Read kumam 2 Reyes 1 Bible Online

2 Reyes 1 - kumam bible

2 Reyes 1

¹Tkyimlenxitzun Acab, jaw kyi'n kyib' aj Moab kyi'j aj Israel.

²Atzunte Ocozías tzaj tz'aq ttzi' jun ventan tuj tkab'in kolin tja rey at tuj Samaria, ex nim o k'ixb'i. E je'xtzun t-sama'n qe sanjel tu'n kyxi' qanil te Baal-zebub aju kydios aj Ecrón qa tu'n tb'anix.

³Ex xi tma'n t-anjel Qman te Elías aju aj Tisbe: Txi'ya maqolte kye qe t-sanjel rey te Samaria, ex qaninxa kye kyja': ¿Minti'pe Dios at kyxol aj Israel, tu'nju ma che'xe qanilte kyxjele te Baal-zebub aju kydios aj Ecrón?

⁴Kyja'tzun, ate Qman in q'mante te Ocozías kyja': Ya mlay jaw we'tla tuj tkoẍb'ila, noq o'kx knajela, chi t-anjel Dios te Elías. Xi'tzun Elías ex o b'ant tu'n ikju.

⁵Tejtzun kypon meltz'aj qe sanjel twitz rey, xi tqanin kye: —¿Tiqu'n ma che ajtz meltz'aje?

⁶Atzun kye xi kytzaq'we'n: —Tu'nju at jun xinaq setz tuj qb'eye ex saj tma'n qeye tu'n qajtz meltz'aje tuk'il rey aju otoq txi samante qeye, ex tu'n t-xi qma'ne te kyja': Chi Qman in tma'n: ¿Baqa minti' Dios at kyxol aj Israel tu'nju in che'x t-sama'na qe xjal qanil t-xjela te Baal-zebub aju kydios aj Ecrón? Tu'nju ma tb'inchaya jlu, ya mlay jaw we'tla tuj tkoẍb'ila, noq o'kx knajela, chi xjal, che chi qe sanjel.

⁷Atzunte rey xi tqanin kye: —¿Tza'n ke'yin aju xinaq setz tuj kyb'eye, aju saj q'mante jlu?

⁸—Aju xinaq lu ttz'umal alumaj t-xb'alun toksa'n, ex tz'u'm k'alb'il tk'u'j, che chi xi kytzaq'we'n. —Ex a Elías aju aj Tisbe, chi rey xi ttzaq'we'n.

⁹Xi t-sama'n rey jun capitán kyuk'ix 50 soldad jyolte Elías. Tejtzun kypon, lutoq Elías q'uql twi' jun witz. Xitzun tma'n capitán te: —Aya t-sanjel Dios, ma tzaj tma'n rey tu'n tku'tza.

¹⁰Tzajtzun ttzaq'we'n Elías: —Qa ax tok aqine t-sanjel Dios, e ttzaj q'aq' twitz kya'j tu'n tkub' tz'e'ya tu'n, kyuk'ix qe 50 t-soldadiya. Jurattzun ku'tz q'aq' twitz kya'j ex e b'aj tz'e'y tu'n.

¹¹Xi t-sama'ntl rey juntl capitán kyuk'ix 50 soldad. Xitzun capitán ex xi tma'n te Elías kyja': —Aya t-sanjel Dios, ma tzaj tma'n rey tu'n tku'tz naja.

¹²Tzaj ttzaq'we'ntl Elías: —Qa ax tok aqine t-sanjel Dios, e ttzaj q'aq' twitz kya'j tu'n tkub' tz'e'ya tu'n, kyuk'ix qe 50 t-soldadiya. Jurattzun ku'tz q'aq' twitz kya'j ex e b'aj tz'e'y tu'n.

¹³Xi t-sama'n rey toxinmajin juntl capitán kyuk'ix 50 soldad, ex aju toxin capitán jax max jatum ta' Elías, kub' ẍmeje' twitz, ok ten kub'sal twitz ex tma: —Aya t-sanjel Dios b'inchama xtalb'il, mi'n txi tqanina te Dios tu'n nkyime kyuk'ix qeju 50 ajb'el teya lu;

¹⁴porke ma tzaj q'aq' tuj kya'j ex ma che kub' tz'e'y qe kab'e capitán kyuk'ix qe xinaq uk'in kyu'n. In chin kub'sane twitza tu'n ttzaj q'aq'an tk'u'ja wi'je, chi capitán.

¹⁵Tzajtzun tma'n t-anjel Qman te Elías: —Txi'ya tuk'il ex mi'n xob'a twitz. Ku'tztzun Elías ex xi' tuk'il capitán tu'n t-xi' tuk'il rey,

¹⁶ex xi tma'n te: —Chi Qman ma tma: Tu'nju ma che'x t-sama'na qe sanjel qanilte t-xjela te Baal-zebub aju kydios aj Ecrón, mer ik tza'n minti' Dios at kyxol aj Israel jatum tu'n t-xi tqanin t-xjela te, kyja'tzun mlay jaw we'tla tuj tkoẍb'ila, noq o'kx knajela, chi Elías.

¹⁷Kyimtzun Ocozías ik tza'nx otoq tma Qman te Elías. Tu'nju minti' tk'wa'l Ocozías tzaj, kyja'tzun aju o kawin te t-xel, atzun Joram aju terman. A jlu o b'aj tuj tkab'in ab'q'i ttzyetlen tkawin Joram aju tky'ajal Josafat tuj Judá.

¹⁸Aju ch'intl tx'olb'ab'en ti'j Ocozías ex ti'j tb'inchb'en, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.