Read kumam 2 Samuel 7 Bible Online

2 Samuel 7 - kumam bible

2 Samuel 7

¹Tej otoq pon b'ant rey David tuj tja, ex tej twe' q'oj ti'j tu'n Qman kyu'n qe txqantl nasyon ate' ti'jele,

²xi tma'n te Natán aju t-sanjel Dios: —Ik tza'n in tila, aqine atine tuj jun ja puro tb'anil tze' wi'ten, atzunju kax k'ub'l tley Qman atzun ta' tuj jun ja xb'alun mya tb'anil.

³Atzunte Natán tma: —B'inchama tkyaqil ik tza'nxju ma kub' t-ximana, porke a Dios tuk'ila.

⁴Tujx aq'b'il lu, o yolin Qman tuk'il Natán kyja':

⁵Txi'ya tuk'il nmajene David ex q'manxa te: Chitzun Qman teya kyja': Mya aya kjawil b'inchante jun njaye jatum tu'n ntene tuj.

⁶Atxix tuj q'ij tej kyetz wi'ne aj Israel tuj Egipto, ax ikx ja'lo, mi jun maj ma chin tene tuj jun ja tb'anil, noq o'kx ma chin b'etje'ye tuj jun ja xb'alun.

⁷Tuj tkyaqil tq'ijlalil ma chin b'ete kyuk'il aj Israel aqeju etzan wu'ne, ex ok nq'o'ne qe nejenel kyxol tu'n kykawin kyib'aj, ex mi jun maj xi nma'ne kye tu'n tjaw kyb'incha'n jun ja te k'ulb'il weye aju tb'anil tze' wi'ten.

⁸Kyja'tzun tten q'manxa te nmajene David: Aqine Dios aju Tajaw Tkyaqil in xi nma'ne te kyja': Ma tz'el wi'ne tu'n mi'n tpastorintla kyi'j qe ẍne'l tuj kojb'il, tu'n toka te nejenel kye aj Israel aqeju etzan wu'ne.

⁹Ma chin b'ete tuk'ila noq jatum ma b'eta, ax ikx ma che kub' qe aj q'oj ti'ja wu'ne, aqeju e ok tzoqpaj ti'ja, ex k'elel tqanila wu'ne tu'n kyb'inte xjal qa ma' toklena, ik tza'n qe xjal ma' kyoklen ate' tuj tkyaqil twitz tx'otx'.

¹⁰Ax ikx ma b'aj nb'incha'ne jun lugar jatum tu'n kynajan qe aj Israel aqeju etzan wu'ne, ex ax ma che kub' nq'o'ne tu'n kynajan tuj kyex kytx'otx'; mi jun klab'tel kyi'j ex mlay che yajlanjtz juntl maj kyu'n qe xjal mya b'a'n ik tza'n nej,

¹¹atxix tej kyok nq'o'ne qe nejenel tu'n kykawin kyib'aj qe xjal etzan wu'ne. Che kletele wu'ne tuj kyq'ab' qe aj q'oj kyi'je tu'ntzun kytene tuj txub'txaj. Ex kxel ntziyane teya tu'n tchmet kyb'aj qe tiyjila,

¹²ex ok tjapun b'aj tab'q'iyila tu'n tkyima, ax qine chin okel q'onte jun tky'ajala te rey ex kkyuwsetel tkawb'il wu'ne.

¹³Ex atzun jlu kjawil b'inchante jun ja te k'ulb'il weye, ex aqine chin kyuwsalte tkawb'il te jumajx.

¹⁴Aqine chin okel te tman, atzun te k'okel te nk'wa'le; ex qa at jun il ma tb'incha, ax qine chin b'el q'onte tcastiw, ex kb'ajel n-asyaline ik tza'n in kyb'incha'n kykyaqil mamb'aj kyi'j kyk'wa'l,

¹⁵ex kukx ktel nk'ujlalile ti'j, ex mlay nb'inchaye ik tza'n nb'inchaye ti'j Saúl, aju ma tz'el wi'ne toklen te rey noq tu'n toka te t-xel.

¹⁶Che okel tiyjila te rey ex kyjel ten tkawb'ila te jumajx; aqine chin klolte kye ex kukx che b'el qe' qe tiyjila tuj q'uqb'il te kawb'il te jumajx, chikuya te David, chi Dios te Natán.

¹⁷Xi ttx'olb'a'n Natán tkyaqil jlu te David cabalxix, ik tza'n o tb'i ex ik tza'nx o til.

¹⁸Okxtzun rey David yolil tuk'il Qman ex tma: Nman Dios, ¿alkye qine ex ti kyoklen qe wiyjile tu'nju ma tzaj tq'o'na woklene te rey?

¹⁹Ex mya ma' ma tz'ela jlu tuj twitza Nman Dios, ax ikx ma yolina ti'j ju kb'ajel te tib'ajxi kyi'j qe wiyjile tu'n kyok te rey. Mi jun xjal jaku pon ik tza'n teya, Nman.

²⁰¿Alkye mastl jaku txi nma'ne teya Nman Dios, porke b'a'n tu'na alkye qine, aqine tmajena?

²¹Tkyaqilju tb'inchb'ena ma'xix t-xilen ma b'ant tu'na ik tza'nx tzaj ttziyana, ex ik tza'nx tajb'ila, tu'ntzun tel nnik'e ti'j;

²²kyja'tzun Nman, ma'xix t-xilena ex mlay pon juntl ik tza'n teya, o'kx aya Dios ex minti' juntl ik tza'n ma qb'iye ti'ja.

²³Atzun kye aj Israel aqeju etzan tu'na, minti' juntl tnam ik tza'n kye, porke o'kxku jun tnam lu sk'o'maj tu'na tuj tkyaqil twitz tx'otx'. Dios, tu'na ma che tzoqpet tu'n kyok te jun tnam etzan tu'na, ex ma tz'el tqanil tu'na qa ma' kyoklen tu'nju tb'inchb'ena nim tipumal ex xob'ajilxix. Tej kyetz tkolpi'na tuj Egipto e ik' tlajo'na qe txqantl tnam kywitz kyuk'ix qe kydios;

²⁴porke ma che ok tq'o'na qe aj Israel tu'n kyok te jun tnam etzan tu'na te jumajx, ex aya Nman ma tz'oka te Kydios.

²⁵Kyja'tzun Nman Dios, kukxwit tu'n tten ju yol ma tzaj ttziyana weye, aqine tmajena, ex kye qe wiyjile che ul itz'j te tib'ajxi, ex japunx tu'na aju ma tmaya.

²⁶Kukxwit jaw nimsa'n tb'iya, ex kukxwit q'manjtz kyja': Ate Qman Tajaw Tkyaqil, atzun Kydios aj Israel. Kuchiwt mi'n che kub' yupj qe wiyjile che ul itz'j te tib'ajxi, aqine David aju tmajena, kukxwit che ten tu'na.

²⁷Aya Nman Tajaw Tkyaqil, aya Kydios aj Israel ma tzaj tma'na weye qa che okel tq'o'na qe wiyjile tu'n kyok te rey; tu'ntzun jlu maske tmajena qine, ex ma nnimari wib'e tu'n t-xi nqanine jlu teya.

²⁸Aya Nman aya Dios, ex aju tyola axix tok, ex ma tzaj ttziyana tu'n ttzaj tq'o'na nimxix t-xtalb'ila weye.

²⁹Kuchiwt b'a'n tz'ela tuj twitza tu'n tkub' tky'iwla'na qe wiyjile che okel te rey te tib'ajxi, ex kukx tu'n kyok tkwentina. Aya Qman Dios ma tzaj ttziyana, ex tu'nju tky'iwb'ila kukx che b'el ky'iwla'n qe wiyjile te jumajx, chi David.