Read kumam 1 Reyes 2 Bible Online

1 Reyes 2 - kumam bible

1 Reyes 2

¹Tej ch'ixtoq tkyim David, xi tma'n te Salomón aju tky'ajal alkye tu'n tb'inchante, ex chi kyja':

²—Ch'ix nkyime. Ch'ix wik'e twitz tx'otx'. Kyja'tzun tenx tipuna ex tz'okxa xinaq.

³B'inchama tkyaqilju in tma'n Qman aju Tdiosa; b'inchama aju tajb'il, ex che japunx qe tley tu'na kyuk'ix qe tmandamyent ex qe t-xnaq'tzb'il, ik tza'n tz'ib'an tuj tley Moisés, tu'ntzun tel b'a'n teya tuj tkyaqilju ok tb'incha'ya, ex noq ja'xja ma txi'ya,

⁴tu'ntzun tjapun tyol Qman aju tzaj ttziyan weye, chitzun kyja': Qa ma tz'ok kykwentin kyib' qe tk'wa'la tu'n kyten b'a'n, ex qa ma che ok lpe' wi'je tu'n tkyaqil kyanmi ex tu'n tkyaqil kyk'u'j, kukxtzun che jawil nsk'o'ne qe xjal kyxol tiyjila tu'n kyok te rey kyxol aj Israel, chi Dios tzaj tma'n weye.

⁵Ja'lo, b'a'ntl tu'na aju tb'incha Joab wi'je, aju tal Sarvia, ex qa aju tb'incha kyi'j qe kab'e nejenel kye soldad kye aj Israel; ti'j Abner aju tky'ajal Ner, ex ti'j Amasa aju tky'ajal Jeter. Atzun qe jlu e kub' tb'yo'n mer ik tza'n tuj q'oj ex minti' q'oj; ok tx'itl kychk'el ti'j k'alb'il tk'u'j ex kyi'j t-xajab'.

⁶Tu'ntzun jlu b'inchama alkye b'a'n tuj twitza, ex mya tuj cheb'a tu'n tkyim Joab.

⁷Atzun qe tk'wa'l Barzilai aju aj Galaad, b'inchama xtalb'il kye, ex b'a'n tu'n kywa'n junx tuk'ila ti'j tmesa, ex atzun qe jlu e ok k'a'chan weye tej wel oqe twitz termaniya Absalón.

⁸Ax ikx q'o'nka kwent ti'j Simei aju at tuk'ila, aju tky'ajal Gera aju tiyjil Benjamín ex aj Bahurim. Atzun xjal lu nim o yasun wi'je tuj q'ij tej kyja'toq nxi'ye tuj tnam Mahanaim, ex te tib'ajxi jlu tzaj kanul wi'je ttzi nima Jordán, ex xi nma'ne jun yol axix tok twitz Qman tu'n mi'n tkub' nb'yo'ne.

⁹Mi'n kub' tnajsa'na til xjal lu. Aya jun xjal nim tnab'l ex k'elel tnik'a ti'j alkye tu'n tb'ant tu'na ti'j, ex tz'ok tililx tu'na tu'n tkub' tb'yo'na xjal lu, tu'n mi'n tkyim tuj cheb'a, chi David xi tma'n te Salomón.

¹⁰Kyimtzun David, o pon kyuk'il qtzan t-xe'chel ex ku'x maqu'n tuj tnam Ttanmi David tb'i.

¹¹O ten David te rey kyxol aj Israel 40 ab'q'i; wuq ab'q'i o ten tuj tnam Hebrón ex 33 ab'q'i tuj Jerusalén.

¹²Ok Salomón te rey te t-xel David aju qtzan tman, ex aju tkawb'il Salomón ok nim tipun.

¹³Ul Adonías aju tal Haguit tuk'il Betsabé aju ttxu' Salomón, ex xitzun tqanin Betsabé te: —¿Tqanil tzalajb'ilpe q'i'n tu'na? —Iktzunju, chi Adonías xi ttzaq'we'n.

¹⁴Ex tmatl: At jun yol kxel nma'ne teya. —Q'mantza, chi Betsabé xi ttzaq'we'n.

¹⁵—B'a'n tu'na, aju kawb'il otoq tz'ok te weye, ex kykyaqil aj Israel in che ximantoq ti'j qa aqine kyrey. Ex aju oklenb'aj lu ma tz'el q'i'n weye ex ma txi q'o'n te witz'ine, ex b'anin ti'j tu'n Qman tu'n tok te te.

¹⁶Ja'lo, o'kx waje tu'n t-xi nqanine jun xtalb'il teya. Mi'n kub' t-xk'ayina, chi Adonías xi tma'n. —Chux yolina, chi Betsabé xi ttzaq'we'n.

¹⁷Xitzun tma'n Adonías te: —In chin kub'sane twitza tu'n t-xi tqanina te rey Salomón tu'n ttzaj tq'o'n Abisag aju aj Sunem tu'n tok te nxu'jile. Mlay kub' t-xk'ayin teya.

¹⁸—B'a'n, jaku chin yoline ti'ja twitz rey, chi Betsabé xi ttzaq'we'n.

¹⁹Kyja'tzun xi' Betsabé yolil tuk'il rey Salomón ti'j Adonías. Atzunte rey jaw we' k'molte ttxu' ex kub' mok'e' twitz, ex kub' qe' juntl maj tuj tq'uqb'il, ex xi tma'n tu'n ttzaj q'i'n jun q'uqb'il tu'n tkub' qe' ttxu' tib'aj. Kub'tzun qe' ttxu' tuj tb'anq'ab',

²⁰ex xi tma'n te kyja': —At jun tal nqanb'etze teya. In chin kub'sane twitza tu'n mi'n tkub' t-xk'ayina. —Nan, qanintza weye alkye tajb'ila, mlay kub' nxk'ayine teya, chi rey xi ttzaq'we'n.

²¹—Q'ontza amb'il te Abisag aju aj Sunem tu'n tok te t-xu'jil Adonías aju ttzika, chi ttxu' o tma.

²²—¿Tiqu'n in tzaj tqanina Abisag aju aj Sunem tu'n tok te t-xu'jil Adonías? Chi rey xi ttzaq'we'n te ttxu'. Junx ta' jlu mer ik tza'n in tzaj tqanina tu'n t-xi nq'o'ne woklene te tu'n tok te rey, ex atzun ntzike jlu, ex tu'nju atzun ta' pal Abiatar tuk'il, tuk'ix Joab aju tal Sarvia.

²³Atzunte rey Salomón xi tma'n jun yol axix tok twitz Qman: Awt Dios kub' q'onte ncastiwoye kyuwxix wen qa mi'n ma kyim Adonías wu'ne ti'j ju yol ma tma.

²⁴Kxel nma'ne jun yol axix tok twitz Qman, aju ma kyuwsante weye tu'n woke te rey te t-xel David aju qtzan nmane, ex ma tma weye qa kukx tu'n kyjaw t-sk'o'n qe wiyjile che ul itz'j te tib'ajxi tu'n kyok te rey; kyja'tzun knajel Adonías b'i'x ja'lo.

²⁵Xitzun tq'o'n rey Salomón orden te Benaía, aju tky'ajal Joiada, tu'n t-xi' b'yolte Adonías; xi'tzun Benaía ex kub' b'yo'n Adonías tu'n.

²⁶Ax ikx xi tma'n rey te pal Abiatar: —Txi'ya tuj tnam Anatot jatum ta' ttx'otx'a. Maske tuk'ixa at toklena tu'n tkyima, ex mlay kub' nb'yo'na porke aya xi iqante kax k'ub'l tley Qman twitz David aju qtzan nmane, ex ax qe yajb'il ik'x tu'na ik tza'n te qtzan nmane ik'x tu'n, chi rey.

²⁷Kyja'tzun tten el q'i'n toklen Abiatar te pal te Qman tu'n Salomón, ex kyja'tzun tten o japun aju otoq tma Qman tuj tnam Silo kyi'j qe tiyjil Elí.

²⁸Tejtzun tb'inte Joab qa otoq kyim Adonías, ex tu'nju otoq tz'ok tmojb'an tib' tuk'il Adonías, maske minti' ok tmojb'an tib' tuk'il Absalón, xi oq tuj tja Qman ex ok tklon tib' ti'j altar.

²⁹Ex xi q'ma'n te rey Salomón qa otoq txi oq Joab tuj tja Qman ex otoq tz'ok tklon tib' ti'j altar. Xitzun sama'n Benaía, aju tky'ajal Joiada, tu'n Salomón, b'yolte te.

³⁰Xi'tzun Benaía tuj tja Dios ex xi tma'n te Joab: —Ma tzaj tq'o'n rey orden tu'n tetza. Atzunte Joab xi ttzaq'we'n: —Mlay chin exe. Ax chin kymele tzalu. Xi'tzun Benaía tuk'il rey q'malte aju tzaq'web'l otoq tzaj tma'n Joab te.

³¹Atzunte rey xi ttzaq'we'n: —B'inchama ik tza'n in tma'n. B'yonkuya ex maqu'n ku'xa tu'ntzun tnaj aju il tuj tja qtzan nmane, ax ikx tuj weye nja, aju tb'incha Joab tej kykub' tb'yo'n qe xjal minti' kyil.

³²Ktzajel tq'o'n Qman tcastiw tu'n tlaj il tb'incha, ex minti'toq b'in qtzan nmane ti'j tej kykub' tb'yo'n Joab tu'n spad kab'e xinaq b'a'n kymod ex mas tz'aqlxix qe twitz, ex atzun qe jlu: Abner aju tky'ajal Ner, nejenel kye soldad aj Israel, tuk'ix Amasa aju tky'ajal Jeter, nejenel kye soldad aj Judá.

³³Aju il tb'incha Joab kyi'j kab'e xjal lu, tib'ajx kb'el tz'aq ex kyib'aj qe tiyjil te jumajx. Atzunju t-xtalb'il Qman kukx ktel tuk'il David ex kyuk'il kykyaqil tiyjil, ex kyuk'il qe tiyjil che okel te rey te tib'ajxi, ex ti'j tq'uqb'il jatum o kawin.

³⁴Xi'tzun Benaía aju tky'ajal Joiada, ex kub' b'yo'n Joab tu'n. Ex ku'x maqu'n ax tuj ttx'otx' tuj lugar tzqij tx'otx'.

³⁵Oktzun q'o'n Benaía tu'n rey te nejenel kye soldad te t-xel Joab, ex aju pal Sadoc ok q'o'n tu'n te t-xel Abiatar.

³⁶Te tib'ajxi xi txokb'aj Simei tu'n rey ex xi tma'n te kyja': —B'inchan jaw jun tjaya tuj Jerusalén tu'n tnajana tuj, ex mi'n tz'exa tu'n t-xi'ya tuj juntl part,

³⁷qatzun ma tz'exa ex qa ma tzik'xa jlajxi tq'ab' xaq Cedrón, atzun q'ij knajela, ex axa at til ti'j tkamika.

³⁸Atzunte Simei xi ttzaq'we'n te rey: —B'a'n, jaku b'ant wu'ne aju ma tmaya, Tat Rey. Nim tyemp o najan Simei tuj Jerusalén.

³⁹Ex tb'ajlenxi ox ab'q'i, e ex oq kab'e tmajen ex e je'x najal tuk'il Aquis aju tky'ajal Maaca, aju toktoq te rey tuj tnam Gat. Tejtzun tpon tqanil tuk'il Simei qa otoq che pon kab'e tmajen tuj tnam Gat,

⁴⁰oktzun tq'o'n t-siy tbur ex xi'tzun jyolte kye tmajen tuj tnam Gat jatum ta'toq Aquis, ex ajtz meltz'aj Simei tuj tnam Gat kyuk'il qe tmajen.

⁴¹Ex pon tqanil tuk'il Salomón, qa otoq tz'ex Simei tuj Jerusalén tu'n t-xi' tuj tnam Gat, ex otoq tzul meltz'aj.

⁴²Xitzun txokb'aj Simei tu'n rey ex xi tma'n te: —¿Minti'petzun xi nma'ne teya jun yol axix tok twitz Qman: Noq alkye q'ij ma tz'exa tu'n t-xi'ya tuj juntl lugar, atzun q'ij tu'n tkyima? ¿Myapetzun tzaj ttzaq'we'na qa b'a'n jlu ex attoq tu'n nxi tnimana?

⁴³¿Tiqu'ntzun minti' ma japun tu'na aju yol xi ttziyana te Qman, ex minti' ma txi tnimana aju orden o txi nma'ne teya?

⁴⁴B'a'n tu'na aju mya b'a'n tb'inchaya ti'j David aju qtzan nmane. Kyja'tzun ma tb'incha Qman tu'n tkub' tz'aq tib'aja aju mya b'a'n ma b'ant tu'na.

⁴⁵Atzun weye chin b'el ky'iwla'ne, aqine rey Salomón, ex te jumajx kyjel ten aju tq'uqb'il David te kawb'il twitz Qman, chi Salomón.

⁴⁶Xitzun tq'o'n rey orden te Benaía aju tky'ajal Joiada, tu'n tkub' b'yo'n Simei tu'n. Etztzun Benaía ex kub' b'yo'n Simei tu'n. Kyja'tzun tten o kyuwset ju kawb'il tuj tkwent Salomón.