Read kumam 1 Reyes 22 Bible Online

1 Reyes 22 - kumam bible

1 Reyes 22

¹B'aj ox ab'q'i minti' q'oj ok kyxol aj Siria kyuk'il aj Israel.

²Tujtzun toxin ab'q'i xi' Josafat aju rey kye aj Judá visitaril te Acab aju rey kye aj Israel.

³Otoq txi tma'n rey Acab kye qe xjal at kyoklen ttxlaj: —B'a'n kyu'ne, aju tnam Ramot aju at tuj Galaad, qetoq jlu nej. Ja'lo ¿myapelo b'a'n tu'n tetz qkolpi'n tjaq' tkawb'il rey te Siria?

⁴Xitzun tqanin Acab te Josafat: —¿Jakupe txi'ya wuk'ile tu'n qok tzoqpaj ti'j tnam Ramot aju at tuj Galaad? Atzunte Josafat xi ttzaq'we'n: —Aqine kyuk'ix qe nsoldadiye ex qe ncheje, lu qo'ye lu te onil teya ex te onil kye t-xjalila.

⁵Ex na'nxtoq tb'ant jlu qu'n, qaninxa te Qman qa jaku qo kamb'an, chi Josafat.

⁶E oktzun tchmo'n rey Acab qe xjal otoq tz'ok kyq'on kyib' ik tza'n t-sanjel Dios, ch'ixmi kyaje syent kyb'et, ex xi tqanin kye: —¿B'a'npe tu'n wok tzoqpaje ti'j tnam Ramot aju at tuj Galaad, ex qa mya b'a'n? Atzun kye xi kytzaq'we'n: —Tok tzoqpaja ti'j, ok che tzajel tq'o'n Qman qe xjal tuj tq'ab'a tu'n tkub' kyi'j tu'na.

⁷Atzunte Josafat xi tqanin te Acab: —¿Minti'pe juntl xjal at tzalu axix tok t-sanjel Dios, tu'n t-xi qqanin te?

⁸Atzunte rey Acab xi ttzaq'we'n: —Atx juntl xjal b'a'n tu'n t-xi qqanin te alkye tajb'il Qman, atzun Micaías aju tky'ajal Imla, ex ik'un jlu wu'ne porke minti' in tzaj tma'n jun yol b'a'n weye, noq o'kx jun yol mya b'a'n in tzaj tma'n. Atzunte Josafat xi tma'n te: —Mi'n tmaya ikju.

⁹Tzajtzun ttxko'n rey Acab jun xjal at toklen ttxlaj ex xi tma'n te: —Txka'tza Micaías aju tky'ajal Imla, tu'n tul naj wuk'ile.

¹⁰Tza'nxix te Acab aju rey kye aj Israel, ax ikx te Josafat aju rey te Judá, toksa'ntoq t-xb'alun rey kyi'j, ex q'uqlqe'toq tuj kyq'uqb'il tuj plas niqayin ttzi tlamel tnam Samaria; ex kykyaqil xjal otoq tz'ok kyq'on kyib' ik tza'n t-sanjel Dios in kychik'b'a'ntoq aju nnu'l tuj kynab'l kywitz qe kab'e rey lu.

¹¹Atzunte Sedequías aju tky'ajal Quenaana otoq che b'aj tb'incha'n junjun k'uxb'il mer ik tza'n tkach wakẍ, ex in jawtoq tq'ajq'ajel twi' kyja': Chitzun Qman ma tma: Atzun qe kach lu che ajb'el tu'na tu'n tb'aj t-ẍu'yina qe aj Siria okxi kyb'aj naj tu'na.

¹²Kykyaqil qeju otoq tz'ok kyq'o'n kyib' ik tza'n t-sanjel Dios ax yol in kyma'n: Tok tzoqpaja ti'j tnam Ramot aju at tuj Galaad, ex kb'el ti'j tu'na, porke ate Qman ktzajel q'onte tnam lu tuj tq'ab'a, che chi xi kyma'n te rey.

¹³Atzunte sanjel otoq txi sama'n txkolte Micaías xi tma'n te: —Kykyaqil txqantl t-sanjel Dios ma kyma jun tzaq'web'l b'a'n te rey. Kyja'tzun in chin kub'sane twitza tu'n t-xi tma'na jun yol b'a'n, ik tza'nx ma kyma kykyaqil.

¹⁴Atzunte Micaías xi ttzaq'we'n te: —Kxel nma'ne jun yol axix tok twitz Qman; o'kx kxel nma'ne aju yol ktzajel tma'n Qman weye.

¹⁵Pontzun Micaías twitz rey ex xi tqanin rey te: —Aya Micaías, ¿b'a'npe tu'n qok tzoqpaje ti'j tnam Ramot ex qa mi'n? Atzunte Micaías xi ttzaq'we'n: —Tok tzoqpaja ti'j ex kb'el kyi'j xjal tu'na, porke tu'n Qman che tzajel tq'o'n tuj tq'ab'a.

¹⁶Atzunte rey xi ttzaq'we'n: —¿Jte' maj kxel nma'ne teya tu'n ttzaj tma'na weye jun yol axix tok twitz Qman?

¹⁷Atzunte Micaías xi ttzaq'we'n: Ma che wile kykyaqil aj Israel kysputun kyib' kyxol qe witz mer ik tza'n ẍne'l minti' pastor kyi'j. Ex chi Qman ma tma: Minti' kye jlu kyajwil; teyle junjun b'a'n tu'n taj tja tuj txub'txaj.

¹⁸Xitzun tma'n rey Acab te Josafat: —¿Baqa minti' ma txi nma'ne teya ti'j xinaq lu, minti' in tzaj tma'n jun yol b'a'n weye, o'kx mya b'a'n in tzaj tma'n?

¹⁹Atzunte Micaías xi tma'ntl: —B'intza aju ma tma Qman: Ma wile Qman q'uql tuj tq'uqb'il, kyuk'ix kykyaqil qeju ate' tuj kya'j nim kyajlal wa'l qe junx tuk'il tuj tb'anq'ab' ex tuj tnayaj.

²⁰Ex chi Qman xi tqanin kye: ¿Alkye kxel to'yilte Acab tu'n tok tzoqpaj ti'j tnam Ramot aju at tuj Galaad, ex ax tu'n tkyim ma chixin? At junjun in tzaj kyma'n jun tumel, atzun junjuntl in tzaj kyma'n juntl tumel.

²¹Ex minab'en pon jun xewb'aj ex xi tma'n te Qman qa a tu'n t-xi' to'yil te Acab. Atzunte Qman xi tqanin te: —¿Tza'n ktelb'a tu'na?

²²Xi ttzaq'we'n ju xewb'aj: Chin xe'le ex chin yolile nik'aj yol tuj kytzi' kykyaqil qe xjal nno'k kyq'on kyib' te t-sanjel Dios ate' tuk'il Acab. Atzunte Qman xi tma'n: Kb'el ti'j tnab'l tu'na. Txi'ya ex b'inchama ikju, chi Qman te xewb'aj.

²³Atzun ja'lo, ma tzaj tq'o'n Qman jun xewb'aj nik'al yol tu'n tyolin tuj kytzi' kykyaqil qeju nno'k kyq'on kyib' te t-sanjel Dios ate' tuk'ila, ex ma tma Qman tu'n tnaja.

²⁴Pontzun laq'e' Sedequías aju tky'ajal Quenaana ttxlaj Micaías, ok ttz'ajin jun twitz Micaías ex tma: —¿Baqa ma tz'el tpa'n tib' T-xew Qman wi'je, ex a tu'n tyolin tuk'ila?

²⁵Atzunte Micaías xi ttzaq'we'n: —K'elel tnik'a ti'j tuj q'ij ok t-xi'ya ewal tib'a tujile kyja xjal.

²⁶Xitzun tma'n Acab kye aj sanjelal: —Kytzyuntze Micaías ex kyi'nxe twitz Amón aju gobernador te tnam, ex twitz Joás aju nky'ajale, tu'n tokx tuj pres.

²⁷Kymanxe kye qa aqine ma chin q'mante tu'n tokx tuj pres, ex mya nim twa ex tk'a' tu'n t-xi q'o'n maxi ok wul meltz'aje tuj txub'txaj.

²⁸Atzunte Micaías xi tma'n: —Qatzun b'a'n ma tzul meltz'aja tuj q'oj, ex aju yol ma txi nma'ne kyeye myatzun a Qman ma q'mante te. Kyb'intze aju yol lu, aqeye tnam xjal, chi Micaías.

²⁹Kyja'tzun, ate Acab aju rey kye aj Israel, tuk'ix Josafat aju rey kye aj Judá, e pon q'ojlel ti'j tnam Ramot aju at tuj Galaad.

³⁰Atzunte rey Acab xi tma'n te Josafat: —K'elel nch'expu'nwe nxb'alun tu'n mi'n tel nik'b'aj wi'je ok nq'ojine, atzun teya, b'a'n tu'n tok tq'o'na t-xb'aluna aju in ajb'en teya ok in kawina. Eltzun tch'expu'n Acab t-xb'alun tu'n mi'n tel nik'b'aj ti'j, ex tzyettzun q'oj kyu'n.

³¹Ex otoq txi tma'n rey te Siria kye 32 capitán kye tcarwaj aqeju in che ajb'en tuj q'oj, o'kx tu'n kyq'ojin ti'j rey kye aj Israel ex mya ti'j junxitl.

³²Tejtzun tilwaj Josafat kyu'n qe capitán, aqeju ate'kx tuj carwaj in che ajb'en tuj q'oj, kub' kyximan qa atzun rey kye aj Israel jlu, ex b'aj kytxolb'an kyib' ti'j tu'n kyok tzoqpaj ti'j. Atzunte Josafat jaw sch'in ex ok ten qanil onb'il.

³³Eltzun kynik' capitán ti'j qa mya a rey kye aj Israel jlu, ex ya minti'tl e ok lpe' ti'j tu'n tkub' kyu'n.

³⁴Ex at jun soldad aj Siria noq elaj xi t-xo'n jun plech ex tk'ulb'aku a Acab a'w tu'n, atzun xi' plech jatum okni moje' chikyet k'uxb'il tok ti'j. Xitzun tma'n Acab teju yukul tcarwaj: —Chux q'on welt carwaj tu'na, ex chin ti'n exe tzalu tuj q'oj porke nim weye ma tza'w.

³⁵Kyuwxix q'oj ok tuj q'ij lu, atzunju rey otoq tza'w ax kub' walb'a'n tuj tcarwaj kywitz aj Siria. Ex tej tok qax kyimtzun, ex aju chik' tuj ẍil o b'eqin tel tuj carwaj.

³⁶Tej ch'ixtoq tex q'ij xi sama'n jun tqanil kyxol kykyaqil soldad aj Israel chi in tma'n kyja': Teyle junjun ku taj tuj ttanmi, ex teyle junjun ku taj tuj ttx'otx' jatum tzajni,

³⁷Kyja'tzun kyim rey Acab, ex xi q'i'n t-ximlal tuj Samaria ex atzun ku'x maqu'n.

³⁸Te tib'ajxi xi q'i'n ju carwaj tu'n tb'aj tx'jet jatum ta' ju nintz pil tuj Samaria, jatum in che chin qe xu'j jawni kywitz kyuk'il xinaq. Atzun qe tx'yan e b'aj leq'ante tchk'el Acab, ik tza'nx otoq tma Qman.

³⁹Aju ch'intl tx'olb'ab'en ti'j Acab ex ti'j tkyaqil aju o b'ant tu'n, ex ti'j marfil lo'tzin twitz tja te tujxi, ex kyi'j qe tnam e jaw tb'incha'n, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

⁴⁰Tej tkyim Acab, a Ocozías aju tky'ajal kyaj ten te rey te t-xel.

⁴¹Otoq b'ant kyaje ab'q'i ttzyetlen tkawin Acab kyxol aj Israel tej ttzyet tkawin Josafat aju tky'ajal Asa tuj Judá.

⁴²Otoq japun Josafat twi' 35 ab'q'i tej ttzyet tkawin ex o kawin 25 ab'q'i tuj Jerusalén. Aju ttxu' Azuba tb'i ex tme'jel Silhi.

⁴³Tuj tumelxix o b'et Josafat tuj tkyaqil ik tza'n te Asa aju qtzan tman. Tz'aqlxix e ela qe tb'inchb'en tuj twitz Qman. Maske ikju, ex minti' e b'aj tq'u'chin qe lugar kywi witz jatum in xi kyq'o'n tnam xjal qe chojb'il, ex jatum in kub' kypatun storak.

⁴⁴Minti' o ten q'oj kyxol Josafat kyuk'il qe rey kye aj Israel.

⁴⁵Aju ch'intl tx'olb'ab'en ti'j Josafat ex kyi'j qe tb'inchb'en ma'xix kyxilen, ex kyi'j qe q'oj e ok tu'n, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Judá.

⁴⁶E ex tlajo'n Josafat qe xjal tuj kytanmi aj Judá, aqeju in che yaẍin tuk'il juntl xinaq ex a jlu in kyb'incha'n te jun k'ulb'il kywitz qe tilb'ilal; aqeju xjal lu otoq che kyaj anq'in tuj tq'ijlalil tej tten Asa aju qtzan tman.

⁴⁷(Tuj Edom minti'toq rey at, noq o'kx jun gobernador toksa'n.)

⁴⁸Ax ikx e b'aj tb'incha'n Josafat qe barc ik tza'n kye aj Tarsis, tu'n t-xi q'ib'aj q'an pwaq tuj tx'otx' Ofir; ex minti' e je'x ex e b'aj pax qe barc tu'n tipun a' tuj tnam Ezión-geber.

⁴⁹Xi tma'n Ocozías aju tky'ajal Acab te Josafat, tu'n ttzaj tq'o'n amb'il kye qeju yukul tbarc tu'n kyxi' kyuk'il qe te yukul tbarc, ex minti' xi tq'o'n Josafat amb'il tu'n kyxi'.

⁵⁰Kyimtzun Josafat ex ax ku'x maqu'n tuj tnam Ttanmi David tb'i, aju qtzan t-xe'chel. Te tib'ajxi aju o kawin te t-xel, atzun Joram aju tky'ajal.

⁵¹Otoq b'ant wuqlaj ab'q'i ttzyetlen tkawin Josafat tuj Judá, tej ttzyet tkawin Ocozías aju tky'ajal Acab kyib'aj aj Israel tuj Samaria, ex kab' ab'q'i o kawin.

⁵²Ex aju tb'inchb'en Ocozías mya b'a'n ela tuj twitz Qman, ex ax xi lpe' ti'j tb'inchb'en qtzan tman ex ttxu', ex ti'j tb'inchb'en Jeroboam aju tky'ajal Nabat, aju e b'inchan aj Israel il tu'n.

⁵³O k'ulun twitz Baal ex ajb'en te ik tza'n otoq tb'incha qtzan tman, ex tu'n jlu tzaj tq'oj Qman ti'j, aju Kydios aj Israel.