Read kumam 1 Reyes 7 Bible Online

1 Reyes 7 - kumam bible

1 Reyes 7

¹Jaw tb'incha'n Salomón aju tex tja, ex oxlaj ab'q'i xi ti'n tu'n tb'ant.

²Ax ikx jaw tb'incha'n jun ja tok tb'i Tjaq' Tqan Tze' Líbano, te 50 var tnuqb'il ex 25 var twitz ex olaj var twa'l; ex qe viga e ajb'en ti'j puro wi'ten qe, kykub'sa'n qe kyib'aj kyaje txol tqan ax tze' wi'ten qe.

³Aju tajlal viga tu'n tkyaqil, 45, ex te ox pa' e je'l; olajchaq junjun pa', ex kykub'sa'n qe kyib'aj qe tqan ja. Ex kyib'aj viga lu e kub' q'o'n qe tz'lom wi'ten.

⁴Attoq ox txol ventan te oxkex kyten, tkub' jun twitz juntl.

⁵Kykyaqil qe tlamel ex qe ventan junx ta' echb'in te kynuqb'il tuk'il kywitz, ex tkub' jun twitz juntl, te ox txol kyten.

⁶Ax ikx b'aj tb'incha'n jun ja te 25 var tnuqb'il ex te olaj var twitz, ex twitztzun ja lu e kub' twab'an qe tqan ja. Ex twitz jlu b'aj tb'incha'n jun ttxa'n pe'n kyuk'il qe tqan ja tuk'ix twi' tjax.

⁷Ax ikx jaw tb'incha'n jun ja jatum tu'n tkawin ex tu'n tb'inchet ti'j xtis, ex ok tq'o'n qe tz'lom wi'ten twitz ja te tujxi, xi'x qe' twitz tx'otx' ex japun b'aj tjaq' k'a's.

⁸Tuj ja jatum najltoq Salomón at jun ttxa'n pe'n tkub' ti'jxi, ex ju b'inchb'en te junx ta' ik tza'n qe kab'e tnejel ja. Ex jaw tb'incha'n juntl ja tu'n tajb'en te tme'jel Faraón aju t-xu'jil, ex ax b'inchb'en te.

⁹Kykyaqil qe ja lu, tzajx qe' kyi'j kysimyentil ex japun b'aj max tuj kywi' ex xi'x qe' tuj tnejel ttxa'n pe'n ex pon b'aj max tuj ttxa'n pe'n tkub' ti'jxi, puro ab'j tb'anilxix, xpe'limaj ex qesimaj qe tu'n syer, kykab'il pak' kytxlaj ik tza'nx echb'in kye b'animaj ti'j.

¹⁰Qe simyent ax ikx puro ab'j kyuwxix ex nmaqxix qe, at junjun ab'j te jwe' var tnuqb'il, ex at junjuntl te kyaje var.

¹¹Ax ikx qe tkajonil ja puro ab'j tb'anilxix, xpe'limaj kyi'j ik tza'nx echb'il kye b'animaj ti'j, ex qe tze' te kyqul ja wi'ten qe.

¹²Ex ti'jele tkyaqil jlu attoq jun muro te ox txol ab'j, ex jun txol viga wi'ten xi' tib'aj ik tza'nxju tok ti'jele tja Dios.

¹³Xi tma'n rey Salomón tu'n t-xi q'ib'aj Hiram max tuj tnam Tiro,

¹⁴aju tal jun meb'a xu'j tiyjil Neftalí ex tky'ajal jun xjal aj Tiro, at tnab'l tu'n taq'nan ti'j q'an k'uxb'il. Ate Hiram sek' tnab'l ex list, ex ojtzqi'n tu'n tkyaqil aq'untl ti'j q'an k'uxb'il; kyja'tzun o pon twitz rey Salomón ex b'ant tkyaqil aq'untl tu'n.

¹⁵Kub' tb'incha'n kab'e tqan adorn q'an k'uxb'il, te b'elaj var kywa'l ex te qaq var kyk'itz.

¹⁶Ax ikx kub' tb'incha'n kab'e adorn puro q'an k'uxb'il tu'n kykub' ten tuj kywi' qe tqan. Aju kywa'l qe adorn lu te kab' var tuk' mey.

¹⁷Ax ikx kub' tb'incha'n kab'e k'uxb'il xawk'in kyoy', ex xpaltx'i'n kyten ik tza'n caden, tu'ntzun kyok ten kyi'j qe adorn otoq che kub' ten tuj twi tqan; wuq k'uxb'il xawk'in kyoy' te junjun adorn.

¹⁸Ax ikx kub' tb'incha'n kab'e txol kyilb'ilal karnad ẍoq' ti'j junjun k'uxb'il xawk'in toy', aqeju kyok te txayb'il kye qeju adorn kykub' tuj kywi' qe tqan. Iklex tb'incha kyi'j kykab'il adorn.

¹⁹Aqeju adorn kykub'sa'n tib'aj kywi' qe tqan, aqeju kykub'sa'n twitz tja Dios, te kab' var kywa'l, ex ik che ke'yin ik tza'n b'ech lirio, xwak kyten.

²⁰Kyi'jele junjun adorn kykub' twi kyqan, kyoksa'n kab' syent tilb'ilal karnad ẍoq' tok ti'jele k'uxb'il xawk'in toy'.

²¹E kub' tq'o'n Hiram qe tqan adorn lu twitz tja Dios, ex tejtzun kykub' tq'o'n tuj kylugar, aju tqan adorn tkub' tuj tnayaj tja Dios, Jaquín ok tb'i, ex aju tqan adorn tkub' tuj tb'anq'ab' tja Dios, Boaz ok tb'i.

²²Aju kywi' qe tqan adorn ik che ke'yin ik tza'n b'ech lirio, xwak tten. Kyja'tzun b'aj b'ant aq'untl kyi'j qe tqan adorn.

²³Te tib'ajxi kub' tb'incha'n Hiram jun nintz pil puro q'an k'uxb'il ttx'otx'il, te tkub'il a', tolin ti'j ex jwe' var tuj. Kab' var tuk' mey twa'l, ex te olaj var tk'itz.

²⁴Tjaq' ttxa'nile pil tok kab'e txol tilb'ilal twitz tze' tb'anilxix ke'yin, winqin tuj junjun var, junx b'aj b'ant tuk'il pil.

²⁵Aju pil lu tkub'toq tib'aj kab'laj tilb'ilal wakẍ q'an k'uxb'il kytx'otx'il, oxe kyja' in xi kyke'yin jawni, oxe kyja' in xi kyke'yin kub'ni, oxe kyja' in xi kyke'yin okni ex oxe kyja' in xi kyke'yin elni. Qe kyẍo'p ate'kx tujxi, ex aju pil tkub'sa'n kyib'aj qe tilb'ilal wakẍ.

²⁶Aju tkajonil pil lu te kyaje q'ab' tpimil; aju ttzi' ik tten ik tza'n twi' t-xmakal b'ech lirio, ex in xi b'aj laj mil tuk' jwe' syent galón a' tuj.

²⁷Ax ikx kub' tb'incha'n laj kyq'uqb'il tkub'il a' q'an k'uxb'il kytx'otx'il, teyle junjun te kab' var tnuqb'il, ax ikx twitz, ex jun var tuk' mey twa'l.

²⁸Qe kyq'uqb'il tkub'il a' lu ik tten b'inchb'en kye ik tza'n jun cajón, te kyaje pak' kytxlaj kyku'xsan tuj kymarkil,

²⁹ex kyoktoq kyilb'ilal b'alun ti'j tkyajil pak' ttxlaj, ax ikx kyilb'ilal wakẍ ex kyilb'ilal querubín, ex kyoktoq kyilb'ilal b'ech kyjaq' kyilb'ilal b'alun ex kyjaq' kyilb'ilal wakẍ, ax ikx kyib'aj.

³⁰Teyle junjun tq'uqb'il tkub'il a' attoq kyaje t-rweda q'an k'uxb'il kytx'otx'il, ax ikx aju k'uxb'il jatum nnik' tolj rweda, ax q'an k'uxb'il kytx'otx'il. Kyuj kykyajil t-skyin tq'uqb'il tkub'il a' tjaq'xi, attoq tzuyb'il te q'an k'uxb'il ttx'otx'il, ex teyle junjun pak' ttxlaj kyoksa'n kyilb'ilal b'ech kyi'j.

³¹Aju ttzi tq'uqb'il tkub'il a' tku'x jun toy' tuj tmij, tolin tten mey var t-xe', ex ox xk'achub' tuj. Ax ikx toktoq adorn kyi'j kytzi'yile kyq'uqb'il tkub'il a', ex qe kyq'uqb'il mya tolin kyi'j, noq o'kx junx ta' echb'in kye kynuqb'il tuk'il kywitz.

³²Qe kyaje rweda ate'toq kyjaq' qe tkyajil pak' ttxlaj, ex aju k'uxb'il jatum in che ik' tolj qe rweda, kyiqlix kyib' ti'j tq'uqb'il. Aju twa'l junjun rweda te ox xk'achub'.

³³Ik kyten ik tza'n qe rweda kye carwaj. Qe k'uxb'il jatum in che ik' tolj qe rweda, kyuk'ix qe k'uxb'il kyok qe rweda ti'j, kyuk'ix qe tal k'uxb'il kyokx t-xol rweda ex qe k'uxb'il kyokx tuj kymij rweda, kykyaqil qe jlu q'an k'uxb'il qe.

³⁴Ax ikx tkyaqil t-skyin tq'uqb'il tkub'il a' attoq jun tzuyb'il kye, ex ax elni qe kyi'j qe tq'uqb'il tkub'il a'.

³⁵Ex aju ttzi tq'uqb'il tkub'il a', tolin ti'j, te jun xk'achub' twa'l; ex aju tkyajil pak' kytxlaj ex tuk'ix ju tzuyb'il kye, tjawsa'n jawni teju tq'uqb'il tkub'il a', ax elni qe ti'j.

³⁶Okx tq'o'n Hiram kyilb'ilal querubín, kyuk'ix kyilb'ilal b'alun, kyuk'ix kyilb'ilal tqan xa'j kyi'j kykyaqil tq'uqb'il tkub'il a' lu, ex tkyaqil kyi'jele e ok tq'o'n qe adorn.

³⁷Kyja'tzun tenb'a tej kyb'aj b'ant laj kyq'uqb'il tkub'il a', kykyaqil junx ta' b'inchb'en kye ex junx ta' echb'in kye.

³⁸Ax ikx kub' tb'inchan laj tkub'il a' q'an k'uxb'il kytx'otx'il. Teyle junjun te kab' var tuj, ex in xi b'aj kab' syent galón a' tuj junjun, ex teyle junjun e kub' tq'o'n tuj tq'uqb'il,

³⁹jwe' tq'uqb'il tkub'il a' kub' tq'o'n tuj tb'anq'ab' tja Dios ex jwe' tuj tnayaj. Aju pil matij, atzun kub' ten tuj tb'anq'ab' tja Dios tuj tjawitz q'ij.

⁴⁰Ax ikx kub' tb'incha'n Hiram qe palangan, qe pala ex qe laq matij, ex kyja'tzun tten b'ant tkyaqil aq'untl tu'n Hiram, aju xi tma'n Salomón te, tu'n kyajb'en tuj tja Qman.

⁴¹Kub' tb'incha'n kab'e tqan adorn, kab'e adorn tolin kyi'j e kub' ten tuj kywi' qe tqan, kab'e k'uxb'il xawk'in kyoy' tu'n kyok ten kyi'j adorn,

⁴²kyuk'ix kyaje syent kyilb'ilal karnad ẍoq' tu'n kyok ten kyi'j qe k'uxb'il xawk'in kyoy', kab'e txol ti'j junjun k'uxb'il xawk'in toy', aqeju kyok kyi'j qe adorn tolin kyi'j kykub' tuj kywi' qe tqan,

⁴³kyuk'ix laj kyq'uqb'il tkub'il a', kyuk'ix laj tkub'il a' tu'n kykub' ten kyuj qe q'uqb'il lu,

⁴⁴tuk'ix pil matij te tkub'il a', kyuk'ix kab'laj kyilb'ilal wakẍ kyokxsa'n tjaq',

⁴⁵kyuk'ix qe palangan, qe pala ex qe laq matij. Kykyaqil qe makb'il lu b'aj tb'incha'n Hiram, aju xi tma'n Salomón te tu'n kyajb'en tuj tja Dios, aju kytx'otx'il q'an k'uxb'il tz'umin twitz.

⁴⁶Atzun e ku'x tlaku'n rey qe molde tuj xkab' tx'otx' tuj chq'ajlaj ttzi nima Jordán, aju tkub' t-xol tnam Sucot ex Saretán.

⁴⁷Tu'nju nimxix makb'il puro q'an k'uxb'il e b'ant, kyja'tzun minti' b'aj tmalo'n Salomón tkyaqil.

⁴⁸Ax ikx xi tma'n Salomón tu'n kyb'ant kykyaqil qe makb'il tuj tja Qman, ex atzun qe jlu: Aju altar q'an pwaq ttx'otx'il, aju mes q'an pwaq ttx'otx'il jatum in kub' q'o'n pan xjansa'maj te Qman,

⁴⁹kyuk'ix qe kandil q'an pwaq tb'anilxix ttx'otx'il, aqeju kykub' twitz ju Lugar Mas Xjanxix, jwe' tuj b'anq'ab'aj ex jwe' tuj nayaj, kyuk'ix qe kyilb'ilal b'ech, kyuk'ix qe kandil, kyuk'ix qe tenás q'an pwaq kytx'otx'il,

⁵⁰kyuk'ix qe k'ab'l, kyuk'ix qe matzb'il, kyuk'ix qe laq matij, kyuk'ix qe pak' ex kyuk'ix xawk' te patb'il storak, kykyaqil qe jlu q'an pwaq tb'anilxix kytx'otx'il. Ax ikx puro q'an pwaq qe bisagr e ok kyi'j qe tlamel Lugar Mas Xjanxix tokx tujxi tja Dios, ax ikx qe bisagr e ok kyi'j qe tlamel tja Dios.

⁵¹Tejtzun tb'aj b'ant tkyaqil ju aq'untl ti'j tja Qman tu'n rey Salomón, xi ti'n qe makb'il q'an pwaq ex saq pwaq kytx'otx'il, aju otoq txi q'o'n te Qman tu'n David aju qtzan tman, ex e okx tq'o'n kyxol qe q'inumab'l at tuj tja Dios.