.

¹⁵Tzajtzun tma'n Dios te Noé kyja':

¹⁶Tetza tuj matij barc, tuk'ix t-xu'jila, kyuk'ix qe tky'ajala ex qe tlib'a.

¹⁷Q'i'metza kykyaqil qe txkup ate' tuk'ila: Qe chyu'j ex txqantl txkup in che lipan twitz kya'j, qe alumaj, ex qe txkup in xi kyjaqu'n kyk'u'j twitz tx'otx', tu'n t-xi kysipan kyib' twitz tx'otx', tu'n kypoq'l ex tu'n tchmet kyb'aj twitz tx'otx', chi Dios.

¹⁸Etztzun Noé, kyuk'ix qe tky'ajal, tuk'ix t-xu'jil ex qe tlib'.

¹⁹E je'tz tuj matij barc kykyaqil txkup in che yukch twitz tx'otx', kykyaqil qeju in xi kyjaqu'n kyk'u'j ex qeju in che lipan twitz kya'j, teyle te junjun tiyjil.

²⁰Kub'tzun tb'incha'n Noé jun altar te patb'il chojb'il twitz Qman, e tzaj ti'n qe txkup ex qe chyu'j saq qe, jun ti'j teyle junjun wiq, ex e kub' tpatun te jun oyaj tib'aj altar.

²¹Tejtzun tna'nte Qman tb'anilxix tk'ok'jal oyaj, tma tuj tanmi kyja': Mlay tzaj nq'o'ntle sentens tib'aj tx'otx' tu'n tlaj xjal, porke ate xjal atxix tuj tku'xumal o'kx in ximan ti'j mya b'a'n, ex mlay che najtl tkyaqil txkaj jil wu'ne ik tza'n o nb'inchaye.

²²Akux atx tx'otx', kukx ktel tq'ijlalil awb'il ex chemb'il twitz awal, tq'ijlalil kyaq ex che'w, tq'ijlalil jb'alil ex koresma, kukx ktzajel q'ijl ex qonik'an, chi Qman.