Read kumam 2 Samuel 21 Bible Online

2 Samuel 21 - kumam bible

2 Samuel 21

¹Tuj tq'ijlalil tej tten David tzaj jun we'yaj, ex ox ab'q'i o ten. Xitzun tqanin David te Qman, atzunte Qman tzaj ttzaq'we'n: Aju we'yaj ma tzaj tu'n tlaj aju mya b'a'n o tb'incha Saúl ex qeju at kyxilen tuk'il, ex e kub' b'yo'n aj Gabaón kyu'n.

²E tzajtzun ttxko'n David qe aj Gabaón ex o yolin kyuk'il. (Qe aj Gabaón mya aj Israel qe, noq o'kx ax jun k'loj aj Amorreo otoq che kyaj ten, ex otoq txi kytziyan aj Israel jun yol axix tok kye qa tu'n mi'n kykyim, atzunte Saúl ok tilil tu'n tu'n kykub' tb'yo'n noq tu'n kylaj aj Israel ex aj Judá.)

³Xitzun tqanin David kye: —¿Ti kb'antel wu'ne kyi'je? ¿Ti kb'antel wu'ne tu'n tb'ant ti'j ju mya b'a'n o b'inchanjtz kyi'je, tu'ntzun tkub' kyky'iwla'ne qe xjal etzan tu'n Qman?

⁴Atzun kye aj Gabaón tzaj kytzaq'we'n: —Mya pwaq qe qaj te Saúl ex kye qeju at kyxilen tuk'il, ex minti' qoklene ti'j tu'n tkyim jun aj Israel, che chi. Xitzun tma'n David kye: —Kyq'mantze weye alkye kyajb'ile tu'n nb'inchanteye kyi'je.

⁵Ex tzajtzun kytzaq'we'n: —Aju xinaq o qo naje tu'n ex o tajb'e tu'n b'i'x qkub' naje te jumajx tu'ntzun mi'n qtentle tuj kytx'otx' aj Israel,

⁶qajb'ile tu'n kytzaj q'o'n wuq tiyjil ate'x, ex che kjawiltzun qyob'ine twitz Qman tuj tnam Gabaa, jatum najltoq Saúl aju sk'o'maj tu'n Qman. Atzunte rey kub' tuj twitz tu'n t-xi tq'o'n,

⁷ex tzaj tz'e'y tk'u'j ti'j Mefi-boset aju tky'ajal Jonatán ex tal tchman Saúl, tu'nju yol axix tok otoq b'ant ti'j tu'n tuk'il Jonatán twitz Qman.

⁸E okx tpresin rey kab'e tky'ajal Saúl e tzaj ti'j ju xu'j Rizpa tb'i, aju tme'jel Aja; Armoni tb'i jun ex Mefi-boset tb'i juntl, ex kyuk'ix jwe' tal Merab aju tme'jel Saúl, ex tky'ajal Adriel qe, ate Adriel tky'ajal Barzilai aju aj Mehola,

⁹ex e je'xtzun tq'o'n kye aj Gabaón, ex jaw jatz'o'n kyqul max twi witz twitz Qman. Kyja'tzun tten junx e kyim qe wuq xjal lu tuj q'ij tej matoq in jaw chmet sebad.

¹⁰Atzunte Rizpa aju tme'jel Aja xi ti'n jun xb'alun ch'i'x twitz, kub' tq'o'n twi' jun pik ex kub' pale' tib'aj. Axtzun kyaj ten atxix tej ttzyet tu'n tjaw chmet sebad ex tejxi tk'u'l jb'al; te q'ijl minti' xi tq'o'n amb'il tu'n kypon laq'e' qe k'utz kyi'j qe kyimni, ex te qonik'an minti' xi tq'o'n amb'il tu'n kypon laq'e' qe txkup te tjaq' k'ul.

¹¹Tejtzun t-xi q'ma'n te David aju otoq tb'incha Rizpa aju juntl t-xu'jil Saúl,

¹²xi'tzun ex e tzaj ti'n qe tb'aqil Saúl ex kyuk'ix qeju te Jonatán aju tky'ajal, atzun ate' tuj kytx'otx' qe xjal najlqe tuj Jabes tuj tx'otx' Galaad. Atzun qe jlu otoq che ex elq'ante tuj plas tuj tnam Bet-sán, jatum otoq jaw kyyob'an aj Filisteo tuj q'ij tej tkub' Saúl kyu'n tuj Gilboa.

¹³Xitzun tma'n David tu'n tik' laq'b'a'n qe tb'aqil Saúl ex kyuk'ix qe te Jonatán, ex tu'n kyjaw q'i'n kyb'aqil qeju e jaw yob'an;

¹⁴ex ku'xtzun kymaqu'n qe tb'aqil Saúl ex kyuk'ix qeju te Jonatán tuj tpantyón Cis aju tman Saúl, max tuj Zela tuj kytx'otx' tiyjil Benjamín. Tkyaqil o b'ant ik tza'nx otoq tma rey. Ex tb'ajlenxi jlu tzaj tb'i'n Dios aju tna'j Dios David ti'j kytx'otx' aj Israel.

¹⁵E ul juntl maj aj Filisteo q'ojlel kyi'j aj Israel. Etztzun David kyuk'ix qe xjal at kyoklen ttxlaj tu'n kyq'ojin kyi'j. Atzunte David nim o sikt.

¹⁶Ex attoq jun nintz xjal Isbi-benob tb'i ok tilil tu'n tu'n tkub' David. Aju tlans te wuq libr tuk'il mey talil, ex toktoq jun ak'aj spad tk'u'j.

¹⁷Ex ate Abisai aju tal Sarvia xi' onil ti'j David, ok tzoqpaj ti'j aj Filisteo ex kub' tb'yo'n. Tu'ntzunju qe xinaq in che ajb'entoq te David xi kyma'n tu'n mi'n tetztl David kyuk'il tuj q'oj, tu'ntzun mi'n tyupj ju spik'un kye aj Israel.

¹⁸Te tib'ajxi ok juntl q'oj kyi'j aj Filisteo tuj lugar Gob. Ate Sibecai aju aj Husatita, kub' b'yonte Saf aju kyiyjil qe xjal ma' kywa'l.

¹⁹Ex tuj juntl q'oj ok kyi'j aj Filisteo ax tuj lugar Gob, ate Elhanán aju tky'ajal Jair aju aj Belén kub' b'yonte Goliat aju aj Gat, ex aju tlans q'i'n, ma' twa'l ex ma' tk'itz.

²⁰Tuj tnam Gat ok juntl q'oj. Attoq jun xinaq ma chixin ma'xix twa'l ex qaqchaq tal tq'ab' ti'j junjun tq'ab', ex qaqchaq tal tqan ti'j junjun tqan, 24 tu'n tkyaqilx. Ax kyiyjil qe xjal ma' kywa'l jlu,

²¹ex e ok tyo'n xjal lu qe aj Israel tu'n kyq'ojin tuk'il, ex kub' b'yo'n tu'n Jonatán aju tky'ajal Simea aju terman David.

²²Aqeju kyaje xjal ma' kywa'l lu, tiyjil Refa qe, aju aj Gat, ex e kub' b'yo'n qe tu'n David ex kyu'n qe xjal at kyoklen ttxlaj.