Read kumam 2 Samuel 17 Bible Online

2 Samuel 17 - kumam bible

2 Samuel 17

¹Te tib'ajxi jlu xi tma'n Ahitofel te Absalón: —Q'ontza amb'il weye tu'n tjaw nsk'o'ne kab'laj mil xinaq, ex tujx qonik'an ja'lo chin elexe tu'n tkub' ti'j David wu'ne.

²Oktzun tb'aj tipun ex ok t-sikt wen, chin okel tzoqpaje ti'j tu'n ttzaj t-xob'il wu'ne, ex kykyaqiltzun qe xjal ate' tuk'il che elel oq. Noq o'kx te rey David kb'el nb'yo'ne,

³ex b'i'x che tzajel wi'ne kykyaqil xjal tu'n kyten tuk'ila. Aju teya tajb'il atzun, tu'n tkyim o'kx jun xinaq, tu'ntzun kykyaj ten kykyaqil xjal tuj txub'txaj.

⁴Aju t-ximb'etz Ahitofel b'a'n ela tuj twitz Absalón ex tuj kywitz kykyaqil qe kytijil xjal aj Israel.

⁵Ax ikx xi tma'n Absalón tu'n t-xi txokb'aj Husai aju aj Arquitas, tu'ntzun tmante jun te tyol ti'j jlu.

⁶Tejtzun tpon Husai twitz Absalón, xi tma'n Absalón te: —Aju t-ximb'etz Ahitofel atzun jlu, ¿okpelo kb'antel qu'n ex qa mi'n? Q'mantz jun teya tyol ti'j jlu.

⁷Atzunte Husai xi ttzaq'we'n: —Aju t-ximb'etz Ahitofel ja'lo mya b'a'n ta',

⁸porke b'a'n tu'na, aju tmana ex qe t-soldad puro kyuw kyk'u'j tuj q'oj, ex pyorlo ja'lo malo tzaj nimxix kyq'oj, ik tza'n in tzaj tq'oj jun ttxu oso te tjaq' k'ul ok in che el q'i'n qe tal. Ax ikx tmana jun xinaq at nim tnab'l tu'n tq'ojin, ex mlay ten kyxol xjal tuj qonik'an ja'lo.

⁹Ya malo txi tewan tib' tuj jun toy' pik ex qa tuj juntl lugar. Ex qa b'i'x ma che kub' junjun teya t-soldad ok ttzyet q'oj, ex qa at junjun ma kyb'i jlu, oklo kyma kyja': Qe xjal ma che ok lpe' ti'j Absalón ma kub' kyi'j, che chilo.

¹⁰Kyja'tzun, kyuk'ixpe qe xinaq kyuw kyk'u'j tuj q'oj ex qe xinaq at nim kyipun ik tza'n tipun jun nintz b'alun, jumajx ktzajel b'aj kyk'u'j tu'n jlu; ex kykyaqil qe aj Israel b'a'n kyu'n, ate tmana ex qe xinaq lepcho'k ti'j, puro kyuw kyk'u'j tuj q'oj.

¹¹Ja'lotzun kxel nq'o'ne jun tconseja: Chmon b'aja kykyaqil xjal aj Israel, ktzajelx qe' tuj Dan tu'n tpon b'aj max tuj Beerseba, porke aju kyajlal xjal lu ik tten ik tza'n ttxa tza'n at ttzi mar, ex twitzelkuya k'okel te nejenel kyxol tuj q'oj.

¹²Jakutzun qo ok tzoqpaj ti'j tmana noq alkyex lugar jatum ta'. Noq minab'en ktzyetel q'oj qu'n kyi'j, tu'nju nimxix qe qb'aj, ex mi jun kyjel anq'in qu'n, mi tmana ex mi qe soldad uk'in tu'n.

¹³Qa ma pon kyklon kyib' tuj jun tnam, qkyaqil aj Israel qo' kxel qi'n qsaqb'aq ti'j tnam lu, tu'ntzun kyku'tz jawet qe ab'j kyok te muro ti'j, ex che xel qjawo'n kykyaqil ab'j tu'n kypon jawet max tuj tq'ab' xaq, ex mi jun ab'j kyjel ten ma chixin, chi Husai.

¹⁴Atzunte Absalón ex kykyaqil aj Israel moje' kyyol qa aju te Husai tconsej mas b'a'n ela twitzju te Ahitofel. (Porke tu'n Qman b'aj ttzaksa'n t-ximb'etz Ahitofel aju otoq tma tuj tumelxix, tu'ntzun tkub' tz'aq ju mya b'a'n tib'aj Absalón.)

¹⁵Te tib'ajxi xi tma'n Husai kye pal Sadoc ex Abiatar aju consej otoq txi tq'o'n Ahitofel te Absalón ex kye qe kytijil xjal aj Israel, ax ikx aju te tconsej otoq txi tma'n.

¹⁶Xi tma'n kye tu'n t-xi kyma'n naj tqanil te David, tu'n mi'n tkyaj ten David tuj qonik'an lu kytxlaj xajb'il a' tuj lugar minti' kynajb'il xjal tuj, noq o'kx tu'n tik'x jlajxi nima Jordán tu'ntzun mi'n kykub' b'yo'n, mi a David ex mi qe t-soldad.

¹⁷Atzun ate'toq Jonatán tuk'ix Ahimaas jatum in jatz jlet twi a' En-rogel tb'i, porke minti' tumel tu'n t-xi kyyek'un kyib' tuj tnam, kyja'tzun noq jun majen xu'j pon q'malte tqanil kye, e je'xtzun naj tu'n t-xi kyma'n te rey David.

¹⁸Ex e ilwaj tu'n jun ku'xun, ex xi' naj ju ku'xun q'malte te Absalón. Ex ate Jonatán tuk'ix Ahimaas jurat e ik' naj ex e pon tja jun xinaq at tuj Bahurim, ex e ku'x naj tuj jun jul jatum in jatz a', tkub' ttxa'n pe'n.

¹⁹Aju t-xu'jil ju xinaq lu jurat naj kub' tlik'un jun xb'alun te maqsib'l ttzi jul, ex kub' t-sputun triw b'ajumaj tib'aj ju xb'alun tkub' ttzi jul. Kyja'tzun mi jun el tnik' ti'j.

²⁰Tejtzun kypon qe xinaq otoq che'x sama'n tu'n Absalón, xi kyqanin te xu'j: —¿Jatum ta' Ahimaas tuk'ix Jonatán? —Atzun ẍe ex tzalu tu'n kypon ttzi nima, chi xu'j xi ttzaq'we'n. Atzun kye xinaq e je'x jyol kye, ex tu'nju minti'x e knet kyu'n e aj meltz'aj juntl maj tu'n kypon tuj tnam Jerusalén.

²¹Kyajlenxitzun qe xinaq lu, e jatz Ahimaas tuk'ix Jonatán tuj jul, ex e je'x ojqelan tu'n kypon q'olte tqanil te rey David; ex xi kyma'n te tu'n tik' ex tu'n tik'x naj tuj nima, porke ate Ahitofel otoq b'aj consejarinte kye xjal tu'n kyok tzoqpaj kyi'j.

²²Atzunte David kyuk'ix kykyaqil xjal ate' tuk'il e ik' naj ex e ik'x tuj nima Jordán. Ya tej qsqix te juntl q'ij, kykyaqil otoq che ik'x tuj nima.

²³Tejtzun tel tnik' Ahitofel ti'j qa minti' otoq txi kyniman xjal ju tconsej otoq txi tma'n, ok tq'o'n t-siy tbur ex aj meltz'aj tja max tuj ttanmi. Tb'ajlenxitzun tma'n kye qeju ate' tuj tja alkye tu'n tb'ant kyu'n, ok tk'alo'n tqul ex jaw tyob'an tib' tu'n tkyim. Kyja'tzun tten kyim Ahitofel, ex ax ku'x maqu'n jatum otoq ku'x maqu'n qtzan tman.

²⁴Otoq pon David tuj tnam Mahanaim tej tik'x Absalón tuj nima Jordán kyuk'ix kykyaqil aj Israel.

²⁵Otoq tz'ok tq'o'n Absalón ju xjal Amasa tb'i te nejenel kye soldad te t-xel Joab. Ate Amasa tky'ajal jun xinaq aj Israel Itra tb'i, aju otoq kub' tmojb'an tib' tuk'il ju xu'j Abigail tb'i, aju tme'jel Nahas ex terman Sarvia aju ttxu' Joab.

²⁶Ate Absalón kyuk'ix qe aj Israel, atzun e kub' ten tuj tx'otx' Galaad.

²⁷Tejtzun tpon David tuj tnam Mahanaim, e etz ox xjal kanul ti'j, ex atzun qe jlu: Sobi aju tky'ajal Nahas aju aj Rabá aju ta' tuj tkwent Amón; tuk'ix Maquir aju tky'ajal Amiel aju aj Lodebar; ex tuk'ix Barzilai aju aj Rogelim aju ta' tuj tkwent Galaad.

²⁸Tzaj kyi'n qe pop te kyjaq' xjal, kyuk'ix qe palangan ex qe k'il; ax ikx tzaj kyi'n triw, sebad, arin, triw tx'ilsamaj, xkarbans, tuk'ix jun wiq chenaq' lenteja tb'i,

²⁹tuk'ix ta'l kab', manteca, kyes, ex kyuk'ix qe ẍne'l, tu'ntzun tajb'en te tchi' David ex kyuk'ix qe xjal ate' tuk'il, tu'nju kub' kyximan qa otoq che sikt ex nne'l kyk'u'j ex in txqet ti'j kyk'u'j tu'nju otoq che tzaj tuj lugar minti' kynajb'il xjal tuj.