Read kumam 1 Reyes 18 Bible Online

1 Reyes 18 - kumam bible

1 Reyes 18

¹Eltzun q'ij. Tb'ajlenxi ox ab'q'i tzaj yolin Qman te Elías ex xi tma'n te: Txi'ya tuk'il Acab, porke ktzajel nsama'ne jb'al tib'aj tx'otx'.

²Xi'tzun Elías tu'n tpon twitz Acab. Aju we'yaj tuj tnam Samaria kyuwxix tponlen wen.

³Txket Abdías aju mayordom, tu'n Acab. (Ate Abdías nimanxix Qman tu'n ex in xob' twitz

⁴ex tej ttzyet kyb'yonjtz qe t-sanjel Qman tu'n Jezabel, otoq che ok tchmo'n Abdías jun syent t-sanjel Dios, ex kab'e k'loj e e'la tu'n, te mey syent junjun k'loj, ex otoq che'x tewan naj tuj kab'e toy' pik, ex k'a'chan qe tu'n.)

⁵Xitzun tma'n Acab te Abdías: —B'incham ttena, qo' tuj tkyaqil kytx'otx' aj Israel ex jatum ta' kywi' kykyaqil a', ex kyuj kykyaqil kyq'ab' xaq, qape jaku knet ch'in cha'x k'ul te kywa chej cabay ex qe mul, ex qa mi xknet, jaku che kyim ex qo kyjel ten minti' qchej.

⁶Kyja'tzun b'aj kypa'n kyib', ate Acab xi' tuj mij tx'otx' kye aj Israel, ax ikx te Abdías xi' tuj mijtl, jyolte cha'x k'ul.

⁷Tej kyja' t-xi' Abdías tuj b'e ok tk'ulb'an tib' tuk'il Elías, ex tej tel tnik' Abdías ti'j kub' ẍmeje', pon takl tib'aj twitz twitz tx'otx' ex tma: —¿Qape aya tat Elías?

⁸—Ax tok aqine. Chux txi'ya ex q'manxa te tpatrona qa atzun atine tzalu, chi Elías xi ttzaq'we'n.

⁹Atzunte Abdías xi ttzaq'we'n: —¿Alkye il ma nb'inchaye tu'nju taja tu'n nxi tq'o'na tuj tq'ab' Acab tu'n nkub' b'yo'ne tu'n?

¹⁰Kxel nma'ne jun yol axix tok twitz Qman. Kyuj kykyaqil nasyon ex kawb'il o txi joyb'aja tu'n npatrone; ex tej ttzaj q'ma'n mi a'la at ma chixin, in xi tma'n npatrone kye xjal tu'n t-xi kyma'n jun yol axix tok qa ax tok na'nxtoq tkneta kyu'n.

¹¹Atzun ja'lo in tma'na weye tu'n nxi'ye ex tu'n t-xi nma'ne te npatrone qa a ta'ya tzalu.

¹²Aju kb'ajel atzun jlu, ok tel npa'n wib'e ti'ja ja'lo, aju T-xew Qman kxel q'i'na tu'n tuj juntl lugar minti' ojtzqi'n wu'ne; ex oktzun tpon tqanil wu'ne tuk'il Acab, ktzajel jyol teya, ex qa mi a'la at, chin b'el b'yo'ne tu'n. Na'ntza, aqine kukx in chin nimane te Qman atxix tuj nku'xumale.

¹³¿Na'nxpe tb'inteya aju o b'ant wu'ne tej kykub' b'yo'n qe t-sanjel Qman tu'n Jezabel? Aqine inx ewante jun syent t-sanjel Qman, mey syent junjun k'loj e okx wewane tuj kab'e toy' pik, ex e ok nk'a'chane.

¹⁴Atzun ja'lo in tma'na tu'n nxi'ye ex tu'n t-xi nma'ne te npatrone qa a ta'ya tzalu, ex jaku chin kub' b'yo'ne tu'n, chi Abdías.

¹⁵Atzunte Elías xi ttzaq'we'n: —Kxel nma'ne jun yol axix tok twitz Qman aju Tajaw Tkyaqil aju in chin ajb'ene te, b'i'x ja'lo kxel nyek'un wib'e te Acab.

¹⁶Xi'tzun Abdías jyolte Acab tu'n t-xi tq'o'n tqanil ti'j Elías, ex xi'tzun Acab kanul ti'j Elías.

¹⁷Tejtzun tilwaj Elías tu'n Acab, xi tma'n te: —¿Apeya ma tzaj q'inte mya b'a'n kyib'aj aj Israel?

¹⁸Atzunte Elías xi ttzaq'we'n: —Mya awe qin ma chin tzaj q'inte mya b'a'n kyib'aj xjal, noq o'kx axa ex qeju at t-xilena kyuk'il, tu'nju minti' ma che japun qe tmandamyent Qman kyu'ne, ex tu'nju ma che ok tene k'ulul kywitz qe tilb'ilal Baal.

¹⁹Ja'lo, samanxa qe xjal tu'n tb'aj kychmo'n kykyaqil aj Israel twi witz Carmelo, kyuk'ix kyaje syent tuk' 50 t-sanjel Baal ex kyuk'ix kyaje syent t-sanjel xu'j dios Asera, kykyaqil qe jlu k'a'chan qe tu'n Jezabel, chi Elías.

²⁰Xitzun tma'n Acab tu'n kytzaj txket kykyaqil aj Israel, ax ikx e ok tchmo'n kykyaqil t-sanjel Baal twi witz Carmelo.

²¹Pontzun laq'e' Elías kyuk'il kykyaqil tnam xjal ex xi tma'n kye: —¿Jtoj txi kykoline tu'n tten kab'e kyximb'etze? Qa a Qman aju Dios axix tok, che lpe'ke ti'j, ex qatzun a Baal, che lpextzune ti'j. Atzun kye xjal mi jun yol xi kytzaq'we'n.

²²Kukx o yolin Elías ex tma: —Njunalxe ma chin kyaj tene aqine t-sanjel Dios, atzun kye t-sanjel Baal at kyaje syent tuk' 50 kyb'et.

²³Ja'lo kyi'ntze kab'e tor, ex e tjaw kysk'o'n jun kye, e tb'aj kypaẍu'n, ex e tkub' kyq'o'n tib'aj si', ex mi'n tz'ok kyq'o'n q'aq' ti'j. Ax ikx weye, kb'ajel nb'incha'ne aju juntl tor, kb'el nq'o'ne tib'aj si', ax ikx mi'n tz'ok nqoptz'i'ne q'aq' ti'j.

²⁴Che kub'santzune twitz kydiose, ax ikx weye chin kub'sale twitz Qman; ex alkyetzun kyxol kab'e lu ma tzaj ttzaq'we'n ex ma tzaj tq'o'n q'aq' tu'n ttz'e'y tor, atzun Diosju aju axix tok. —Ax b'a'n, che chi xjal xi kytzaq'we'n.

²⁵Xitzun tma'n Elías kye t-sanjel Baal: —Kysk'on jawe jun kyeye kytor ex kyb'inchan b'aje nej tu'nju nim kyeye kyb'aj, ex che kub'sane twitz kydiose, ex mi'n tz'ok kyqoptz'i'ne q'aq' ti'j.

²⁶Tzajtzun kyi'n aju tor otoq txi q'o'n kye, ex b'aj kyb'incha'n, ex tzyet-x kyu'n te prim tu'n kykub'san twitz Baal aju kydios, tejxi tpon chilkuq'ij. Ex in kyma'n: Qo ttzaq'we'ntza Baal, ex in che t'ikpajtoq ti'jele altar aju otoq jaw kyb'incha'n, ex mi jun tzaj tzaq'wente kye.

²⁷Tejtzun tpon chilkuq'ij ok ten Elías xmayil kyi'j, ex xi tma'n kye: —Che sch'ine kyuwxix wen ex baqa mya dios jlu. B'alo at in ximan ti'j, ex qa nim taq'un, ex qa ma txi' tuj jun tb'e. B'alo in tan ex il ti'j tu'n tjaw kyk'asune, chi Elías.

²⁸Kyja'tzun e jaw sch'in mas kyuwxix, ex e ok ten qesil kyximlal tu'n kchil ex tu'n lans tejxi tb'aj ak' kyi'j tu'n chik' ik tza'nx kycostumr.

²⁹Tb'ajlenxitzun chilkuq'ij kukxtoq kysch'in, ex kukxtoq kyt'ikpaj mer ik tza'n lok qe, tejxi tpon or ik tza'n in xi q'ot ju chojb'il te qale, ex mi a'l tzaj tzaq'wente ex mi a'l tzaj b'inte kye.

³⁰Xitzun tma'n Elías kye kykyaqil xjal: —Che laq'etze wuk'ile. E tzajtzun laq'e' kykyaqil ttxlaj, ex jawtzun tb'incha'n Elías juntl maj altar te Qman, aju otoq kub' xitj.

³¹Tzajtzun ti'n Elías kab'laj ab'j, ik tza'nx kyajlal kab'laj k'loj kyiyjil tky'ajal Jacob, aju a Qman o q'mante tu'n tok tb'i Israel,

³²ex kyu'ntzun qe ab'j lu, jaw tb'incha'n jun altar te Qman; b'aj tb'incha'n jun sanja ti'jele altar ma'yin t-xe',

³³ax ikx kub' tnak'u'n si' tib'aj altar; kub'tzun tpaẍu'n ju tor ex kub' tq'o'n tib'aj si'.

³⁴Xitzun tma'n kye xjal: —Kynojsan b'aje kyaje ẍoq' a', ex kyqo'n kub'e tib'aj wakẍ paẍumaj ex tib'aj si'. Ex xi tma'n tu'n tb'inchet tkab'majin ex toxinmajin, ex o b'ant kyu'n ikju.

³⁵El tilj a' ti'jele altar, ex b'i'x noj sanja tu'n.

³⁶Tejtzun tpon or ik tza'n in xi q'ot chojb'il te qale, ate Elías aju t-sanjel Dios tzaj laq'e' ti'j altar ex tma: Aya Nman aju Tdios Abraham, ex Tdios Isaac, ex Tdios Israel, kuchiwt tu'n tel nik'b'aj ti'ja qa aya Dios kye aj Israel, ex qa aqine tmajena, ex qa ma nb'inchaye tkyaqil jlu porke aya xq'mante tu'n tb'ant wu'ne.

³⁷Chin ttzaq'wentza Nman, chin ttzaq'wentza, tu'ntzun tel kynik' xjal ti'ja qa aya Dios ex in txokona kyi'j tu'n kyul meltz'aj juntl maj tuk'ila, chi Elías.

³⁸Tujxtzun or lu ku'tz jukpaj q'aq' te Qman ex b'aj tz'e'y ju wakẍ paẍumaj, tuk'ix si', ex kyuk'ixpe qe ab'j e b'aj tz'e'y, tuk'ix tx'otx', ex b'i'x jatz tzqij a' tku'x tuj sanja.

³⁹Tejtzun kyke'yinte kykyaqil xjal jlu, e kub' ẍmeje' ex pon takl tib'aj kywitz max twitz tx'otx' ex kyma: Ate Qman atzun Diosju, ate Qman atzun Diosju.

⁴⁰Xitzun tma'n Elías kye: —Kytzyuntze qe t-sanjel Baal, ex mi jun tu'n ttzoqpaj. E tzajtzun tzyu'n kyu'n qe xjal ex e je'xtzun ti'n Elías ma tuj tq'ab' xaq Cisón, ex atzun e kub' tb'yo'n.

⁴¹Xitzun tma'n Elías te Acab: —Txi'ya wa'l ex k'al, ex ya ch'ix tq'ajt tqan jb'al tu'n ttzaj.

⁴²Xi'tzun Acab wa'l ex k'al. Atzunte Elías jax twi witz Carmelo ex kub' ẍmeje' tejxi tkub' takl tib'aj twitz twi tch'ek,

⁴³ex xi tma'n te tmajen: —Txi'ya, ex ke'yinxa tib'aj mar. Xi'tzun ex xi tke'yin tib'aj mar, ex xi tma'n te Elías: —Minti' jun ti'xti ma wile. Xi tma'n Elías te tmajen tu'n t-xi' wuq maj ke'yilte.

⁴⁴Tujtzun twuqin maj xi tma'n majen te Elías: —Ma tib'aj mar nib'an tjaw jlet ch'in muj mer ik tza'n tuj tlaqal jun q'ab'aj. Xitzun tma'n Elías te: —Txi'ya ex q'manxa te Acab tu'n tok tk'alo'n tcarwaj kyi'j qe chej ex tu'n taj naj, na'nxtoq ttzoqpaj jb'al ex tu'ntzun mi'n tmaqet tb'e.

⁴⁵Jaxtzun Acab tuj tcarwaj ex xi' tuj tnam Jezreel. Aju twitz kya'j ya kyja'toq tok yupj tu'n muj ex tu'n kyq'iq', ex tzajtzun txqan jb'al kyuwxix wen.

⁴⁶Atzunte Elías tzaj q'o'n nimxix tipun tu'n Qman, jawtzun tlaq'b'a'n ju tqan t-ẍjo'w, xitzun qelan tu'n tpon tuj tnam Jezreel nejnitoq twitz Acab.