Read kumam 2 Samuel 18 Bible Online

2 Samuel 18 - kumam bible

2 Samuel 18

¹Ik' twitz David kyi'j qe t-soldad, ex e ok tq'o'n qe nejenel kyxol junjun k'loj; at junjun k'loj soldad te jun mil kyb'et, ex at junjuntl k'loj noq te jun syent kyb'et.

²Te tib'ajxi xi t-sama'n David qe t-soldad ex te ox k'loj e e'la qe tu'n, jun k'loj e ten tjaq' tkawb'il Joab, juntl k'loj e ten tjaq' tkawb'il Abisai aju tal Sarvia ex terman Joab, ex juntl k'loj e ten tjaq' tkawb'il Itai aju aj Gat. Ex xi tma'n David kye kykyaqil soldad: —A jun qine chin xe'le kyuk'ile tuj q'oj.

³Atzun kye soldad xi kytzaq'we'n: —Mi'n, mi'n tb'inchaya ikju Tat Rey, porke mya nim t-xilen tuj kywitz aj q'oj qa ma qo el oqe kywitz ex qa ma kyim mijku qb'aje kyu'n, atzun teya Tat Rey, qa ma kyima junx ta' jlu ik tza'n qa ma kyim laj mil qeye qb'aj. Kyja'tzun mas b'a'n tu'n ax tkyaj tena tuj tnam, ex tu'n t-xi t-sama'na qeju che kyjel ten tuk'ila te onil qeye.

⁴—Ok nb'inchaye aju b'a'n tuj kywitze, chi rey xi ttzaq'we'n. Jurattzun kub' we' ttzi tlamel tnam, akux kyja' kyetz qe soldad tuj k'lojin. At junjun k'loj soldad jun mil kyb'et ex junjuntl k'loj jun syent kyb'et.

⁵Ax ikx xi tma'ntl rey te Joab ex te Abisai ex te Itai: —Tu'nju at kyk'ujlalile wi'je, mi'n kyb'inchaye jun mya b'a'n ti'j ju ku'xun Absalón. Ex o kyb'i kykyaqil soldad aju yol xi tma'n rey kye nejenel kye soldad ti'j Absalón.

⁶Kyja'tzun tten e je'x qe soldad tu'n kypon tuj kojb'il tu'n kyok tzoqpaj kyi'j qe soldad kye aj Israel. Ex atzun ok q'oj kyu'n tjaq' chk'ul tuj kytx'otx' aj Efraín,

⁷ex aqe soldad kye aj Israel kub' kyi'j kyu'n qeju otoq che ok lpe' ti'j David. Nimku xjal e naj tuj q'ij lu; e kyim 20 mil xinaq.

⁸Aju q'oj ok tuj tkyaqil part tuj lugar lu, ex mas nim xjal noq kukx e kyim tjaq' chk'ul tuj q'ij lu kywitz qeju e kub' b'yo'n tu'n spad.

⁹Tjaxtoq Absalón tib'aj jun mul, ex minab'en ok tk'ulb'an tib' kyuk'il qe t-soldad David. Ate mul kyja' okx tjaq' jun matij tze' k'ol, ex okx q'e't twi Absalón kyxol qe tq'ab' tze', ex axtzun kyaj ye', atzunte mul minti' we', txuk xi ti'n tb'e.

¹⁰At jun xjal o til jlu, ex xi' q'malte te Joab: —Ma wile lu Absalón yo'l ttxa'n tq'ab' tze' k'ol, chi xjal.

¹¹Atzunte Joab xi ttzaq'we'n: —Qa ma tila, ¿tiqu'n mi'n xku'tz tb'yo'na ma chixin? Ex mawtlo txi nq'o'ne laj saq pwaq teya tuk'ix jun k'alb'il k'u'jb'aj.

¹²Atzunte xinaq xi ttzaq'we'n: —Maske tzaj tq'o'na jun mil saq pwaq weye, ex mlay tz'ok nq'o'ne nq'ab'e ti'j tky'ajal rey; porke ma qb'iye tej saj tma'n rey teya ex te Abisai ex te Itai tu'n mi jun tu'n tok tq'o'n tq'ab' ti'j ju ku'xun Absalón.

¹³Ex noqwit ma kub' nb'yo'ne aju tky'ajal rey, jakulo chin kub' b'yo'ne tu'n, porke ate rey nne'l tnik' ti'j tkyaqil, ax ikx teya mlaylo kolina wi'je.

¹⁴—Mlay b'ant noq nnaj nq'ije tuk'ila, chi Joab. Tzaj ti'n ox lans ch'in tqan ex xi t-xayu'n ttzi tanmi Absalón tej itz'xtoq kyxol qe tq'ab' tze' k'ol.

¹⁵Aqeju laj xinaq onil te Joab jurat b'aj kytxolb'an kyib' ti'j Absalón ex kub' kyb'antzan tu'n tkyim.

¹⁶Xitzun tma'n Joab tu'n tok q'ajtza'n chun, atzun kye soldad minti'tl e je'x lpe' kyi'j qe soldad aj Israel, ex e mayet qe tu'n Joab.

¹⁷Tzajtzun kyi'n aju t-ximlal Absalón, ex ku'x kyxo'n tuj jun toy' jul matij attoq tjaq' chk'ul, ex jaw kyb'u'yin jun b'yuj ab'j ma'xix tib'aj. Te tib'ajxi jlu, kykyaqil soldad aj Israel e b'je'l oq, ex teyle junjun aj tja.

¹⁸Tej itz'xtoq Absalón, otoq jaw tb'incha'n jun bastyón kyxol kab'e tal witz tuj tchq'ajlajil ttx'otx' rey, ex otoq tz'ok tq'o'n tb'i ti'j tu'nju minti' jun tky'ajal tu'n ttzaj na'n tb'i ti'j. Kukx atx bastyón ja'lo ex ax tb'i kyu'n xjal “Bastyón te Absalón.”

¹⁹Atzunte Ahimaas aju tky'ajal Sadoc xi tma'n te Joab: —Chin kub'sale teya tu'n ttzaj tq'o'na amb'il weye tu'n nxi qelane q'malte tqanil te rey, tu'nju ma klet tu'n Qman tuj kyq'ab' qe aj q'oj ti'j.

²⁰Atzunte Joab xi ttzaq'we'n: —Mi'n txi naja q'malte tqanil b'i'x ja'lo, b'a'n t-xi'xiya tuj juntl q'ij. Ex mi'n txi'ya q'malte b'i'x ja'lo, porke aju tky'ajal rey ma kyim.

²¹Xitzun tma'n Joab te jun soldad aj Etiopía: —Txi'ya tuk'il rey ex q'manxa te ti'j ju ma tila. Atzunte aj Etiopía kub' mok'e' twitz Joab te jun techal te nimb'il, ex xi'tzun qelan q'malte te rey.

²²Atzunte Ahimaas xi tma'n juntl maj te Joab: —B'inchama xtalb'il q'ontza amb'il weye tu'n nxi' qelane ex tu'n nxi lpe'ye ti'j aj Etiopía. Atzunte Joab xi ttzaq'we'n; —Aya nky'ajal ¿tiqu'n taja tu'n t-xi'ya? Minti' jun oyaj ok tk'maya ti'j jlu.

²³—Ichaq, ex chin xel qelane, chi Ahimaas. —Chuxna t-xi qelana, chi Joab xi ttzaq'we'n te. Xitzun ojqelan Ahimaas tuj b'e nno'kx tuj chq'ajlaj, ex ik' nej twitz aj Etiopía.

²⁴Atzunte David q'uqltoq kyxol kykab'il tlamel tnam, ex aju xjal tok te xq'uqil otoq jax tuj ja tkub' tib'aj tlamel muro tok ti'jele tnam. Tej t-xi tke'yin ju xjal tok te xq'uqil o til jun xinaq kyja' ttzaj qelan tjunalx,

²⁵ex xi tq'o'n tqanil te rey tuk'il tq'ajq'ajel twi' kyuwxix. Atzunte rey tma: —Qa tjunal te tzul, b'a'n aju tqanil tzul ti'n. Tej ch'ixtoq tpon kanun ju xinaq lu,

²⁶aju xjal tok te xq'uqil tjax twi muro o til in ojqelan ttzaj juntl xinaq, ex xi tma'n teju xjal tok te xq'uqil ttzi ja: —Tzul juntl xinaq in ojqelan wen. —Ax ikx te, b'alo b'a'n jun tqanil tzul ti'n, chi rey.

²⁷Atzunju xq'uqil tjax twi muro tma: —Noq ti'j qelan ma tz'el nnik'e ti'j ju xinaq nejni, mer ik tza'n a Ahimaas aju tky'ajal Sadoc. —Aju xinaq lu mejor xjal ex b'a'nlo jun tqanil tzul ti'n, chi rey.

²⁸Pontzun laq'e' Ahimaas ex kub' ẍmeje' twitz rey tejxi tpon takl tib'aj twitz max twitz tx'otx', ex ok ten q'olb'el te ex xi tma'n: —Nimanxwit tb'i Qman Dios Tat Rey, tu'nju ma che naj tu'n aqeju xjal jaw kyi'n kyib' tu'n kyq'ojin ti'ja.

²⁹—¿B'a'npe ta' ju ku'xun Absalón? Chi rey xi tqanin. Atzunte Ahimaas xi ttzaq'we'n: —Tat Rey, ma wile ẍe jaw tilj txqan xjal tej xqo tzaj sama'ne tu'n Joab, aqine ajb'el teya tuk'ix juntl tmajena, ex minti' ma nb'iye ti ma b'aj.

³⁰Xitzun tma'n rey te: —Tkub' tena tuj jun pak', ex axtzun tena chixin. B'anttzun tu'n Ahimaas ikju ex axtzun kub' we'.

³¹Tujxtzunju or lu pon ju xjal aj Etiopía ex tma: —Aya Tat Rey k'moma jun tqanil b'a'n: Ma kleta tu'n Qman tuj kyq'ab' kykyaqil qeju ma jaw kyi'n kyib' tu'n kyq'ojin ti'ja.

³²Xitzun tqanin rey te aj Etiopía: —Yajtzun ju ku'xun Absalón, ¿b'a'npe ta'? Atzunte aj Etiopía xi ttzaq'we'n: —Aya Tat Rey, noqwit kyja'x che tenb'a qe aj q'oj ti'ja ik tza'n ju ku'xun lu, kyuk'ix kykyaqil qeju ma jaw kyi'n kyib' tu'n kyq'ojin ti'ja ex qeju in che ximan tu'n kyb'inchante mya b'a'n ti'ja.

³³Tzajtzun lu'lun rey, ex jax tuj cuart tjax tib'aj ttzi ja, ex ok ten oq'el. Tej in b'ettoq tik' in tma'n: Nk'wa'l Absalón, nk'wa'l Absalón, noqwit aqine ẍin kyim te t-xela. Ay nk'wa'l Absalón, ay nk'wa'l.