Read kumam 1 Reyes 17 Bible Online

1 Reyes 17 - kumam bible

1 Reyes 17

¹Atzunte Elías aju aj Tisbe aju at tuj tx'otx' Galaad, xi tma'n te Acab: Kxel nma'ne jun yol axix tok twitz Qman aju Kydios aj Israel aju in chin ajb'ene te: Tuj kab' ox ab'q'i ja'lo mlay tzaj jb'al ex mi tq'ab' che'w, maxitzun ktzajel jb'al ok t-xi nma'ne.

²Tzaj yolin Qman tuk'il Elías ex tma kyja':

³Texa tzalu ex kyja' t-xi'ya tuj tjawitz q'ij, ewanx tib'a tuj tq'ab' xaq aju tok tb'i Querit aju tkub' jlajxi nima Jordán tuj tjawitz q'ij.

⁴Atzun kk'ala a' tuj tq'ab' xaq lu, ex o txi nma'ne kye qe joj tu'n t-xi q'a'kj twaya kyu'n.

⁵Tb'inchatzun Elías ik tza'nx o tma Qman te, xi'tzun tuj tq'ab' xaq Querit jlajxi ju nima Jordán, ex axtzun kyaj ten.

⁶Pontzun q'i'n twa ex tchi' kyu'n qe joj te prim ex te qale, ex atzun o k'an a' tuj tq'ab' xaq.

⁷Ex tej tel ch'intl q'ij, aj tzqij tq'ab' xaq porke minti' jb'al o tzaj tuj tkyaqil tx'otx' kye aj Israel.

⁸Xitzun tma'n Qman te Elías:

⁹We'ktza ex txi'ya tuj tnam Sarepta niqayin ttxlaj tnam Sidón, ex atzun tkyaj tena najal ma chixin. Ma txi nma'ne te jun meb'a xu'j najl tuj lugar ma chixin tu'n ttzaj q'o'n twaya tu'n.

¹⁰Jawtzun we' Elías ex xi' tuj tnam Sarepta. Tej tokx tuj ju tnam o til jun meb'a xu'j in q'in si'. Tzaj ttxko'n ex xi tma'n te: —B'inchama xtalb'il, q'intza ch'in a' tuj jun vas te nk'a'ye.

¹¹Kyja'toq t-xi' xu'j q'ilte tej tajtz txko'n juntl maj tu'n Elías, ex xi tma'n te: —B'inchama xtalb'il, tuk'ix jun piẍ pan q'intza.

¹²Atzunte xu'j xi ttzaq'we'n te: —Kxel nma'ne jun yol axix tok twitz Qman aju Tdiosa: misikyer pan b'animaj wu'ne. Noq o'kx jun yub' arin atx tuj jun ẍoq', ex tuk'ix ch'in chib'j aseyt atx tuj jun xar, ex atzun til in chin q'ine ch'in si', tu'n nxi'ye tzq'ajsalte te twa wale ex te weye. Kb'ajel qwa'ne jlu, ex te tib'ajxi qo kymele tu'n we'yaj, ex minti'tl atx.

¹³Atzunte Elías xi ttzaq'we'n: —Mi'n xob'a. Txi'ya b'inchalte ju ma tmaya. Ex tnejel b'inchama jun tal wab'j te weye ti'j arin ma tmaya ex q'intza weye, te tib'ajxi b'inchama juntl te teya ax ikx te tala.

¹⁴Porke ma tzaj tma'n Qman aju Kydios aj Israel kyja': Mlay kub' b'aj naj aju arin tku'x tuj ẍoq', ax ikx aju chib'j aseyt tku'x tuj xar; maxi kb'el b'aj okxi ttzaj jb'al tu'n Qman tib'aj tx'otx' lu.

¹⁵Xi'tzun ju xu'j ex tb'incha ik tza'nx otoq tma Elías. Ate xu'j kyuk'ix qeju ate' tuj tja ex tuk'ix Elías, cabal o kanun kywa te nim q'ij.

¹⁶Minti' kub' b'aj naj arin tuj ẍoq', ax ikx ju chib'j aseyt tuj xar; o japun ik tza'nx otoq tma Qman te Elías.

¹⁷Otoq tz'el q'ij, tzyet tal meb'a xu'j tu'n yab'il; kyuwxix aju yab'il ok ti'j ex o kyim.

¹⁸Xitzun tma'n ju meb'a xu'j te Elías: —Aya t-sanjel Dios, ¿ti tq'oja wi'je? ¿Mape tzula wuk'ile noq tu'n ttzaj tna'na wile ex tu'n tkyim wale?, chi xu'j.

¹⁹—Q'ontza tala tzalu wuk'ile, chi Elías xi ttzaq'we'n. Eltzun ti'n Elías aju tal k'wa'l twi tqan meb'a xu'j, ex jax ti'n tuj tcuart jatum najltoq, ex kub' tkoẍb'a'n twi twatb'il.

²⁰Jawtzun tq'ajq'ajel twi' kyuw, ex xi tma'n te Qman: Aya Nman Dios, ¿maj tuk'ix ju meb'a xu'j lu ma tzaj tq'o'na jun b'is ti'j, aju jatum in chin posadiyine, ex lu ma kyim tal tu'na?

²¹Te tib'ajxi jlu kub'tzun mutze' Elías ox maj tib'aj tal q'a, jaw tq'ajq'ajel twi' kyuw ex xi tma'n te Qman: Aya Nman Dios, in chin kub'sane twitza tu'n tul tnab'l tal q'a lu tu'na.

²²Tzajtzun ttzaq'we'n Qman aju tqanb'etz Elías, ex ul tnab'l tal q'a.

²³Jawtzun ti'n naj Elías aju tal q'a, ku'tz ti'n tuj tcuart ma twi ja, xi tq'o'n te ttxu', ex xi tma'n te: —Ke'yintza, aju tala ma tzul tnab'l.

²⁴Atzunte xu'j xi ttzaq'we'n: —Ja'lo ma tz'el nnik'e ti'j ax tok aya jun t-sanjel Dios, ex aju in tma'na ax tok a Qman in q'mante teya.