Read kumam 1 Reyes 19 Bible Online

1 Reyes 19 - kumam bible

1 Reyes 19

¹Ok ten Acab tx'olb'alte te Jezabel aju t-xu'jil ti'j tkyaqil aju otoq tb'incha Elías, ex tza'n tten otoq che kub' tb'yo'n kykyaqil qe t-sanjel Baal.

²Xitzun t-sama'n Jezabel jun t-sanjel q'malte ju yol lu te Elías: Na'nxtoq tpon or tloqju nchi'j, otoq kyima wu'ne, ik tza'n ma che naj qe t-sanjel Baal tu'na, ex qatzun mi xkyima wu'ne, ex atzun qine ktzajel ncastiwoye kyu'n qe ndiose, chi Jezabel.

³Tzajtzun tchi ti'j Elías, ex xi oq klol tib' tuj tnam Beerseba aju ta' tuj tx'otx' Judá, ex axtzun kyaj tq'o'n ju tmajen.

⁴Xi oqtl Elías tuj b'e in xi' tuj tzqij tx'otx', enter jun q'ij o b'et ex kub' qe' t-xe' jun wi' tal tze'. Oktzun ten na'l Dios ex tma: Akuxtzun ja'lo Nman, chin tb'yonkuya, porke mya mas b'a'n qine twitz qtzan nmane, tu'n wanq'intle twitz tx'otx'.

⁵Kub'tzun koẍe' t-xe' tal tze', ex ik' tan. Pontzun jun anjel ttxlaj, okx tyukun ex tma te: We'ktza ex wa'na.

⁶Xitzun tke'yin Elías ti'jele, ex o til jun pan tzq'ajsa'maj tuj xq'a'l tkub' niqayin ti'j twi', tuk'ix jun xar a'. Jawtzun we' Elías, o wa'n o k'an ex kub' tan juntl maj.

⁷Ul t-anjel Qman tkab'majin, okx tyukun ex xi tma'n te: We'ktza ex wa'na porke atx nim taj tu'n tb'eta.

⁸Jawtzun we' Elías, o wa'n ex o k'an. Tu'nju twa b'aj, ok nim tipun tu'n tb'et tuj 40 q'ij ex 40 qonik'an, tejxi tpon max twi witz te Dios aju Horeb tb'i.

⁹Tejtzun tpon, okx tuj jun toy' pik, ex axtzun o ten jun qonik'an. Tzajtzun yolin Qman tuk'il, ex chi kyja': ¿Ti in b'aj teya tzalu, Elías?

¹⁰Atzunte xi ttzaq'we'n: Nman Dios, aya Tajaw Tkyaqil, nimxix nganiye tu'n wajb'ene teya, atzun kye aj Israel ma tz'el kypa'n kyib' ti'j ju yol kyaj b'ant ti'j tu'na kyuk'il; ma b'aj kyq'uchin qe t-altara, ex ma che kub' kyb'yo'n qe t-sanjela tu'n spad. O'kx qine ma chin kyaj ten, ex lu in che jyon wi'je tu'n nkub' b'yo'ne kyu'n, chi Elías.

¹¹Atzunte Qman xi tma'n te: Tetza tzalu ex we'kuya nwitze twi witz. Ik'tzun Qman twitz toy' pik ex tzaj jun nintz kyq'iq' nimxix tipun wen, b'i'x e pax qe witz tu'n kyq'iq' ex b'i'x e je'x pax qe pik twitz Qman; ex mya ajuntoq Qman tuj kyq'iq'. Tej twe' kyq'iq', tzaj jun kyaqnajnab'; ax ikx mya ajuntoq Qman tuj kyaqnajnab'.

¹²Tej twe' kyaqnajnab', jaw jukpaj txqan q'aq'; ex ax mya ajuntoq Qman tuj ju q'aq' lu. Te tib'ajxi ju q'aq', o b'injtz jun tq'ajq'ajel kyq'iq' in jub'in myaxix kyuw.

¹³Tej tb'inte Elías jlu, xi tmuq'an twitz tu'n t-xb'alun, etz tuj toy' pik ex kub' we' ttzi'. Tb'itzun Elías jun tq'ajq'ajel in tma'n: ¿Ti in b'aj teya tzalu, Elías?

¹⁴Atzunte xi ttzaq'we'n: Nimxix nganiye tu'n wajb'ene teya Qman Dios, aya Tajaw Tkyaqil, atzun kye aj Israel ma tz'el kypa'n kyib' ti'j ju yol kyaj b'ant ti'j tu'na kyuk'il, ex ma b'aj kyq'uchin qe t-altara, ex ma che kub' kyb'yo'n qe t-sanjela tu'n spad. O'kx qine ma chin kyaj ten, ex lu in che jyon wi'je tu'n nkub' b'yo'ne kyu'n.

¹⁵Atzunte Qman xi tma'n te: Q'onkuya b'e, taj meltz'aja tujx ju b'e jatum saja, tu'n tpona tuj lugar tzqij tx'otx' te Damasco. Oktzun tpona k'okel tq'o'na toklen ju xjal Hazael tu'n tok te rey tuj tx'otx' Siria.

¹⁶Ax ikx q'on oka toklen Jehú aju tky'ajal Nimsi tu'n tok te rey kye aj Israel, ex atzunte Eliseo aju tky'ajal Safat aju aj Abel-mehola, q'on oka toklen te nsanjele te t-xela.

¹⁷Kyja'tzun, qa at jun ma tzoqpaj tu'n mi'n tkub' b'yo'n tu'n t-spad Hazael, a Jehú kb'el b'yonte te, ex qa at jun ma tzoqpaj tu'n mi'n tkub' b'yo'n tu'n t-spad Jehú, a Eliseo kb'el b'yonte te.

¹⁸Ex aqine chin kyjel klonte wuq mil xjal kyxol aj Israel, aqeju minti' ma che kub' ẍmeje' twitz Baal, ex minti' ma tz'el kytz'ub'an kyi'j qe tqan.

¹⁹Ik'tzun Elías tuj ju lugar lu ex knet Eliseo tu'n, aju tky'ajal Safat, in ch'okantoq. Nejni kab'laj moj wakẍ twitz Eliseo ex a in ch'okan ti'j ju mankb'il moj. Xitzun laq'e' Elías tuk'il, el ti'n t-ẍjo'w ex ok tq'o'n ti'j Eliseo.

²⁰E kyajtzun tq'o'n Eliseo qe wakẍ, xi qelan tu'n tpon kanun tuk'il Elías ex xi tma'n te: —Q'ontza amb'il weye tu'n tel ntz'ub'ane twitz nmane ex twitz ntxu'ye tu'n tb'aj nq'olb'en wib'e kyuk'il, ex chin xel lpe'ye ti'ja. —B'a'n tu'n t-xi'ya, chi Elías, minti' nno'k nmayo'na tu'n tb'inchanteya jlu.

²¹Eltzun tpa'n tib' Eliseo ti'j Elías, e kub' tb'yo'n kab'e wakẍ aju in ch'okantoq ti'j, ex ax aju tze' in ajb'en te kyyuw wakẍ tuk'ix punt ajb'en te si' tu'n ttzq'aj chib'j, ex xi tq'o'n te kychi' qe xjal. Oktzun lpe' ti'j Elías ex ok te onil te.