Read kumam 1 Reyes 9 Bible Online

1 Reyes 9 - kumam bible

1 Reyes 9

¹Tej tb'aj b'ant tja Qman tu'n Salomón, tuk'ix ju tex tja ex tuk'ix tkyaqilju ximamaj tu'n,

²kub' tyek'un tib' Qman twitz Salomón tkab'majin, ik tza'n tej tkub' tyek'un tib' tuj lugar Gabaón,

³ex tzaj tma'n te: Ma nb'iye aju tkub'sb'ila ex aju ma tzaj tqanina weye, ex ma kub' nky'iwla'ne aju ja lu aju ma jaw tb'incha'na, jatum tu'n ttzaj na'n nb'iye tuj te jumajx. Kukx k'okel nkwentine aju ja lu, ex kukx tzul nna'ne.

⁴Atzun ja'lo, qa ma b'eta tuj tumelxix nwitze ex minti' tpaltila, ik tza'n o tb'incha David aju qtzan tmana, ex qa ma japun tu'na tkyaqilju o txi nma'ne teya, ex qa ma che'x tnimana qe nleye ex qe nxnaq'tzb'ile,

⁵aqine chin kyuwsalte tkawb'ila te jumajx kyxol aj Israel, ik tza'n o txi ntziyane te David aju qtzan tmana, tej t-xi nma'ne te qa ax kyxol qe tiyjil kukx tu'n kyjaw nsk'o'ne qe xjal tu'n kyok te kawil kyib'aj aj Israel.

⁶Ex qa aqeye, ex qa aqe kyk'wa'le ma tz'el kypa'n kyib'e wi'je, ex qa mi'n ẍe japun qe nmandamyente ex qe nleye kyu'ne, aju o txi nma'ne kyeye, ex qa ma che k'ulune kywitz junxitl dios, ex qa ma che ajb'ene kye,

⁷aqine chin elex lajonte kye aj Israel tuj tx'otx' o txi nq'o'ne te kyetzb'il, ex aju ja ma b'aj nky'iwla'ne kyjel nkoline, ex qe aj Israel che okel xmayin kyu'n kykyaqil nasyon ex che elel ik'un.

⁸Ex aju ja lu kb'el q'uchj, ex kykyaqil xjal che ik'el b'et ttxlaj ttx'aqan ja che jawil lab'in ti'j ex che okel ten xmayil ti'j ex ok kyma': ¿Tiqu'n ma tb'incha Dios ikju ti'j tnam lu ex ti'j ja lu?

⁹Ex ktzajel tzaq'we'n kye: Tu'nju ma tz'el kypa'n kyib' ti'j Kydios aju etz q'inte kye kyxe'chel tuj Egipto, ex tu'nju ma che ok ten k'ulul kywitz junxitl dios ex ma che ajb'en kye; tu'ntzun tlaj tkyaqil jlu ma tzaj tq'o'n Dios jun nintz mya b'a'n kyib'aj, che chilo xjal, chi Dios.

¹⁰Winqin ab'q'i xi ti'n tu'n tb'ant kab'e ja tu'n Salomón, aju tja Dios ex tuk'ix ju tex tja,

¹¹ex tb'ajlenxi jlu xi tq'o'n Salomón winqin tnam ate' tuj Galilea te Hiram aju rey te tnam Tiro, te kyxel qe tze' wi'ten, qe tze' tzaj, ex tkyaqil q'an pwaq aju otoq tzaj tq'o'n Hiram te.

¹²Tejtzun t-xi' Hiram ke'yil kye qe tnam aqeju otoq che tzaj tq'o'n Salomón te, minti' o tzalaj kyi'j,

¹³ex tma: ¿Erman, maj atzun qe tnam lu ma che tzaj tq'o'na weye? Chi Hiram. Kyja'tzun aju lugar jatum ate' qe tnam lu ok tq'o'n tb'i Cabul,[1] ex axtzun tb'i tok ja'lo.

¹⁴Aju q'an pwaq xi tq'o'n Hiram te rey Salomón, japun jun tajlal te 87 quintal.

¹⁵Atzun qe aq'untl lu ok tq'o'n rey Salomón lajwers ti'j tu'n tb'ant kyu'n qe xjal mya aj Israel qe tej tb'ant tja Qman, tuk'ix tja rey, tuk'ix tu'n tnojset jul tu'n tok te chq'ajlaj, ex xi tb'incha'n ju muro toksa'n ti'j Jerusalén, ex e jaw tb'incha'n juntl maj qe tnam Hazor, Meguido ex Gezer.

¹⁶Otoq tzyet tnam Gezer tu'n Faraón aju rey tuj Egipto, kub' tpatun ex e kub' tb'yo'n kykyaqil aj Canaán najlqetoq tuj tnam, ex xitzun tq'o'n te jun oyaj te tme'jel tej tmoje' tme'jel tuk'il Salomón.

¹⁷Jawtzun tb'incha'n Salomón juntl maj ju tnam Gezer, tuk'ix ju tnam Bet-horón aju tkub' kub'ni,

¹⁸kyuk'ix qe tnam Baalat ex Tamar, aqeju ate' tuj lugar tzqij tx'otx' te Judá.

¹⁹Ax ikx jaw tb'incha'n juntl maj kykyaqil tnam jatum in xi k'u't twitz awal, ax ikx qe cuartel jatum in che okx ten qe carwaj in che ajb'en tuj q'oj, kyuk'ix qe cuartel kye soldad in che b'et kyib'aj chej, ex tkyaqil aju tajb'iltoq tu'n tb'ant tuj Jerusalén, tuj tiwitz tx'otx' Líbano ex tuj tkyaqil tx'otx' attoq tjaq' tkawb'il.

²⁰Atzun qe xjal najlqe kyuj, aqeju aj Amorreo, qe aj Heteo, qe aj Ferezeo, qe aj Heveo ex qe aj Jebuseo, aqeju e kyaj anq'in, aqe jlu mya aj Israel qe,

²¹aqeju kyiyjil e kyaj ten te tib'ajxi tuj tx'otx' ex minti' e naj kyu'n aj Israel, atzun qe jlu e ok lajwersin ti'j aq'untl tu'n Salomón, ax ikx in b'ant kyi'j ja'lo.

²²Ex minti' e ok tq'o'n qe aj Israel aq'nal ti'j aq'untl lajwers in b'ant, noq o'kx e ok tq'o'n te soldad, ex at xi tq'o'n kyoklen tu'n kyten ttxlaj, ex at e ok te nejenel kye soldad ex te nejenel kye soldad kyokx kyuj carwaj in che ajb'en tuj q'oj ex kye qe soldad kyjax kyib'aj chej.

²³Ax ikx ok tq'o'n jwe' syent tuk' 50 te caporal; tuj kykwenttzun qe jlu kyaj tq'o'n Salomón aq'untl, ex atzun qe jlu in che q'mante kye xjal noq alkye aq'untl tu'n tb'ant.

²⁴Aju tme'jel Faraón etz tuj tnam Ttanmi David tb'i ex xi' najal tuj ja otoq jaw tb'incha'n Salomón te te. Ku'xtzun tnojsa'n Salomón jul tu'n tok te chq'ajlaj.

²⁵Tb'ajlenxi b'ant tja Dios, ox maj tuj ab'q'i in xi tq'o'n Salomón qe oyaj patun in che kub', kyuk'ix qe chojb'il te mojb'ab'l tib'il in kub' tq'o'n tib'aj altar aju otoq jaw tb'incha'n te Qman, ax ikx in kub' tpatun storak twitz Qman.

²⁶Ax ikx kub' tb'incha'n rey Salomón qe barc tuj lugar Ezión-geber, aju tkub' junx tuk'il tnam Elat tuj kytx'otx' aj Edom, aju ta' ttzi' ju mar Kyaq Ke'yin.

²⁷Xi t-sama'n Hiram qe xjal at kynab'l tu'n kyyukun barc, tu'n kyxi' tuj barc junx kyuk'il xjal at kyoklen ttxlaj Salomón.

²⁸E pon tuj ju lugar Ofir tb'i, ex atzun tzaj kyi'n ox syent tuk' laj quintal q'an pwaq, ex ul kyi'n tu'n tpon tuk'il rey Salomón.