Read kumam 1 Reyes 12 Bible Online

1 Reyes 12 - kumam bible

1 Reyes 12

¹Xi'tzun Roboam tuj Siquem, tu'nju otoq che pon kykyaqil aj Israel ma chixin tu'n tok kyq'o'n te rey.

²Maxtoq ta' Jeroboam aju tky'ajal Nabat tuj Egipto, jatum otoq pon tej tel oq twitz rey Salomón ex ax otoq kyaj ten najal. Tejtzun tb'inte Jeroboam qa otoq kyim rey Salomón, ajtz meltz'aj tuj Egipto.

³Xi txokb'aj Jeroboam kyu'n aj Israel, ex kykyaqil e je'x yolil tuk'il Roboam ex xi kyma'n te kyja':

⁴—Aju tley qtzan tmana kyuwxix kub' tq'o'n qib'aje, atzun teya mi'n kub' tq'o'na aq'untl kyuwxix qib'aje, ex q'in ela aju ley ponin ta'w wen kub' tq'o'n qtzan tmana qib'aje; qa ma txi tnimana qyole, oktzun qo ajb'ele teya, che chi.

⁵Xitzun ttzaq'we'n Roboam: —Kyxi'ye, ex b'ix che ule wuk'ile juntl maj tujxi ox q'ij, chi Roboam. E ajtzun qe xjal.

⁶Xi tqanin rey Roboam jun tumlal kye qe tij xjal, aqeju otoq che ajb'en te Salomón aju qtzan tman tej itz'xtoq, ex tma: —¿Alkye nconseje ktzajel kyq'o'ne tu'n t-xi ntzaq'we'ne kye qe xjal lu?

⁷Atzun kye tij xjal xi kyma'n te: —Qa ma taq' tib'a tu'n tajb'ena kye xjal lu, ex qa ma txi tq'o'na jun mejor tzaq'web'l kye, oktzun che ajb'el teya te jumajx.

⁸Ex ate Roboam minti' xi tniman kyconsej qe tij xjal, xi' qanil tconsej kyuk'il qe ku'xun aqeju junx e ch'iy tuk'il ex in che ajb'en te,

⁹chi kyja': —¿Alkye nconseje ktzajel kyq'o'ne tu'n t-xi ntzaq'we'ne kye xjal lu? Porke ma kyqani weye tu'n mi'n tkub' nq'o'ntle aq'untl kyuwxix kyib'aj, ik tza'n ju aq'untl kub' tq'o'n qtzan nmane.

¹⁰Atzun kye ku'xun, aqeju junx e tzaj ch'iy tuk'il, xi kytzaq'we'n: —Q'manxa kye xjal lu, aqeju ma tzaj kyqanin teya tu'n mi'ntl tkub' tq'o'na aq'untl kyuwxix kyib'aj ik tza'n kub' tq'o'n qtzan tmana, atzun teya q'manxa kye kyja': Qa kyuwxix o kawin qtzan nmane, atzun weye masxix k'ik'el wu'ne ik tza'n te;

¹¹kyuw tkawb'il qtzan nmane kub' tq'o'n kyib'aje, atzun weye k'ik'el mastl wu'ne ik tza'n te; xi tjato'n ti'j kyk'u'je tu'n asyal, atzun weye kxel njato'ne ti'j kyk'u'je tu'n tz'u'm xpaltx'imaj tokx k'uxb'il ttxa'n, chikuya kye, che chi ku'xun.

¹²Tujtzun toxin q'ij xi' juntl maj Jeroboam kyuk'ix kykyaqil tnam xjal aj Israel, tu'n kyyolin tuk'il Roboam ik tza'nx otoq tma kye.

¹³Atzunte rey xi tma'n jun yol kyuwxix kye xjal, porke minti' xi tniman aju consej otoq tzaj kyq'o'n qe tij xjal te,

¹⁴ex ax yol xi tma'n ik tza'n consej otoq tzaj kyq'o'n ku'xun te, ex chi xi tma'n kyja': Kub' q'o'n aq'untl kyuwxix kyib'aje tu'n qtzan nmane, atzun weye kb'el nq'o'ne mas kyuwxix wen; o txi jato'n kyasyale tu'n qtzan nmane, atzun weye kxel njato'ne kyasyale tu'n tz'u'm xpaltx'imaj tokx k'uxb'il ttxa'n, chi rey.

¹⁵Minti' xi tniman rey kyyol xjal tu'nju otoq b'ant ti'j tu'n Qman ikju, tu'ntzun tjapun aju yol otoq txi ttziyan te Jeroboam aju tky'ajal Nabat, tej ttzaj q'ma'n te tu'n Ahías aju aj Silo.

¹⁶Tejtzun kyke'yinte kykyaqil xjal aj Israel minti' xi niman kyyol tu'n rey, xi kyma'n te: Minti' qe qoklen ti'j tiyjil David. Minti' qe qxilen tuk'il tky'ajal Isaí. Aqeye aj Israel ku kyaje kyjaye, e tok kykwentin kyib' qe xjal at kyxilen tuk'il David, che chi xjal. Texju or lu e aj meltz'aj aj Israel kyja.

¹⁷Atzun qe aj Israel aqeju najl kyuj qe tnam ate' tuj Judá, kukx e kyaj ten tjaq' tkawb'il rey Roboam.

¹⁸Tej t-xi t-sama'n Roboam ju xjal Adoram tb'i, aju tok te nejenel ti'j aq'untl lajwers in che ok q'o'n xjal ti'j, kykyaqil aj Israel e ok ten xo'l ab'j ti'j, ex b'i'x kyim kyu'n. Jaxtzun naj rey Roboam tuj tcarwaj ex xi oq tuj Jerusalén.

¹⁹Kyja'tzun tten e je'tz aj Israel tjaq' kykawb'il qe tiyjil David, ex kukx kyten ja'lo.

²⁰Tej kyb'inte aj Israel qa otoq tzul meltz'aj Jeroboam tuj ttanmi, xi' mandar ti'j tu'n tul kyuk'il ex ok kyq'o'n te rey kye kykyaqil aj Israel. Minti' jun k'loj xjal kukx tu'n t-xi tq'o'n tib' tjaq' kykawb'il tiyjil David, noq o'kx jun k'loj, aju tiyjil Judá.

²¹Tejtzun tpon Roboam tuj Jerusalén e b'aj tchmo'n jun syent tuk'il 80 mil soldad, aqeju sk'o'maj kyxol kykyaqil tiyjil Judá ex kyxol qe tiyjil Benjamín, tu'n kyq'ojin kyi'j aj Israel, ex tu'n tkawin juntl maj Roboam kyib'aj.

²²Ex o yolin Dios tuk'il Semaías aju t-sanjel, ex xi tma'n te kyja':

²³Q'manxa te Roboam aju rey te Judá, aju tky'ajal Salomón, ex q'manxa kye kykyaqil tiyjil Judá ex kye tiyjil Benjamín ex kye txqantl xjal:

²⁴Chitzun Qman kyja': Mi'n che'xe q'ojlel kyi'j aj Israel aqeju kyermaniye. B'a'n tu'n kyaj meltz'aj kykyaqil xjal kyja, porke wu'ne ma che el npa'ne qe aj Israel kyi'je. Tejtzun kyb'inte aju yol tzaj tma'n Qman, e ajtzun meltz'aj kyja ik tza'nx otoq tma Qman kye.

²⁵Jaw tb'incha'n Jeroboam juntl maj muro ti'j tnam Siquem ex b'aj tkyuwsa'n, aju max ta' tuj tiwitz tx'otx' te Efraín, ex o najan tuj. Ax ikx jaw tb'incha'n juntl maj muro ti'j tnam Penuel ex b'aj tkyuwsa'n.

²⁶Ex kub' t-ximan Jeroboam kyja': Mya yaj jaku che kawin juntl maj qe tiyjil David kyib'aj aj Israel.

²⁷Qa kukx ma che'x xjal tuj Jerusalén q'ol chojb'il tuj tja Qman, jakulo qe' juntl maj kyk'u'j ti'j Roboam aju rey te Judá tu'n kyten juntl maj tuk'il, ex jakulo chin kub' b'yo'ne kyu'n, chi Jeroboam.

²⁸Tb'ajlenxi tqanin Jeroboam tconsej kye qe xjal, b'aj tb'incha'n kab'e tilb'ilal tal wakẍ q'an pwaq kytx'otx'il, ex xi tma'n kye tnam xjal: Aqeye aj Israel, ya mi'n che'xtle k'ulul tuj Jerusalén. Lu qe kydiose lu, aju etz q'inte kyeye tuj Egipto.

²⁹Kub'tzun tq'o'n jun tilb'ilal wakẍ tuj tnam Betel ex juntl tuj tnam Dan.

³⁰Kyu'ntzun qe tilb'ilal lu e b'inchan aj Israel il, porke in che'xtoq qe xjal tuj Betel ex max tuj Dan tu'n kyk'ulun kywitz qe tilb'ilal.

³¹Ax ikx e jaw tb'incha'n qe ja te k'ulb'il kywi' qe witz, ex e jaw t-sk'o'n qe pal kyxol txqantl xjal mya aj Leví qe.

³²Ax ikx kub' xe't jun ninq'ij tu'n ma' toklen, tuj olaj tajlal q'ij te twajxaqin xjaw, ik tza'nx jun ninq'ij in ik'set tuj Judá, ex ax Jeroboam in xi q'onte chojb'il twi altar. Atzun jlu o b'ant tu'n tuj Betel, xi tq'o'n chojb'il kye qe tilb'ilal tal wakẍ aqeju otoq che b'aj tb'incha'n, ex e ok tq'o'n qe pal tu'n kyten kyuj qe ja te k'ulb'il.

³³Kyja'tzun, tuj olaj tajlal q'ij te twajxaqin xjaw, xi tq'o'n Jeroboam chojb'il twi altar aju otoq jaw tb'incha'n tuj Betel. Atzun xjaw lu ok te ninq'ij aju tu'nx Jeroboam kub' t-ximan tu'n tb'inchet, ex xi tma'n kye aj Israel qa ma' toklen ju ninq'ij te kye, ex jax jatum ta' ju altar tu'n tkub' tpatun storak.