Read kumam 1 Reyes 3 Bible Online

1 Reyes 3 - kumam bible

1 Reyes 3

¹Moje' tyol Salomón tuk'il Faraón aju rey te Egipto, tu'nju jaw moje' tuk'il tme'jel Faraón, ex xi ti'n Salomón txin lu tuj tnam Ttanmi David tb'i, akux in b'inchet tja rey tuk'ix tja Qman, ex tuk'ix muro tu'n tok ti'jele tnam Jerusalén.

²Qe xjal in xi kyq'o'ntoq chojb'il kywi' qe witz jatum in che kub' ten k'ulul te Dios, porke tuj tq'ijlalil lu na'nxtoq tjaw b'incha'n tja Dios te k'ulb'il te.

³At-xix tk'u'j Salomón ti'j Qman, ex in che japun tley tu'n, ik tza'n kyaj tma'n David te, aju qtzan tman, ex o'kx ch'in, in xi ajtoq Salomón q'olte chojb'il kywi' qe witz, ex in kub'toq tpatun storak ma chixin.

⁴Ax ikx in xi ajtoq Salomón q'olte chojb'il twi witz Gabaón jatum in che k'ulun xjal, porke aju lugar lu ma' toklen kywitz txqantl, ex kub' tpatun jun mil alumaj te oyaj te Dios tuj lugar lu.

⁵At jun qonik'an kub' tyek'un tib' Qman twitz Salomón tuj witzik' twi witz Gabaón, ex tzaj tma'n Qman te kyja': Qanintza weye alkye taja, jaku txi nq'o'ne teya.

⁶Atzunte Salomón xi ttzaq'we'n: O tb'inchaya nim xtalb'il te qtzan nmane David aju tmajena, porke ate David okslalxix ti'ja ex tz'aqlxix ex o b'et tuj tumelxix twitza. Kyja'tzun o tb'inchaya nimxix xtalb'il te, ex ma tzaj tq'o'na amb'il tu'n tok jun tky'ajal te rey te t-xel, ik tza'n ma b'ant ja'lo.

⁷Aya Nman Dios, ma chin ok tq'o'na te rey te t-xel David aju qtzan nmane, maske ma ku'xunx qine ex na'nx tel nnik'e ti'j alkye tu'n nb'inchanteye.

⁸Ex ma chin kub' tene kywitz qe xjal etzan tu'na, aqeju ma che jaw t-sk'o'na; jun tnam ma'xix wen, ex tu'nju nimxix xjal, mlay b'ant kyajlanjtz ex mlay tz'el nik'b'aj kyi'j jte' kyb'et.

⁹Q'ontza nnab'le tu'n tb'ant nkawine kyib'aj qe xjal etzan tu'na, ex tu'n tel nnik'e ti'j alkye b'a'n ex alkye mya b'a'n; ex ¿alkye jun jaku b'ant tkawin kyib'aj qe xjal etzan tu'na, nimxix kyb'et? Chi Salomón.

¹⁰B'a'n e'la tuj twitz Qman aju tqanb'etz Salomón,

¹¹ex tzaj tma'n te: Tu'nju ma tzaj tqanina jlu weye, ex minti' ma tzaj tqanina tu'n t-xi laq'e' tuj tanq'ib'la, ex qa tu'n tten tq'inumab'la, ex qa tu'n kykyim qe aj q'oj ti'ja, noq o'kx ma tzaj tqanina tnab'la tu'n tb'inchanteya ti'j kyxtis xjal, ex tu'n tb'ant tkawina tuj tumelxix;

¹²ja'lo kxel nq'o'ne teya aju ma tzaj tqanina weye. Kxel nq'o'ne tnab'la ex tojtzqib'la; mi a'l juntl o ten tnab'l ojtxi ex mi a'l juntl kxel q'ot tnab'l te tib'ajxi ik tza'n teya.

¹³Ex mya noq o'kx jlu, ax ikx kxel nq'o'ne teya aju minti' ma tzaj tqanina, kxel nq'o'ne tq'inumab'la tuk'ix tajwalila, tu'ntzun mi a'l juntl rey kpol ik tza'n teya tuj tkyaqil tanq'ib'la.

¹⁴Qa ma tb'inchaya aju wajb'ile, ex qa ma che japun qe nleye tu'na ex qe nmandamyente, ik tza'n o japun tu'n David aju qtzan tmana, kxel nlaq'b'a'ne tuj tanq'ib'la, chi Dios te Salomón.

¹⁵Tejtzun tel twatl Salomón, eltzun tnik' ti'j qa noq jun witzik' jlu. Ex tej tpon tuj Jerusalén, xi' jatum ta' ju kax k'ub'l tley Dios, ex e kub' tpatun qe alumaj te jun oyaj te Qman, kyuk'ix qe chojb'il te mojb'ab'l tib'il. Te tib'ajxi, tb'incha jun nintz wa'n kye kykyaqil aj sanjelal at kyoklen ttxlaj.

¹⁶Tuj tq'ijlalil lu e pon kab'e xu'j tuk'il rey; jawni kywitz xu'j lu kyuk'il xinaq.

¹⁷Tejtzun kyokx xtisil twitz, tma jun: —Tat Rey, aju xu'j lu ex aqine junx ja ato'kxe tuj, ex tej tul itz'j jun wale, aju xu'j lu ax ta' wuk'ile.

¹⁸Tuj toxin q'ij tul-len itz'j weye wal, ax ikx te xu'j lu ul itz'j tal. O'kx qkab'ix qeye ato'ye tuj qjaye; minti' juntl xjal at quk'ile.

¹⁹Ex at jun qonik'an o kyim tal ju xu'j lu, ex tjaq'x o kyaj tal.

²⁰Jawtzun we' tmij aq'b'il, atzun weye in chin tantoqe, el ti'n ju wale ntxlaje, ex kub' koẍe' tuk'il, ex pontzun tq'a'kj ntxlaje aju te tal otoq kyim.

²¹Tejtzun tkub' q'ij in jaw we'ye tu'n t-xi nq'o'ne tch'u' wale, ex tej tok nke'yine, otoq kyim. Okxixtzun nq'o'ne kwent ti'j tuj t-spik'umal tqan q'ij, ex el nnik'e ti'j mya a wale aju otoq tzaj waline, chi xu'j.

²²Atzun juntl xu'j tma: —Mi'n, axwe wal aju itz'x, ex aju teya tal a aju ma kyim. Ex xi ttzaq'we'n ju xu'j otoq yolin nej: —Mi'n, aju teya tal a aju ma kyim, ex atzun weye wal, atzun aju itz'x. Atzun o kyb'incha twitz rey, in che wuljtoq tuk'il kyyol.

²³Atzunte rey xi tma'n: Chi jun xu'j, awe wal aju itz'x, ex aju kyimni atzun teya; ax ikx tyol juntl xu'j: Mi'n, aju teya tal a aju ma kyim ex atzun weye wal, atzun aju itz'x.

²⁴Xitzun tma'n rey kyja': —Kyi'ntze jun spad tzalu. Tejtzun tpon q'i'n spad tuk'il,

²⁵xi tma'n: —Kytx'emin kub'e tmij tal ne' itz'x, ex kyq'onxe jun piẍ te jun xu'j, ex juntl piẍ te juntl xu'j.

²⁶Atzunte ttxu' tal ne' itz'x tzaj nimxix tb'is ti'j tal, ex xi tma'n te rey: —Tat Rey, b'inchama xtalb'il tu'n mi'n tkub' tb'yo'na tal ne' itz'. Mejor q'onxa tal ne' teju xu'j lu. Atzunte juntl xu'j tma: —Mi'n tzaj q'o'n tal ne' te teya, ex mi te weye. E tkub' tx'emin tmij tal ne'.

²⁷Atzunte rey xi tma'n: —Kyq'onxe tal ne' itz'x teju xu'j xyolin nej. Mi'n kub' kyb'yo'ne, porke aju xu'j lu atzun mera ttxu' tal ne'.

²⁸Kykyaqil aj Israel o kyb'i tej tb'ant ti'j kyxtis kab'e xu'j lu tu'n rey Salomón; kyja'tzun o che lab'in ti'j tu'nju el kynik' ti'j, a Dios otoq tzaj q'onte tnab'l tu'n tkawin tuj tumelxix.