Read kumam 1 Reyes 5 Bible Online

1 Reyes 5 - kumam bible

1 Reyes 5

¹Tej tb'inte Hiram aju rey tuj tnam Tiro, qa otoq tz'ok q'o'n toklen Salomón te rey te t-xel David aju qtzan tman, xi t-sama'n qe xjal at kyoklen ttxlaj yolil tuk'il Salomón, porke ate Hiram puro tamiwtoq tib' tuk'il David.

²Xitzun t-sama'n Salomón qe t-sanjel yolil tuk'il rey Hiram tu'n t-xi kyma'n te kyja':

³—B'a'ntl tu'na, minti' ten amb'il ti'j David aju qtzan nmane tu'n tjaw tb'incha'n jun tja Qman aju Tdios, tu'n tlaj q'oj ok tu'n, ex maxi twe' jlu tejxi kytzaj q'o'n qe aj q'oj ti'j tuj tq'ab' tu'n Qman.

⁴Atzun ja'lo tuj tzalajb'il ato'ye tu'n Qman aju Ndiose tuj tkyaqil lugar. Ja'lo minti' aj q'oj qi'je ex minti' jun ti'xti mya b'a'n in tzaj qi'je.

⁵Kyja'tzun ma kub' nximane tu'n tjaw nb'incha'ne jun tja Qman aju Ndiose, ik tza'n o tzaj tma'n te David aju qtzan nmane tej tmante kyja': Aju tky'ajala k'okel te rey te t-xela, atzunju kjawil b'inchante jun njaye tu'n tajb'en te k'ulb'il weye, chi Dios te.

⁶Kyja'tzun q'manxa kye tmajena tu'n tjaw kytx'emin qe tze' wi'ten twi witz Líbano, ex jaku che onin qe nmajene kyuk'il qe tmajena, ex b'a'n txi nchjo'ne twi kyk'u'j qe tmajena ik tza'nx ktzajel tqanina weye, porke b'a'ntl tu'na minti' jun qeye b'a'n xpe'lin tze' ik tza'n qe xjal aj Sidón, chi Salomón.

⁷Tejtzun tb'inte Hiram tyol Salomón, jaw tzalaj nimxix ex tma: —Ja'lo nimanxwit tb'i Qman, tu'nju ma tzaj tq'o'n jun tky'ajal David nim tnab'l tu'n tkawin tib'aj ju nintz nasyon lu.

⁸Xitzun t-sama'n Hiram aju tqanil lu tuk'il Salomón: —Ma nk'ame tqanil tzaj t-sama'na, ex kb'antel wu'ne aju ma tzaj tqanina weye ti'j tze' wi'ten ex tzaj.

⁹Aqe nmajene che b'eletz q'inte tze' twi witz Líbano tu'n tpon kyi'n max ttzi mar, ex junx che b'el nk'alo'ne qe tze' tu'ntzun kyxi nsama'ne tib'aj mar, ex tu'n kypon alkye lugar ktzajel tma'na, ex atzun che b'ajel pajut qe tze' tu'n t-xi ti'na. Ax ikx teya, kuchiwt tu'n tjapun tu'na tu'n ttzaj tq'o'na wab'j ex chib'j te kye qeju ate' tuj njaye.

¹⁰Xitzun tq'o'n Hiram te Salomón qe tze' wi'ten tuk'ix tzaj, ik tza'nx otoq tzaj tqanin.

¹¹Ax ikx te Salomón xi tq'o'n wab'j ex chib'j kye qeju ate' tuj tja rey Hiram. Tkyaqil ab'q'i xi tq'o'n Salomón 75 mil quintal triw, ex 115 mil galón chib'j aseyt tb'anilxix.

¹²Kyja'tzun tten tzaj q'o'n tnab'l Salomón tu'n Qman, ik tza'nx otoq tzaj ttziyan. Ex mya noq o'kx jlu, ax ikx kyaj b'ant ti'j jun kyyol Hiram tuk'il Salomón, ex tuj tzalajb'il e ten.

¹³B'ant jun ley tu'n rey Salomón tu'n kyjaw chmet txqan xinaq kyxol kykyaqil aj Israel tu'n kyxi' aq'nal. Japun kyajlal xjal lu 30 mil xinaq.

¹⁴Txolsa'n ok kyi'j qe xjal ti'j aq'untl: laj mil xinaq tu'n kyxi sama'n tuj junjun xjaw twi witz Líbano, jun xjaw tu'n kyten twi witz Líbano, ex kab'e xjaw tu'n kyten kyja. Ate Adoniram ok te nejenel kye qe xjal in che'x aq'nal.

¹⁵Ax ikx ok tq'o'n Salomón 70 mil xjal iqal iqtz ex 80 mil xjal xpe'lil ab'j twi witz,

¹⁶ex part ox mil tuk'il ox syent caporal kyi'j qe xjal e aq'nan ti'j aq'untl.

¹⁷Xi tma'n rey tu'n kyjatz lakut qe ab'j nmaq ex tb'anil, tu'n kyajb'en te t-simyentil tja Dios kyuk'ix qe ab'j tu'n tb'aj xpe'lin kyi'j.

¹⁸Qe tmajen Salomón ex qe tmajen Hiram, kyuk'ix qe xjal aj Gebal, b'aj kyb'incha'n qe tze', ex b'aj kyxpe'lin qe ab'j tu'n tajb'en tu'n tjaw b'inchet tja Dios.