Read kumam 2 Samuel 2 Bible Online

2 Samuel 2 - kumam bible

2 Samuel 2

¹Te tib'ajxi jlu xi tqanin David te Qman ex tma: —¿B'a'npe tu'n nxi'ye tuj jun tnam kyxol qe tnam ate' tuj Judá? Atzunte Qman tzaj ttzaq'we'n: —B'a'n tu'n t-xi'ya. Atzunte David tma: —¿Jatum chin pole? Atzunte Qman tzaj ttzaq'we'ntl: —Txi'ya tuj Hebrón.

²Xi'tzun David kyuk'ix kab'e t-xu'jil: Ahinoam tb'i jun ex atzun tzajni tuj tnam Jezreel, atzun juntl Abigail tb'i, aju t-xu'jilb'en qtzan Nabal aju aj Carmel.

³Ax ikx e je'x ti'n qe tuk'il kyuk'ix qeju ate' tuj kyja, ex axtzun e ten kyuj qe tnam niqayin ate' ti'j tnam Hebrón.

⁴E pontzun qe xjal aj Judá tuk'il David ex ok kyq'o'n toklen te rey tuj Judá. Tejtzun tb'inte David otoq ku'x maqu'n Saúl kyu'n aj Jabes aju tnam at tuj tx'otx' Galaad,

⁵xi t-sama'n junjun sanjel q'malte kye: Awt Qman ky'iwlante kyeye tu'nju ma kyb'inchaye xtalb'il ti'j Saúl aju kyreye, tu'nju ma ku'x kymaqu'ne.

⁶Ex awt Qman q'onte xtalb'il kyeye ex kukx tu'n tjapun tyol kyuk'ile. Ax ikx weye ok nb'incha'ye b'a'n kyeye tu'nju ma kyb'inchaye b'a'n ti'j kyreye.

⁷Ja'lo tenx kyipune ex mi'n che xob'e, maske ma kyim Saúl aju kyreye, ex ma tz'ok q'o'n woklene kyu'n aj Judá tu'n woke te kyrey.

⁸Ex ate Abner aju tky'ajal Ner ex nejenel kye t-soldad Saúl tzaj ti'n Is-boset aju tky'ajal Saúl, ex xi ti'n tuj tnam Mahanaim,

⁹ex atzun ok tq'o'n toklen tu'n tok te rey kyuj qe tx'otx' lu: Galaad, Gesuri, Jezreel, Efraín, Benjamín ex kye kykyaqil aj Israel.

¹⁰Otoq japun Is-boset twi' 40 ab'q'i tej ttzyet tkawin kyib'aj aj Israel ex o kawin kab' ab'q'i. Atzun kye tiyjil Judá, toksa'ntoq David kyu'n te rey,

¹¹kyja'tzun tten ok David te rey kye aj Judá tuj wuq ab'q'i tuk' mey, ex aju tnam jatum o kawin, atzun Hebrón.

¹²Etztzun Abner aju tky'ajal Ner tuj tnam Mahanaim tu'n tpon tuj tnam Gabaón, nejni kywitz t-soldad Is-boset aju tky'ajal Saúl.

¹³Ax ikx te Joab aju tal Sarvia, kyuk'ix t-soldad David e etz tuj tnam Hebrón, ex atzun ok kyk'ulb'an kyib' kyuk'il, ttzi' nintz tank te chmob'l a' tuj Gabaón. Ex kykab'il k'loj soldad ax e kub' we' jatum chmo'n a', jun k'loj kub' ten tuj jun pak' ex juntl k'loj aj ten tuj juntl pak'.

¹⁴Xitzun tma'n Abner te Joab: —E kyetz junjun ku'xun tu'n kyq'ojin qwitz qkyaqil. —Ax b'a'n, chi Joab xi ttzaq'we'n.

¹⁵Kyja'tzun, aqeju tu'n kyq'ojin te kyxel aj Benjamín ex te Is-boset aju tky'ajal Saúl, e je'tz kab'laj xinaq kyxol, ex kab'laj e je'tz kyxol qe t-soldad David.

¹⁶Teyle junjun tzaj ttzyu'n aju taj q'oj ti'j ttzmal twi' ex xi kyxayu'n kyspad tuj kyxu'k aj q'oj kyi'j; kyja'tzun e kyim kykyaqil. Tu'n jlu, aju lugar at tuj Gabaón ok tb'i Kojb'il jatum ok q'oj tu'n spad.

¹⁷Kyuwxix aju q'oj ok tuj q'ij lu, ex ate Abner kyuk'ix qe soldad kye aj Israel kub' kyi'j kyu'n qe t-soldad David.

¹⁸Ex ate'toq ox tal Sarvia ma chixin: Joab, tuk'ix Abisai ex tuk'ix Asael. Ate Asael kyuwxix ojqelan wen, mer ik tza'n ojqelan jun masat tuj kojb'il,

¹⁹ok lpe' ti'j Abner ex minti' xi tq'o'n amb'il tu'n tkolpaj.

²⁰Ex tej taj tke'yin Abner ti'jxi, xi tma'n te: —¿Myapetzun aya Asael? —Ax tok aqine, chi Asael xi ttzaq'we'n.

²¹Xitzun tma'n Abner te: —Mi'n tz'ok lpe'tla wi'je. Mejor tzyuma jun kye qeju ku'xun ex q'inxa tkyaqilju q'i'n tu'n. Ex minti' kub' tuj twitz Asael tu'n mi'n tok lpe' ti'j.

²²Kyja'tzun xi tma'n Abner juntl maj te: —Mi'n tz'ok lpe'tla wi'je, ex qatzun taja tu'n tnaja wu'ne. Noq o'kx, ¿chi tok wu'ne kxel nma'ne te termaniya Joab qa ma kub'a wu'ne?

²³Tu'nju minti' kub' tuj twitz Asael tu'n tel tpa'n tib' ti'j, xitzun t-xayu'n Abner t-xe lans tuj tk'u'j, ex b'i'x elpun ttzal ti'j, ex axtzun kub' tz'aq Asael ex kyim ma chixin. Ex kykyaqil qeju e pon tuj lugar jatum otoq kyim Asael, e kub' we' ke'yilte.

²⁴Atzunte Joab tuk'ix Abisai e je'x lpe' ti'j Abner. Noq nne'xku q'ij tej kypon twi' tal witz Amma aju tkub'sa'n tumlal twitz lugar Gía, tuj ju b'e in xi' tuj tzqij tx'otx' te Gabaón.

²⁵Maxtzun ma chixin ok kychmon kyib' qe soldad tiyjil Benjamín tuk'il Abner, ex junxtzun e ela ex e kub' ten twi' jun witz.

²⁶Xitzun sch'i'n Abner ti'j Joab ex tma: —¿Jtoj b'an t-xi kykoline tu'n tkub' kyb'yo'ne qe xjal? ¿Na'nxpetzun tel tnik'a ti'j, ate jlu noq b'is in tzaj ti'n? ¿Jtoj b'an t-xi tma'na kye qe t-xjalila tu'n mi'n kyxi lpe'tl kyi'j qe kyerman?

²⁷Xitzun ttzaq'we'n Joab: —Kxel nma'ne jun yol teya axix tok twitz Dios, noqwit minti' ma tmaya jlu, mawtlo che'x lpe' qe nxjalile kyi'j qe kyerman okxi tkub' q'ij.

²⁸Xitzun tma'n Joab tu'n kyok q'ajtza'n qe chun, ex kykyaqiltzun xjal e we' ex minti' e ok lpe'tl kyi'j aj Israel tu'n kyq'ojin kyi'j.

²⁹Atzunte Abner kyuk'ix qe xinaq uk'in tu'n, o che b'et tuj enter aq'b'il tuj chq'ajlaj at tuj Arabá, ex e ik'x tuj nima Jordán ex tuj tkyaqilju tqan xaq Bitrón, ex e pon tuj tnam Mahanaim.

³⁰Minti'tl xi lpe' Joab ti'j Abner. Ok tchmo'n kykyaqil qe t-soldad, ex tejtzun tjaw list kyi'j, otoq che kyim b'elajlaj xinaq t-soldad David qe, ex part te Asael.

³¹Ex atzun qe t-soldad David otoq che kub' kyb'yo'n 360 xinaq aj Benjamín, aqeju ate'toq tuk'il Abner.

³²Atzunju t-ximlal Asael xi q'i'n tuj Belén, ex atzun ku'x maqu'n ma chixin tuj tpantyón qtzan tman. Atzunte Joab kyuk'ix qe xinaq uk'in tu'n e b'et tuj enter aq'b'il lu, ex tej tkub' q'ij otoq che pon tuj tnam Hebrón.