Read kumam 2 Samuel 11 Bible Online

2 Samuel 11 - kumam bible

2 Samuel 11

¹Tuj koresma te juntl ab'q'i, tuj tq'ijlalil ok in che ex qe rey tuj q'oj, xi t-sama'n David Joab kyuk'ix kykyaqil qeju at kyoklen ttxlaj, kyuk'ix kykyaqil qe soldad aj Israel, ex e kub' qe aj Amón kyu'n, ax ikx b'aj kytxolb'an kyib' ti'j tnam Rabá. Atzunte David ax kyaj ten tuj Jerusalén.

²At jun qale jaw we' David tuj tkoẍb'il, ex tej in b'et tik' twi tja tzaj tke'yin lu jun xu'j tb'anilxix ke'yin matoq in chin.

³Xi t-sama'n David jun sanjel tu'n tb'inte alkye ju xu'j lu, ex ultzun q'ma'n te qa ate Betsabé, aju tme'jel Eliam ex t-xu'jil Urías aju aj Heteo.

⁴Xitzun t-sama'n David junjun sanjel q'ilte ju xu'j. Ultzun q'i'n tuk'il, ex kub' tan David tuk'il, te tib'ajxi aj meltz'aj xu'j tja. Ate xu'j lu matoq tb'ajlen ttx'jon tib' ti'j ẍwo'j in k'u'l ti'j.

⁵B'i'x ok ten tal xu'j, ex xi t-sama'n tqanil ti'j jlu tuk'il David.

⁶Atzunte David xi t-sama'n jun xjal q'malte te Joab tu'n tajtz sama'n Urías tu'n, aju aj Heteo, ex tb'inchatzun Joab ikju.

⁷Tejtzun tpon Urías twitz David, xi tqanin te tza'ntoq ta' Joab ex qe soldad, ex alkye tqanil ti'j q'oj.

⁸Te tib'ajxi xi t-sama'n tu'n t-xi' tja ex tu'n tb'aj ttx'jo'n ti'j tqan. Tejtzun tetz Urías tuj tja rey, xi t-sama'n rey jun wab'j tb'anilxix te Urías, ik tza'n jun oyaj te.

⁹Atzunte Urías ax ex aq'b'il tu'n ttzi tlamel tja rey, junx kyuk'il qe soldad in che xq'uqin tja rey, ex minti' xi' tja.

¹⁰Tejtzun tb'inte David qa minti' otoq txi' Urías tja, xi tqanin te: —¿Tiqu'n minti' xi'ya tjaya tul-lenxiya tuj tb'eya?

¹¹Atzunte Urías xi ttzaq'we'n: —Tza'nx ju kax k'ub'l tley Dios ex qe soldad kye aj Israel ex aj Judá, atzun in che tan kyuj tal ja t-xaq tze'yin kywi', ax ikx te Joab aju nejenel weye ex qe sanjelal teya Tat Rey, ax in che kub' tan tuj kojb'il; ¿maj chin okextzune tuj njaye tu'n nwa'ne ex tu'n nk'ane ex tu'n nkub' tane tuk'il nxu'jile? Aya Tat Rey, mlayx b'ant jlu wu'ne.

¹²Atzunte David xi tma'n te: —Tencja ja'lo ex nchi'jxitzun txi'ya. Kyja'tzun kyaj ten Urías tuj Jerusalén tuj juntl q'ij.

¹³Xitzun txko'n tu'n David tu'n twa'n ex tu'n tk'an vin junx tuk'il, max tejxi tchyo'n twi' tu'n. Ya te qonik'an etz Urías ex xi' tal kyuk'il qe soldad xq'uqil tja rey, ex minti'x xi' tja.

¹⁴Te prim tuj juntl q'ij kub' ttz'ib'an David jun u'j tu'n t-xi t-sama'n te Joab; ex ax ti'j Urías xi t-sama'n ju u'j.

¹⁵Chitzun in tma'n tuj u'j kyja': Kyq'o'nke Urías tuj tnejel txol jatum mas kyuw ta' q'oj, ex kykolinkje tjunal tu'ntzun tk'ixb'i ex tu'n tkyim.

¹⁶Kyja'tzun tten, tej tb'aj kytxolb'an kyib' Joab ti'jele tnam tu'n kyq'ojin, xi tma'n Joab te Urías tu'n tkub' ten tuj lugar jatum b'a'ntoq tu'n jatum ate' qe soldad aj q'oj mas kyuw che q'ojin.

¹⁷E je'tztzun qe soldad kwentil tnam q'ojlel ti'j Joab, ex e kub' junjun kyxol qe t-soldad David kyu'n, ex tuk'ix Urías kyim, aju aj Heteo.

¹⁸Xitzun t-sama'n Joab jun tqanil cabalxix ti'j q'oj tuk'il David,

¹⁹ex xi tma'n te sanjel kyja': Ok tb'aj ttx'olb'a'na tkyaqil tqanil ti'j q'oj te rey,

²⁰qatzun ma jaw q'ojl rey ex qa ma tzaj tqanin teya: ¿Tiqu'n ẍe pon laq'e'ye q'ojlel ti'j tnam? Baqa minti' b'a'n kyu'ne qe xjal lu in ku'tz kyxo'n jun ti'xti max twi muro,

²¹ik tza'n o b'aj tuj tnam Tebes tej tkub' b'yo'n Abimelec aju tky'ajal Jerobaal tu'n jun xu'j ku'tz t-xo'n jun kya' max twi muro ex tu'ntzunju kyim. ¿Tiqu'ntzun ẍe pon laq'e'ye ttxlaj muro? qa chi, atzun teya txi tma'na te: Ax ikx ma kyim Urías aju aj Heteo ex nejenel kyxol t-soldadiya, chikuya.

²²Xi'tzun ju sanjel, ex tej tpon xi ttx'olb'a'n te David tkyaqilju otoq txi tma'n Joab te.

²³Ax ikx xi tma'n sanjel te David: —Qe soldad ẍe etz q'ojlel qi'je tuj chq'ajlaj, ex kyja'toq tkub' qi'je kyu'n, ex tu'nju kyuw ok q'oj kyi'j qu'ne, kyja'tzun e aj meltz'aj tu'n kyokx ttzi tlamel tnam.

²⁴Kyja'tzun max twi muro saj kyxo'n qe kyplech qi'je aqo'ye t-soldadiye Tat Rey, ex ma che kyim junjun nejenel kyxol qe soldad, ex tuk'ix Urías aju aj Heteo ma kyim.

²⁵Atzunte David xi ttzaq'we'n te sanjel: —Q'manxa te Joab tu'n mi'n ttzaj tb'is tu'n jlu, ex tkyaqil jlu atzun in b'aj tuj q'oj. Noq o'kx tu'n tq'ojin ti'j tnam tuk'il mas tipun max ok tkub' ti'j tu'n. Atzun teya kyuwsanxa tk'u'j.

²⁶Tejtzun tb'inte t-xu'jil qtzan Urías qa otoq kyim tchmil, ok ten b'isul ti'j.

²⁷Tej tjapun b'aj tq'ijlalil tb'is xu'j, xi tma'n David tu'n ttzaj q'i'n tuk'il, ex o tk'am tuj tja. Ok te t-xu'jil ex ultzun itz'j jun tky'ajal David ti'j xu'j. Ex mya b'a'n e'la tuj twitz Dios aju tb'incha David.