Read kumam 1 Reyes 15 Bible Online

1 Reyes 15 - kumam bible

1 Reyes 15

¹Tuj twajxaqlajin ab'q'i ttzyetlen tkawin rey Jeroboam aju tky'ajal Nabat, tzyet tkawin Abiam tuj Judá.

²Ox ab'q'i o kawin tuj Jerusalén. Aju ttxu' Maaca tb'i ex tme'jel Abisalom.

³Ax il tb'incha Abiam ik tza'nju il otoq tb'incha qtzan tman, ex minti' ajb'en te Qman aju Tdios tu'n tkyaqil tanmi ik tza'n te David aju qtzan t-xe'chel.

⁴Maske ikju, noq tu'nju tk'ujlalil Qman ti'j David, minti' kub' yupj tiyjil tu'n, kyja'tzun tkyimlenxi Abiam, ax jun tky'ajal ok tq'o'n te rey te t-xel, ex kyaj tkyuwsa'n ju tnam Jerusalén;

⁵porke ate David otoq b'et tuj tumelxix twitz Qman, ex tuj tkyaqil tanq'ib'l minti' el tpa'n tib' ti'j aju otoq tzaj tma'n Qman te; o'kxku jun mya b'a'n tb'incha ti'j Urías aju aj Heteo.

⁶Tej itz'xtoq Roboam, kukx ok q'oj kyxol tuk'il Jeroboam, ex tej tkyim Roboam,

⁷ax ikx ok q'oj kyxol Abiam tuk'il Jeroboam. Aju ch'intl tx'olb'ab'en ti'j Abiam ex ti'j tkyaqil aju tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey te Judá.

⁸Ex tejtzun tkyim Abiam, ku'x maqu'n tuj ju tnam Ttanmi David tb'i. Te tib'ajxi, aju o kawin te t-xel atzun Asa aju tky'ajal.

⁹Otoq b'ant winqin ab'q'i ttzyetlen tkawin Jeroboam aju rey kye aj Israel, tej ttzyet tkawin Asa tuj Judá.

¹⁰O kawin tuj Jerusalén 41 ab'q'i. Aju tya' Maaca tb'i ex tme'jel Abisalom.

¹¹Qe tb'inchb'en Asa b'a'n e ela tuj twitz Qman, ik tza'nx qe tb'inchb'en David aju qtzan t-xe'chel.

¹²E je'x tlajo'n tuj tx'otx' aqeju xinaq in che yaẍin ax tuk'il juntl xinaq, ex el ti'n kykyaqil qe tilb'ilal otoq che b'aj kyb'incha'n qe t-xe'chel.

¹³Ax ikx el ti'n toklen Maaca aju tya' ex t-xu'jil qtzan rey Roboam, tu'nju otoq txi tma'n Maaca tu'n tb'ant jun tilb'ilal xu'j dios Asera. Kub' t-xitun Asa aju tilb'ilal lu, ex kub' tpatun tuj tq'ab' xaq Cedrón.

¹⁴Maske minti' e je'l q'i'n qe ja te kyk'ulb'il xjal mya nimal Dios qe, ex kukx ajb'en Asa te Qman tu'n tkyaqil tanmi,

¹⁵ex okx tq'o'n tuj tja Qman kykyaqil q'an pwaq ex saq pwaq aju toyaj otoq txi tq'o'n te Dios, ex tuk'ixju otoq txi tq'o'n qtzan tman.

¹⁶Kukx ok q'oj kyxol Asa tuk'il Baasa aju rey kye aj Israel.

¹⁷Tej t-xi' Baasa tu'n tok tzoqpaj kyi'j qe tnam te Judá, ok tq'o'n muro ti'j tnam Ramá, tu'ntzun mi jun xjal tu'n tpon tuj tx'otx' Judá ex mi jun aj Judá tu'n tetz tuj ttanmi.

¹⁸Tzajtzun ti'n Asa tkyaqil q'an pwaq ex saq pwaq aju atxtoq tuj tja Qman ex tuj tja rey, ex xi tq'o'n kye qe xjal ma' kyoklen ate' ttxlaj, tu'n t-xi kyi'n tuk'il Ben-adad aju rey te Siria, aju tky'ajal Tabrimón ex tal tchman Hezión ex atzun najltoq Ben-adad tuj Damasco. Ax ikx xi t-sama'n jun tqanil kyja':

¹⁹E tb'ant ti'j jun qyol qkab'il ik tza'n kyb'incha qe qtzan qman. Lu ma txi nsama'ne q'an pwaq ex saq pwaq te jun oyaj teya. Q'uchin kub'a aju yol kyajni b'ant ti'j tu'na tuk'il Baasa aju rey kye aj Israel, tu'ntzun mi'n kukx tq'ojin wi'je.

²⁰Atzunte Ben-adad kub' tuj twitz aju otoq kub' t-ximan rey Asa, e je'xtzun t-sama'n qe nejenel kye qe t-soldad q'ojlel kyi'j qe tnam kye aj Israel. Kyja'tzun e tzyet qe tnam lu tu'n: Ijón, Dan, ex Abel-bet-maaca, tuk'ix tkyaqil tx'otx' Cineret ex tkyaqil tx'otx' kye aj Neftalí.

²¹Tejtzun tb'inte Baasa jlu, xi tkolin tu'n tok tq'o'n muro ti'j tnam Ramá ex aj meltz'aj tuj tnam Tirsa.

²²E txkettzun kykyaqil aj Judá tu'n rey Asa, mi jun tu'n tkyaj ten, ex xi kyi'n qe ab'j kyuk'ix qe tze', aqeju otoq che ajb'en tu'n Baasa tu'n tok tq'o'n muro ti'j tnam Ramá, ex kyu'ntzun qe ab'j ex qe tze' lu, jaw tb'incha'n rey Asa tnam Geba tuj kytx'otx' tiyjil Benjamín, tuk'ix ju tnam Mizpa.

²³Aju ch'intl tx'olb'ab'en cabalxix ti'j Asa ex ti'j tb'inchb'en ma'xix toklen, ex ti'j tkyaqilju o tb'incha ex kyi'j qe tnam e jaw tb'incha'n, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey te Judá. Tej ttijin wen, ok jun yab'il kyi'j qe tqan.

²⁴Tejtzun tkyim, ku'x maqu'n kyuk'il qtzan t-xe'chel tuj tnam Ttanmi David tb'i. Te tib'ajxi aju o kawin te t-xel, atzun Josafat aju tky'ajal.

²⁵Otoq b'ant kab' ab'q'i ttzyetlen tkawin Asa tuj Judá tej ttzyet tkawin Nadab kyxol aj Israel. Ate jlu tky'ajal Jeroboam ex noq kab' ab'q'i o kawin.

²⁶Ex mya b'a'n e ela qe tb'inchb'en tuj twitz Qman. O tb'incha ik tza'nx qe il otoq tb'incha qtzan tman, ex kyu'ntzun qe jlu e b'inchan aj Israel il.

²⁷Atzunte Baasa aju tky'ajal Ahías aju tiyjil Isacar, b'aj tchmo'n jun k'loj xjal junx kyximb'etz tuk'il tu'n kyq'ojin ti'j Nadab, ex kub' b'yo'n Nadab kyu'n tuj tnam Gibetón, aju tnam lu kye aj Filisteo. Ate Nadab kyuk'ix kykyaqil soldad aj Israel otoq b'aj kytxolb'an kyib' ti'j tnam Gibetón tu'n kyq'ojin ti'j.

²⁸Otoq b'ant ox ab'q'i ttzyetlen tkawin Asa tuj Judá tej tkub' b'yo'n Nadab tu'n Baasa, ex ax te Baasa kyaj ten kawil te t-xel Nadab kyxol aj Israel.

²⁹Ex noq o'kx tej ttzyet tkawin e kub' tb'yo'n kykyaqil qe xjal at kyxilen tuk'il Jeroboam; mi jun kyaj anq'in tu'n ik tza'nx otoq tma Qman te Ahías aju aj Silo.

³⁰B'ant ikju tu'n kylaj il e tb'incha Jeroboam, ex kyu'ntzun qe jlu e b'inchan aj Israel il, ex kyja'tzun tzaj tq'oj Qman aju Kydios aj Israel.

³¹Aju ch'intl tx'olb'ab'en ti'j Nadab ex ti'j tkyaqil aju tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

³²Kukx ok q'oj kyxol Asa tuk'il Baasa aju rey kye aj Israel.

³³Otoq b'ant ox ab'q'i ttzyetlen tkawin Asa tuj Judá tej ttzyet tkawin Baasa tuj tnam Tirsa kyib'aj kykyaqil aj Israel. Ate Baasa tky'ajal Ahías, ex o kawin 24 ab'q'i.

³⁴Ex qe tb'inchb'en mya b'a'n e ela tuj twitz Qman, ex ax qe il e tb'incha ik tza'n qeju tb'incha Jeroboam, ex tu'n jlu e b'inchan aj Israel il.