Read kumam 2 Samuel 5 Bible Online

2 Samuel 5 - kumam bible

2 Samuel 5

¹Te yajxitl, kykyaqil k'loj kyiyjil aj Israel e je'x tuj Hebrón tu'n kyyolin tuk'il David, ex xi kyma'n te: Ax t-xjalila qo'ye.

²Ax tok, maske atoq Saúl tok te qreye, ex aya ok te nejenel kye aj Israel tej kyex tuj q'oj. Ex ate Qman tzaj ttziyan qa aya tu'n tok te nejenel ex kawil kyib'aj aj Israel aqeju etzan tu'n, che chi aj Israel.

³Kyja'tzun tten, kykyaqil qe kytijil xjal aj Israel e je'x yolil tuk'il rey David tuj Hebrón, atzunte David b'ant ti'j jun tyol kyuk'il, ex ok kyq'o'n Qman te testiw ti'j. Oktzun kyq'o'n toklen David te rey tu'n tkawin kyib'aj.

⁴Toktoq David twi' 30 ab'q'i tej tok te rey, ex o kawin 40 ab'q'i.

⁵Wuq ab'q'i tuk' mey o ten tuj Hebrón tu'n tkawin kyib'aj aj Judá, ex 33 ab'q'i o ten tuj tnam Jerusalén tu'n tkawin kyib'aj kykyaqil aj Israel ex kyib'aj aj Judá.

⁶Ate rey David kyuk'ix qe t-soldad e je'x tuj Jerusalén q'ojlel kyi'j aj Jebuseo, aqeju najlqetoq tuj tx'otx' lu. Ex tuj kywitz aj Jebuseo qa mlay xkye' David tu'n tokx tuj tnam, ex kyma: Mlay tz'oktza tzalu, noqpe qe moẍ ex qe kox jaku che xkye' ti'ja tu'n mi'n toktza.

⁷Maske kyma ikju, pero tzyet tu'n David aju kwartel tkub'sa'n twi witz Sión, ex atzun tb'i tnam ja'lo Ttanmi David.

⁸Tej na'nxtoq ttzyet q'oj tu'n David otoq tma kyja': Kykyaqil qeju ma che'x q'ojlel kyi'j aj Jebuseo che okex tuj tb'e a' nno'kx tujxi kwartel, tu'ntzun tkub' kyb'yo'n qe moẍ ex qe kox, aqeju ik'un wu'ne, chi David. Atzun tzajni jlet ju tal twitz yol: Mi qe moẍ ex mi qe kox, mlay che okx tuj tja Dios.

⁹Xi'tzun David tuj kwartel tu'n tnajan tuj, ex ok tq'o'n tb'i ju tnam lu Ttanmi David; ax ikx jaw tb'incha'n muro tu'n tok ti'jele, xi qe' ti'j lugar otoq b'aj nojsa'n tuj tu'n tok te chq'ajlaj, ex pon b'aj max ti'j tja rey.

¹⁰Aju tipumal tkawb'il David kyja' tch'iy, ex ate Qman at tuk'il, aju Dios Tajaw Tkyaqil.

¹¹Ate Hiram aju rey kye aj Tiro e je'x t-sama'n qe t-sanjel tuk'il David, ax ikx e je'x t-sama'n qe calpinter ex qe jasol ab'j, ex xi kyi'n qe tze' wi'ten ex jaw kyb'incha'n tja David.

¹²Atzunte David el tnik' ti'j qa ate Qman kyuwsante tkawb'il kyib'aj aj Israel, ex b'a'n e'la tkawb'il tu'n Dios noq tu'nju at tk'ujlalil kyi'j aj Israel aqeju etzan tu'n.

¹³Tik'lenxi David tuj tnam Hebrón tu'n tpon tuj tnam Jerusalén, knet txqantl t-xu'jil, kyja'tzun tzaj mastl tky'ajal ex tme'jel.

¹⁴Qe tk'wa'l e itz'j tuj Jerusalén, atzun kyb'i jlu: Samúa, Sobab, Natán, Salomón,

¹⁵Ibhar, Elisúa, Nefeg, Jafía,

¹⁶Elisama, Eliada ex Elifelet.

¹⁷Tejtzun kyb'inte aj Filisteo qa otoq tz'ok q'o'n toklen David te rey kyxol aj Israel, kykyaqil e je'x jyolte David tu'n ttzyet kyu'n, ex jurat naj tb'i David, ex xi' tuj jun lugar kyuw tten tu'n tklonte tib'.

¹⁸Atzun kye aj Filisteo e pon laq'e' ex e kub' ten tuj chq'ajlaj Refaim.

¹⁹Tu'n jlu xi tqanin David te Qman: —¿B'a'npe tu'n wok tzoqpaje kyi'j aj Filisteo? ¿Jakupe che tzaj tq'o'na tuj nq'ab'e tu'n tkub' kyi'j wu'ne? Atzunte Qman tzaj ttzaq'we'n: —B'a'n tu'n tok tzoqpaja q'ojlel kyi'j, ok che xel nq'o'ne tuj tq'ab'a tu'n tkub' kyi'j tu'na.

²⁰Pontzun David tuj Baal-perazim,[1] ex atzun kub' kyi'j tu'n. Kyja'tzun tma: Ik tza'n jun a' in ch'iy wen ex tkyaqil in xi tiqan, ikxtzun ẍe tenb'a qe aj q'oj wi'je tu'n Qman tej ẍe naj. Kyja'tzun ok tq'o'n David tb'i lugar lu Baal-perazim.

²¹Atzun kye aj Filisteo kyaj kykolin qe tilb'ilal kydios tej kyel oq, atzunte David kyuk'ix qe t-soldad xi kyi'n.

²²Ex e kub' ten juntl maj aj Filisteo tuj chq'ajlaj Refaim,

²³kyja'tzun xi tqanin David te Qman alkye tu'n tb'ant tu'n. Atzunte Qman tzaj tma'n: —Mi'n tz'ok tzoqpaja q'ojlel kyi'j jatum kyja' kytzaj, noq o'kx q'ona welt tu'n tok tzoqpaja ma kyi'jxi jatum ate' qe tze' bálsamo.

²⁴Ok t-xi tb'i'na tq'ajq'ajel qamb'aj kyxol qe tze', b'i'xtzun txi naja q'ojlel kyi'j, ex atzun jun techal qa aqine chin b'el nej twitza tu'n tkub' kyi'j qe soldad aj Filisteo wu'ne.

²⁵B'anttzun tu'n David ik tza'nx otoq tzaj tma'n Qman te, ex e kub' qe aj Filisteo tu'n, tzajx qe' tuj Gabaón ex ul b'aj tuj Gezer.