Read kumam 2 Reyes 10 Bible Online

2 Reyes 10 - kumam bible

2 Reyes 10

¹Attoq 70 tky'ajal Acab ate'toq tuj Samaria, kyja'tzun kub' ttz'ib'an Jehú qe u'j ex xi t-sama'n kye qe xjal at kyoklen tuj tnam, tuk'ix kye qe kytijil xjal ex kye qeju kyoksa'n te kwentil kye qe tk'wa'l Acab, ex chi in tma'n kyuj u'j kyja':

²Kyuk'ile ate' qe tky'ajal kypatrone, kyuk'ix qe chej ex qe carwaj in che ajb'en tuj q'oj, tuk'ix tnam tok muro ti'j ex kyuk'ix qe makb'il in che ajb'en tuj q'oj; oktzun tpon u'j lu kyuk'ile,

³kysk'o'n jawe kyxol qe tky'ajal kypatrone Acab aju mas mejor ex at-xix tnab'l, kyq'o'n okxe tuj tq'uqb'il qtzan tman tu'n tkawin, ex che q'ojine tu'n kyklet qe tky'ajal kypatrone, chi u'j.

⁴Tzaj nimxix kyxob'il tu'n jlu ex kyma: Minti' e xkye' kab'e rey ti'j, ¿tza'ntzun tten tu'n qxkye' qe ti'j?

⁵Atzunte mayordom tuj tja rey, tuk'ix gobernador tuj tnam, kyuk'ix qe kytijil xjal ex kyuk'ix qe xjal kyoksa'n te kwentil kye qe tky'ajal rey, xi kysama'n tqanil lu te Jehú: Lu qo'ye lu, jaku qo ajb'ene teya, ex jaku qb'inchaye tkyaqil aju ktzajel tma'na, ex mlay tz'ok qq'o'ne toklen jun tky'ajal qtzan Acab tu'n tok te rey. B'inchama noq alkye b'a'n tuj twitza, che chi.

⁶Xitzun ttz'ib'an Jehú juntl u'j, ex chi kyja': Qa kyq'on kyib'e wuk'ile ex qa kyaje tu'n t-xi kynimane qe orden che xel nq'o'ne, tloqju nchi'j b'ix che tzaje wuk'ile tuj Jezreel ex kyi'ntze kywi' qe tky'ajal kypatrone. Setenta kyb'aj qe tky'ajal rey Acab ate'toq tuj tnam kyuk'il qe xjal ma' kyoklen, aqeju otoq che ch'isante kye.

⁷Tejtzun kyk'monte qe xjal aju u'j lu, tzajtzun kytzyu'n qe 70 tky'ajal rey ex e kub' kyb'yo'n; ku'xtzun kyq'o'n qe kywi' tuj junjun chi'l ex xi kysama'n tuk'il Jehú tuj Jezreel.

⁸Pontzun jun sanjel ex xi tma'n te Jehú: —Ma che ul q'i'n kywi' qe tky'ajal rey. Xitzun tma'n Jehú: —Te kab'e b'yuj tz'el kyu'ne, ex kyq'on kub'e ttzi tlamel tnam, ex axtzun kyq'on kyaje te nchi'j.

⁹Te prim te juntl q'ij etz Jehú, kub' we' ex xi tma'n kye kykyaqil tnam xjal: —Kyeye minti' kyile. Aqine in kub' ximante tu'n tjaw wi'n wib'e ti'j npatrone ex o kub' nb'yo'ne; ex ¿alkye ma kub' b'yonte kye kykyaqil jlu?

¹⁰Tz'elx kynik'e ti'j, mi jun yol minti'wt ma japun aju o tma Qman kyi'j qe tky'ajal rey Acab. Ax te Qman ma b'inchante ik tza'nx ju tyol o q'manjtz tu'n Elías aju tmajen, chi Jehú.

¹¹Ex tuj Jezreel e kub' tb'yo'n kykyaqil txqantl tiyjil Acab, kyuk'ix kykyaqil qe xinaq ma' kyoklen, kyuk'ix qe xjal tamiwxix tib' Acab kyuk'il, ex kyuk'ix qe pal in che ajb'en te. Mi jun o kyaj anq'in tu'n.

¹²Te tib'ajxi xi' tuj Samaria, ex tmij b'e jatum ta' ju ja in che ten qe pastor tuj,

¹³ok noj kyi'j qe terman Ocozías aju rey te Judá. Xitzun tqanin Jehú kye: —¿Alkye qeye? Atzun kye tzaj kytzaq'we'n: —Terman Ocozías qo'ye, ex ma qo'xe q'olb'el kye qe tky'ajal rey Joram ex kye qe tal xu'j rey Jezabel.

¹⁴Xitzun tma'n Jehú kye qe xjal ate' tuk'il: —Kytzyu'ntze qe. E tzajtzun tzyu'n kyu'n qe xjal otoq che ok lpe' ti'j Jehú, ex eltzun kytx'emin kywi' ttzi xoch tkub' jatum ta' ju ja in che ten qe pastor tuj. 42 kyb'aj qe xinaq, ex mi jun kye jlu o kyaj anq'in.

¹⁵Tejtzun tik' Jehú tuj lugar ma chixin, ok noj ti'j Jonadab aju tky'ajal Recab, kyja'toq ttzaj tu'n tul tuk'il. Xi q'olb'en Jehú te ex tma: —¿B'a'npe t-ximb'etza wi'je, ik tza'nx weye nximb'etz ti'ja? —B'a'nwe nximb'etz ti'ja, chi Jonadab xi ttzaq'we'n. —Qatzun ikju, chuxni q'ontz tq'ab'a, chi Jehú. Xitzun tq'o'n tq'ab' Jonadab ex jax q'i'n tu'n Jehú tuj tcarwaj,

¹⁶ex tma: —Qo' wuk'ile ex jakutzun tila aju nganiye ma tzaj tu'n tb'ant tajb'il Qman wu'ne. Kyja'tzun xi q'i'n Jonadab tu'n Jehú tuj tcarwaj.

¹⁷Ex tejtzun tpon Jehú tuj Samaria, e kub' tb'yo'n kykyaqil qe tiyjil Acab, aqeju otoq che kyaj anq'in. E kub' b'aj kykyaqil, ik tza'nx otoq tma Qman te Elías.

¹⁸Te tib'ajxi jlu ok tchmo'n Jehú kykyaqil tnam xjal ex xi tma'n kye: —Ate Acab myaxix nim o k'ulun twitz Baal, atzun weye nimxix chin k'ulule twitz.

¹⁹Kyja'tzun, b'a'n tu'n kytzaj kytxko'ne kykyaqil qe t-sanjel Baal, kyuk'ix qe xjal in che k'ulun twitz, ex kyuk'ix kykyaqil qe pal in che ajb'en te, mi jun tu'n tkyaj ten, porke ma b'ant tten jun nintz chojb'il wu'ne te nimb'il te Baal. Qa at jun minti' ma pon, kb'el t-sentens tu'n tkyim, chi Jehú. Ex b'ant tten aju sb'ub'l lu tu'n Jehú, tu'ntzun kynaj kykyaqil qe xjal in che k'ulun twitz Baal;

²⁰kyja'tzun xi tma'n tu'n tex tqanil ti'j ninq'ij ma' t-xilen te Baal, ex b'anttzun ikju.

²¹Te tib'ajxi, e je'x t-sama'n qe sanjel kyxol kykyaqil aj Israel, ex kykyaqil qeju in che k'ulun twitz Baal e pon tuj ja te k'ulb'il te. Mi jun kye minti'wt pon, kyja'tzun o nojxix aju ja in ajb'en te k'ulb'il te Baal.

²²Xitzun tma'n Jehú te xjal k'u'l xb'alun tu'n ttzaj ti'n qe xb'alun te kye qe xjal in che k'ulun twitz Baal, ex b'anttzun tu'n ikju.

²³Atzunte Jehú tuk'ix Jonadab aju tky'ajal Recab e okx tuj ja te k'ulb'il te Baal, ex xi tma'n Jehú kye xjal kyja': —Kyke'yin b'aje qa mi a'l jun at kyxole, aqeju in che k'ulun te Qman, porke o'kx at tu'n kyten aqeju in che k'ulun te Baal.

²⁴E okxtzun qe xjal in che k'ulun te Baal tuj ja te k'ulb'il te, tu'ntzun t-xi kyq'o'n qe chojb'il ex qe oyaj patun in che kub'. Ex atzunte Jehú e kub' tq'o'n 80 xinaq ttxa'n pe'n, ex b'i'x xi tma'n kye kyja': —Qa at jun ma txi tzoqpinte jun kye qe xinaq lu, aqeju ma che'x nq'o'ne tuj kyq'ab'e, axtzun knajel te t-xel.

²⁵Te tib'ajxi, tej tb'aj kyq'o'n qe oyaj patun in che kub', xitzun tma'n Jehú kye qe soldad kwentil te ex kye qe xjal ma' kyoklen ate' ttxlaj: —Kyokxe ex che kyb'yo'nkuye. Mi jun tu'n ttzoqpaj. Atzun qe xinaq ate' tuk'il Jehú e ok ten b'yol kye tu'n spad, ex e je'tz kyxo'n ti'jxi ja. Te tib'ajxi e okx max tujxi ja te k'ulb'il te Baal,

²⁶etztzun kyi'n qe tilb'ilal kyokx tuj ja te k'ulb'il te, ex kub' kypatun.

²⁷Ax ikx kub' kypa'n aju tilb'ilal Baal, kub' kyxitun ju ja te k'ulb'il te, ok kyq'on te jun lugar jatum tu'n kypon xjal txa'l, ex kukx tten ja'lo.

²⁸Kyja'tzun kub' t-xitun Jehú kykyaqil tilb'ilal Baal kyxol aj Israel tu'ntzun mi'n kyk'ulun kywitz.

²⁹Maske ikju, pero kukx o b'inchan Jehú il, ik tza'n o tb'incha Jeroboam aju tky'ajal Nabat, aju e b'inchan qe aj Israel il tu'n, tu'nju kukx o k'ulun kywitz qe tilb'ilal tal tor q'an pwaq kytx'otx'il, aqeju ate' tuj Dan ex tuj Betel.

³⁰Xitzun tma'n Qman te Jehú: Tu'nju b'a'n ma tb'inchaya nwitze ex tz'aqlxix qe tb'inchb'ena, porke ma che kub' tb'yo'na qe tky'ajal Acab ik tza'nx otoq kub' nximane tu'n tb'ant kyi'j, kyja'tzun ax jun tky'ajala k'okel te rey tu'n tkawin kyib'aj aj Israel, ax ikx jun tchmana ex jun ttxk'a tchmana, chi Qman.

³¹Maske ikju, pero mya tu'n tkyaqil tanmi Jehú o japun tley Qman tu'n, aju Kydios aj Israel, tu'nju kukx o b'inchan il, ik tza'n o tb'incha Jeroboam, aju e b'inchan aj Israel il tu'n.

³²Tuj tq'ijlalil lu, tzyet tu'n tel q'i'n kytx'otx' aj Israel tu'n Qman. Ok tzoqpaj Hazael kyi'j aj Israel tuj tkyaqil tmojonil kytx'otx':

³³tzajx qe' max tuj tumlal tjawitz q'ij ti'jxi nima Jordán, ex tuj tkyaqil tx'otx' Galaad, kyuk'ix kytx'otx' aj Gad, aj Rubén ex aj Manasés, ex tzajx qe' tuj tnam Aroer, aju tkub' ttxlaj tq'ab' xaq Arnón, ex pon b'aj tuj Galaad ex Basán.

³⁴Aju ch'intl tx'olb'ab'en ti'j Jehú ex ti'j tkyaqilju o tb'incha, ex kyi'j qe tb'inchb'en ma'xix kyxilen, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

³⁵Tejtzun tkyim, ku'x maqu'n tuj tnam Samaria, ex aju o kawin te t-xel, atzun Joacaz aju tky'ajal.

³⁶O kawin Jehú 28 ab'q'i kyib'aj aj Israel tuj tnam Samaria.