Read kumam 2 Reyes 11 Bible Online

2 Reyes 11 - kumam bible

2 Reyes 11

¹Tejtzun tb'inte Atalía aju ttxu' Ocozías qa otoq kyim tal, e kub' tb'yo'n kykyaqil tky'ajal qtzan rey Ocozías.

²Ex ate Josaba, aju tanb' qtzan Ocozías ex tme'jel qtzan rey Joram, etz q'inte Joás aju tky'ajal Ocozías kyxol qe txqantl tky'ajal rey, aqeju kyja'toq kykub' b'yo'n, el tewan twitz Atalía, junx tuk'il ju xu'j kwentil te, ex e okx tq'o'n tuj jun tal cuart. Kyja'tzun minti' kub' b'yo'n,

³ex atzun okx ewan Joás qaq ab'q'i tuj tja Qman junx tuk'il ju xu'j ch'isal te. Ex atoq te Atalía in kawin kyib'aj aj Judá.

⁴Tujtzun twuqin ab'q'i xi tma'n Joiada tu'n kyxi txokb'aj qe capitán kyuk'ix qe xq'uqil tja rey, e okx ti'n tuj tja Qman, ex b'ant ti'j jun yol tu'n kyuk'il, tu'n ttzaj kyma'n jun yol axix tok tuj tja Qman, ex tzajtzun yek'un Joás kye, aju tky'ajal qtzan rey, tu'n Joiada.

⁵Ex xi tma'n kye: Atzun jlu kb'antel kyu'ne: Te ox k'loj k'elel kyb'aje, jun k'loj kyb'aje k'okel ten xq'uqil tja rey tuj q'ij te ojlab'l;

⁶atzun juntl k'loj che b'el ten jatum ta' tlamel Shur tb'i; atzun juntl k'loj che b'el ten twitz tlamel ti'jxi cuartel kye qe xq'uqil. Kyja'tzun ktela tu'n t-xq'uqinjtz tja rey kyu'ne.

⁷Ax ikx, aju kab'e k'loj xq'uqil kjawitz kyturn tuj q'ij te ojlab'l, ax che xe'l xq'uqil tuj tja Qman jatum ta' rey.

⁸Ex atzun kyeye k'okel kytxolb'an kyib'e ti'jele rey, ex teyle junjun tzyu'n tmakb'il aju in ajb'en tuj q'oj, ex qa at jun ma tz'okx tlamon tib' kyxole, b'i'x kymel. Atzun kyeye che xe'le tuk'il rey noq jatum ok t-xi'.

⁹Atzun kye capitán o kyb'incha tkyaqil ik tza'n otoq tma pal Joiada. Teyle junjun capitán kyuk'ix qe soldad ate'toq tuj kykwent e pon tuk'il pal Joiada, tza'nxix qeju in che okx xq'uqil tuj q'ij te ojlab'l, ax ikx qeju in jatz kyturn.

¹⁰Xitzun tq'o'n pal qe lans kye qe nejenel kye soldad, kyuk'ix qe maqb'il in che ajb'en tuj q'oj, aqeju tetoq rey David nej, ex atzun ate'toq tuj tja Qman.

¹¹E kub'tzun ten qe xq'uqil tuj kylugar, xi'x qe' tuj tb'anq'ab' tja Qman ex pon b'aj tuj tnayaj, ex e kub' ten ti'jele altar, ex teyle junjun q'i'n tmakb'il in ajb'en tuj q'oj tu'n kykwentin ti'j rey.

¹²Etztzun ti'n Joiada aju tky'ajal rey, jax tq'o'n coron tuj twi' ex xi tq'o'n jun copya te ley te. Te tib'ajxi jax tqo'n aseyt tuj twi' ex tma qa otoq tz'ok te rey. Kykyaqiltzun jaw txaq'an kyq'ab' ex e jaw sch'in kyja': B'a'nwt tz'el tq'ija, aya rey.

¹³Tejtzun tb'inte Atalía in che sch'intoq qe soldad xq'uqil tja rey, ax ikx qe xjal, xi'tzun tuj tja Qman jatum ate'toq kykyaqil xjal.

¹⁴O til, lu rey wa'lkub' ttxlaj tqan ja, ik tza'nx in b'ant kyu'n ok nno'k jun rey. Ex ate'toq qe nejenel ttxlaj, kyuk'ix qe xjal b'a'n che q'ajtzan chun, ex lu qe xjal nimxix in che tzalajtoq ex in che q'ajtzantoq kyi'j qe chun. Eltzun t-sb'it'un t-xb'alun Atalía, ex jaw sch'in kyja': —Ma che ok meltz'aje wi'je. Ma che ok meltz'aje wi'je.

¹⁵Xitzun tma'n Joiada kye qe capitán kye soldad: —Kyi'n exa xu'j lu kyxole, ex kyb'yo'nkuye qeju che xel lpe' ti'j, chi Joiada. Tu'nju otoq tma pal tu'n mi'n tkub' b'yo'n xu'j tuj tja Qman,

¹⁶kyja'tzun, tzaj kytzyu'n ex xi kyi'n ttzi kyja chej, jatum ta' tja rey, ex atzun kub' kyb'yo'n.

¹⁷Te tib'ajxi, xi tkyuwsa'n Joiada te rey ex kye tnam xjal tu'n kyok te jun tnam etzan tu'n Qman, ax ikx xi tma'n tu'n tb'ant ti'j jun yol tu'n rey kyuk'il tnam xjal.

¹⁸E je'xtzun kykyaqil tu'n kypon tuj ja te k'ulb'il te Baal ex kub' kyxitun, kub' kyxitun qe altar kyuk'ix qe tilb'ilal in che k'ulun twitz. Atzunte Matán, aju pal in ajb'en twitz Baal, ax kub' kyb'yo'n kywitz altar. E kub'tzun tq'o'n Joiada qe xq'uqil tuj tja Qman;

¹⁹e tzajtzun ti'n qe capitán kye soldad, kyuk'ix qe xq'uqil tja rey, kyuk'ix kykyaqil tnam xjal, ex etz q'i'n rey kyu'n tuj tja Qman ex pon kyi'n max tuj ja jatum in che kawin rey, okxtzun ttzi ja jatum kykub'sa'n qe xq'uqil, ex kub'tzun qe' Joás tuj q'uqb'il te kawb'il,

²⁰ex kykyaqil tnam xjal e jaw tzalaj. Tu'nju otoq kub' b'yo'n Atalía tu'n spad tuj tja rey, kyja'tzun, kykyaqil xjal e kyaj ten tuj tzalajb'il, aqeju ate' tuj tnam.

²¹Toktoq Joás twi' wuq ab'q'i tej ttzyet tkawin.