Read kumam 2 Reyes 15 Bible Online

2 Reyes 15 - kumam bible

2 Reyes 15

¹Otoq b'ant 27 ab'q'i ttzyetlen tkawin Jeroboam aju rey kye aj Israel, tej ttzyet tkawin Azarías aju tky'ajal Amasías, aju rey te Judá.

²Toktoq Azarías twi' qaqlaj ab'q'i tej ttzyet tkawin, ex o kawin 52 ab'q'i tuj Jerusalén. Aju ttxu' Azarías Jecolías tb'i ex aj Jerusalén.

³B'a'n e ela qe tb'inchb'en Azarías tuj twitz Qman, ik tza'nx qe tb'inchb'en Amasías aju qtzan tman.

⁴Maske ikju, pero minti' e je'l ti'n qe ja te kyk'ulb'il xjal kywi' qe witz, jatum kukx xi kyq'o'n xjal qe chojb'il ex kukx kub' kypatun storak.

⁵Kub' tq'o'n Qman jun tcastiw rey ex o yab't tu'n tx'a'k minti' q'anb'il ti'j, kyja'tzun o ten rey tuj jun ja tjunalx, atzunte Jotam aju tky'ajal kyaj ten te t-xel, ex o kawin kyib'aj tnam xjal. Yab'xtoq Azarías tu'n tx'a'k lu tejxi tkyim.

⁶Aju ch'intl tx'olb'ab'en ti'j Azarías ex ti'j tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Judá.

⁷Tejtzun tkyim Azarías, atzun ku'x maqu'n jatum maqu'n qe qtzan t-xe'chel tuj tnam Ttanmi David tb'i. Te tib'ajxi aju kawin te t-xel, atzun Jotam aju tky'ajal.

⁸Otoq b'ant 38 ab'q'i ttzyetlen tkawin Azarías aju rey te Judá, tej ttzyet tkawin Zacarías aju tky'ajal Jeroboam kyib'aj aj Israel, ex o kawin qaq xjaw tuj Samaria.

⁹Mya b'a'n e ela qe tb'inchb'en tuj twitz Qman ik tza'nx kyb'inchb'en qe t-xe'chel, ex minti'x el tpa'n tib' kyi'j qe il tb'incha Jeroboam aju tky'ajal Nabat, aju e b'inchan aj Israel il tu'n.

¹⁰Atzunte Salum aju tky'ajal Jabes jaw ti'n tib' ti'j, ex ok tzoqpaj ti'j tuj tnam Ibleam ex kub' tb'yo'n; te tib'ajxi ax o kawin te t-xel.

¹¹Aju ch'intl tx'olb'ab'en ti'j Zacarías, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

¹²Kyja'tzun o japun aju otoq tma Qman te Jehú, qa o'kx tu'n tok jun tky'ajal, jun tchman ex jun ttxk'a tchman te rey kye aj Israel.

¹³Otoq b'ant 39 ab'q'i ttzyetlen tkawin Uzías aju rey te Judá, tej ttzyet tkawin Salum aju tky'ajal Jabes. Ex noq jun xjaw o kawin tuj Samaria,

¹⁴porke ate Manahem aju tky'ajal Gadi tzaj tuj Tirsa ex pon tuj Samaria, ok tzoqpaj ti'j Salum, kub' tb'yo'n, ex te tib'ajxi axtzun o kawin te t-xel.

¹⁵Aju ch'intl tx'olb'ab'en ti'j Salum, tuk'ix ti'j tej tjaw ti'n tib' ti'j Zacarías, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

¹⁶Kub'tzun t-xitun Manahem aju tnam Tifsa, ex e kub' tb'yo'n qe xjal ate' tuj tnam kyuk'ix qeju ate' ti'jele xi'x qe' tuj tnam Tirsa. Ax ikx ku'x tjaqo'n kyk'u'j kykyaqil qe xu'j ch'ixtoq tul itz'j kyal. Tb'incha ikju tu'nju kyk'i'toq xjal tu'n tok Manahem te kyrey.

¹⁷Otoq b'ant 39 ab'q'i ttzyetlen tkawin Azarías aju rey te Judá, tej ttzyet tkawin Manahem aju tky'ajal Gadi kyib'aj aj Israel, ex o kawin laj ab'q'i tuj Samaria.

¹⁸Ex aqeju tb'inchb'en mya b'a'n e ela tuj twitz Qman, porke minti' el tpa'n tib' kyi'j qe il tb'incha Jeroboam aju tky'ajal Nabat, aju e b'inchan qe aj Israel il tu'n.

¹⁹Ok tzoqpaj Pul aju rey te Asiria kyi'j aj Israel, ex atzunte Manahem xi tq'o'n wuq syent tuk'il 26 quintal saq pwaq te, tu'ntzun tonin ti'j tu'n tok tipumal tkawb'il.

²⁰Xi tq'o'n Manahem jun orden kye kykyaqil aj Israel aqeju q'inun, tu'n tchjet jun chojenj kyu'n, mas te jun libr saq pwaq tu'n junjun tu'ntzun tchjet aju tajlal lu te rey te Asiria. Kyja'tzun aj meltz'aj rey te Asiria tuj ttx'otx', ex minti' ten txqantl tuj kytx'otx' aj Israel.

²¹Aju ch'intl tx'olb'ab'en ti'j Manahem ex ti'j tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

²²Kyimtzun Manahem ex aju o kawin te t-xel, atzun Pekaía aju tky'ajal.

²³Otoq b'ant 50 ab'q'i ttzyetlen tkawin Azarías aju rey te Judá, tej ttzyet tkawin Pekaía aju tky'ajal Manahem kyib'aj aj Israel, ex o kawin kab'e ab'q'i tuj Samaria.

²⁴Ex mya b'a'n e ela qe tb'inchb'en tuj twitz Qman, porke minti' el tpa'n tib' kyi'j qe il tb'incha Jeroboam aju tky'ajal Nabat, aju e b'inchan qe aj Israel il tu'n.

²⁵Ex ax jun xjal at toklen ttxlaj, Peka tb'i, aju tky'ajal Remalías, jaw ti'n tib' ti'j, ex e onin 50 xinaq aj Galaad tuk'il, ok tzoqpaj ti'j tuj Samaria tuj ja ma' twa'l jatum kyokx qe soldad xq'uqil tja rey, ex kub' b'yo'n rey tu'n, tuk'ix Argob ex Arie. Te tib'ajxi ax o kawin te t-xel.

²⁶Aju ch'intl tx'olb'ab'en ti'j Pekaía ex ti'j tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

²⁷Otoq b'ant 52 ab'q'i ttzyetlen tkawin Azarías aju rey te Judá, tej ttzyet tkawin Peka aju tky'ajal Remalías kyib'aj aj Israel, ex o kawin winqin ab'q'i tuj Samaria.

²⁸Ex mya b'a'n e ela qe tb'inchb'en tuj twitz Qman, porke minti' el tpa'n tib' kyi'j qe il tb'incha Jeroboam aju tky'ajal Nabat, aju e b'inchan qe aj Israel il tu'n.

²⁹Tuj tq'ijlalil tej toktoq Peka te rey kyib'aj aj Israel, pon Tiglat-pileser aju rey te Asiria ex e tzyet qe tnam lu tu'n: Ijón, Abel-bet-maaca, Janoa, Cedes, Hazor, ex ju tx'otx' kye aj Galaad ex kye aj Galilea, tuk'ix tkyaqil tx'otx' kye tiyjil Neftalí, ex aqeju xjal najl kyuj e je'x ti'n pres tuj Asiria.

³⁰Jawtzun ti'n tib' Oseas aju tky'ajal Ela ti'j Peka aju tky'ajal Remalías, ok tzoqpaj ti'j ex kub' tb'yo'n. Kyja'tzun tten o kyaj ten te kawil te t-xel, tej otoq b'ant winqin ab'q'i ttzyetlen tkawin Jotam aju tky'ajal Uzías.

³¹Aju ch'intl tx'olb'ab'en ti'j Peka ex ti'j tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel.

³²Otoq b'ant kab'e ab'q'i ttzyetlen tkawin Peka aju tky'ajal Remalías, tej ttzyet tkawin Jotam aju tky'ajal Uzías tuj Judá.

³³Toktoq Jotam twi' 25 ab'q'i tej ttzyet tkawin, ex qaqlaj ab'q'i o kawin tuj Jerusalén. Aju ttxu' Jotam Jerusa tb'i ex tme'jel Sadoc.

³⁴B'a'n e ela qe tb'inchb'en Jotam tuj twitz Qman, ik tza'nx qe tb'inchb'en Uzías aju qtzan tman.

³⁵B'aj tb'incha'n aju tlamel te ttxa'n tpe'n tja Qman, aju tjawsa'n te jawni. Maske ikju, pero minti' e je'l ti'n qe ja in che ajb'en te kyk'ulb'il xjal kywi' qe witz, jatum kukx xi kyq'o'n tnam xjal qe chojb'il, ex kukx kub' kypatun storak.

³⁶Aju ch'intl tx'olb'ab'en ti'j Jotam ex ti'j tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Judá.

³⁷Tuj tq'ijlalil lu tzaj t-sama'n Qman Rezín aju rey te Siria, tuk'ix Peka aju tky'ajal Remalías, q'ojlel ti'j Judá, ex kukx e ul q'ojlel te tib'ajxi.

³⁸Tejtzun tkyim Jotam, ku'x maqu'n kyxol qtzan t-xe'chel tuj tnam Ttanmi David tb'i, aju qtzan t-xe'chel. Te tib'ajxi aju o kawin te t-xel, atzun Acaz aju tky'ajal.