Read kumam 1 Reyes 16 Bible Online

1 Reyes 16 - kumam bible

1 Reyes 16

¹Atzunte Qman tzaj yolin te Jehú aju tky'ajal Hanani, tu'ntzun t-xi tma'n qe yol lu ti'j Baasa:

²Nej minti'toq ch'in toklena, ex ok nq'o'ne tu'n toka te nejenel kye aj Israel aqeju etzan wu'ne; atzun teya ikx ma tz'oka ik tza'n te Jeroboam; ma che b'inchan aj Israel il tu'na ex ma tzaj nq'oje tu'n tlaj o che b'inchan il.

³Kyja'tzun, aya Baasa knajela wu'ne kyuk'ix qe tiyjila; ax kb'antel wu'ne kyi'j qe tiyjila ik tza'nju o b'ant wu'ne kyi'j qe tiyjil Jeroboam aju tky'ajal Nabat.

⁴Qe tiyjila che kymel tuj tnam, che xe'l chyo'n kyu'n tx'yan; ex atzun qeju che kymel tuj kojb'il, che xe'l chyo'n kyu'n k'utz, chi Jehú.

⁵Aju ch'intl tx'olb'ab'en ti'j Baasa, ex ti'j ju tb'incha, ex ti'j ju tb'inchb'en ma'xix toklen, atzun tz'ib'an tuj u'j jatum ta' tkyaqil tx'olb'ab'en kyi'j kyb'inchb'en qe rey kye aj Israel.

⁶Tejtzun tkyim Baasa ku'x maqu'n tuj tnam Tirsa. Te tib'ajxi aju o kawin te t-xel, atzun Ela aju tky'ajal.

⁷Tzaj tma'n Qman te Jehú aju t-sanjel, aju tky'ajal Hanani, alkye t-sentens Baasa attoq tkub'il ex ju kysentens qe tiyjil, porke aqeju tb'inchb'en Baasa mya b'a'n e ela tuj twitz Qman; kyja'tzun tzaj tq'oj ti'j, ex ax qe mya b'a'n o tb'incha ik tza'n qeju o tb'incha Jeroboam ex qe tiyjil, aqeju e kub' tb'yo'n Baasa.

⁸Otoq b'ant 26 ab'q'i ttzyetlen tkawin Asa tuj Judá, tej ttzyet tkawin Ela aju tky'ajal Baasa kyib'aj qe aj Israel tuj tnam Tirsa, ex kab' ab'q'i o kawin.

⁹Ex ate Zimri, aju toksa'n te nejenel kyi'j mijku tcarwaj rey in che ajb'en tuj q'oj, ok tchmo'n jun k'loj xjal junx kyximb'etz tuk'il tu'n tjaw kyi'n kyib' ti'j Ela. At jun q'ij, tej attoq Ela tuj tnam Tirsa tuj tja Arsa aju tmayordom, ok ten k'al q'e'n tejxi tchyo'n twi'.

¹⁰Pontzun Zimri ex kub' b'yo'n Ela tu'n tu'ntzun tkawin te t-xel. B'ant jlu tej otoq b'ant 27 ab'q'i ttzyetlen tkawin Asa tuj Judá.

¹¹Noq o'kx tej ttzyet tkawin Zimri, e kub' tb'yo'n kykyaqil qe xjal at kyxilen tuk'il Baasa, ex mi jun xinaq kyaj anq'in tu'n kyxol qeju at kyxilen tuk'il Baasa, mi kyxol qe tamiw.

¹²Kyja'tzun tten e kyim kykyaqil xjal at kyxilen tuk'il Baasa tu'n Zimri, ik tza'nx ju sentens otoq tma Qman ti'j Baasa, aju otoq tma Jehú aju t-sanjel.

¹³Tu'n kylaj kykyaqil qe il tb'incha Baasa ex qe il tb'incha Ela aju tky'ajal, e b'inchan aj Israel il, e k'ulun kywitz qe tilb'ilal; kyja'tzun tzajxix tq'oj Qman kyi'j, aju Kydios aj Israel.

¹⁴Aju ch'intl tx'olb'ab'en ti'j Ela ex ti'j tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

¹⁵Tej lajo'ntoq 27 ab'q'i ttzyetlen tkawin Asa tuj Judá ttzyet tkawin Zimri tuj tnam Tirsa. Ex noq wuq q'ij o kawin, ex tujx q'ij lu otoq tz'ok kychmon kyib' qe soldad aj Israel tu'n kyok ten q'ojlel kyi'j aj Filisteo tuj tnam Gibetón.

¹⁶Tujx q'ij lu, tej ate'toq qe soldad tuj campament, o kyb'i qa otoq moje' tyol Zimri kyuk'il xjal ex otoq kub' b'yo'n rey tu'n. Kykyaqiltzun qe soldad ate' tuj campament ok kyq'o'n Omri te rey kye aj Israel, aju nejenel kye soldad.

¹⁷Kyja'tzun xi tkolin Omri kyuk'ix kykyaqil soldad aj Israel tu'n kyq'ojin ti'j tnam Gibetón, ex kub' b'e kyu'n tu'n kypon tuj tnam Tirsa ex e ok tzoqpaj ti'j.

¹⁸Tejtzun tke'yinte Zimri otoq tzyet ju tnam, okx tuj jun ja kyuw tten tuj tja rey, ok tqoptz'i'n q'aq' ti'j ja ex tuk'ix tokxtoq tuj; kyja'tzun tten kyim.

¹⁹B'ant ikju tu'n tlaj ju il b'ant tu'n, ex tu'nju tb'inchb'en mya b'a'n ela tuj twitz Qman, ex ax il tb'incha ik tza'n qeju tb'incha Jeroboam, ex tu'n jlu e b'inchan aj Israel il tu'n.

²⁰Aju ch'intl tx'olb'ab'en ti'j Zimri ex ti'j ju tb'incha ti'j rey Ela, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

²¹Kub' ten jun pab'l tib' kyxol tnam xjal, mij kyajb'iltoq tu'n a Tibni tu'n tok te kyrey, aju tky'ajal Ginat, ex mijtl kyajb'iltoq tu'n a Omri tu'n tok te kyrey.

²²Te mankb'ilxi, aqeju ate' tuk'il Tibni aju tky'ajal Ginat, kub' kyi'j kyu'n qeju ate' tuk'il Omri. Kyimtzun Tibni, ex kyja'tzun ok Omri te rey.

²³Otoq b'ant 31 ab'q'i ttzyetlen tkawin Asa aju rey te Judá, tej ttzyet tkawin Omri kyxol aj Israel, ex kab'laj ab'q'i o kawin; qaq ab'q'i o kawin tuj tnam Tirsa.

²⁴El tlaq'o'n te Semer aju witz Samaria tb'i, tu'n jun quintal tuk' 50 libr saq pwaq, ex atzun ma chixin jaw tb'incha'n jun tnam ex ok tq'o'n muro ti'j, ex ok tq'o'n tb'i Samaria, ex Semer tb'i tajwil ju witz nej.

²⁵Aqeju tb'inchb'en Omri mya b'a'n e ela tuj twitz Qman, masxix mya b'a'n o tb'incha ik tza'n qe rey e ten nej twitz,

²⁶ex ax qe il tb'incha ik tza'n qeju tb'incha Jeroboam aju tky'ajal Nabat; e b'inchan aj Israel il tu'n, ex tu'nju in che k'ulun kywitz qe tilb'ilal, tzaj tq'oj Qman kyi'j, aju Kydios aj Israel.

²⁷Aju ch'intl tx'olb'ab'en ti'j Omri ex ti'j tkyaqil aju tb'incha, ex kyi'j qe tb'inchb'en ma'xix kyoklen, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

²⁸Tejtzun tkyim, ku'x maqu'n tuj tnam Samaria. Te tib'ajxi aju o kawin te t-xel, atzun Acab aju tky'ajal.

²⁹Otoq b'ant 38 ab'q'i ttzyetlen tkawin rey Asa tuj Judá, tej ttzyet tkawin Acab aju tky'ajal Omri kyxol qe aj Israel. Ex o kawin 22 ab'q'i kyxol aj Israel tuj tnam Samaria.

³⁰Ex aju tb'inchb'en Acab mya b'a'n ela tuj twitz Qman, ex masxix mya b'a'n o tb'incha kywitz qe txqantl rey, aqeju otoq che ten nej twitz.

³¹Aju il tb'incha mya noq o'kx ik tza'n tb'incha Jeroboam aju tky'ajal Nabat, ax ikx at juntl il tb'incha mas ma'xix, tu'nju o moje' tuk'il ju xu'j Jezabel aju tme'jel Et-baal aju kyrey aj Sidón, ex atzun o k'ulun twitz Baal ex o ajb'en te,

³²ex jaw tb'incha'n jun tja Baal tuj Samaria, tuk'ix jun altar tuj.

³³Ax ikx kub' tb'incha'n jun tilb'ilal xu'j dios Asera. Tu'ntzun jlu tzaj tq'oj Qman aju Kydios aj Israel ti'j rey Acab, ex masxix nim tq'oj Qman tzaj ti'j kywitz qe txqantl rey otoq che ten nej twitz.

³⁴Tuj tq'ijlalil Acab o jaw b'incha'n juntl maj tnam Jericó tu'n jun xjal aj Betel, Hiel tb'i. Tej tkub' qe' t-simyentil tnam tu'n, b'i'x kyim Abiram aju nej tky'ajal; ex tej kyok qe tlamel tnam tu'n, b'i'x kyim mankb'il tky'ajal, Segub tb'i, ik tza'nx otoq tma Qman te Josué aju tky'ajal Nun.