Read kumam 2 Reyes 16 Bible Online

2 Reyes 16 - kumam bible

2 Reyes 16

¹Otoq b'ant wuqlaj ab'q'i ttzyetlen tkawin Peka aju tky'ajal Remalías, tej ttzyet tkawin Acaz aju tky'ajal Jotam, aju rey te Judá.

²Toktoq Acaz twi' winqin ab'q'i tej ttzyet tkawin, ex o kawin qaqlaj ab'q'i tuj Jerusalén, ex mya b'a'n e ela qe tb'inchb'en tuj twitz Qman aju Tdios; minti' o tb'incha ik tza'nx te David aju qtzan t-xe'chel,

³noq o'kx xi lpe' ti'j kyb'inchb'en qe rey kye aj Israel, asta kub' tpatun tky'ajal te chojb'il ik tza'nx costumr ik'b'ilxix in kyb'incha'n qe nasyon, aqeju otoq che ex tlajo'n Qman kywitz aj Israel.

⁴Ax ikx xi tq'o'n qe chojb'il ex kub' tpatun storak kyuj qe ja in che ajb'en te kyk'ulb'il xjal kywi' qe witz, ikx kywi' qe tal witz ex kyjaq' kykyaqil tze' pin kyxaq.

⁵Tuj tq'ijlalil lu, ate Rezín aju rey te Siria, tuk'ix Peka aju tky'ajal Remalías, aju rey kye aj Israel, e je'x tuj Jerusalén tu'n kyok tzoqpaj ti'j rey Acaz, ex b'aj kytxolb'an kyib' ti'jele tnam, ex minti' kub' ti'j kyu'n.

⁶Tzyet tnam Elat tu'n rey te Siria tu'n tok te kye aj Siria, e ex kylajo'n aj Siria qe aj Judá tuj tnam Elat. Atzun e ul aj Edom ex axtzun e kyaj ten najal tuj, ex ax ate' ja'lo.

⁷Atzunte Acaz xi t-sama'n junjun sanjel tuk'il Tiglat-pileser aju rey te Asiria, tu'ntzun t-xi kyma'n te kyja': Aqine ajb'el teya mer ik tza'n jun tky'ajala qine. Kyja'tzun tzaja ex chin tkloma twitz rey te Siria ex te rey kye aj Israel, aqeju nib'an kyok tzoqpaj wi'je.

⁸Ax ikx tzaj ti'n Acaz saq pwaq tuk'ix q'an pwaq at tuj tja Qman, ex kyuk'ix qe q'inumab'l ate' tuj tja rey, ex xi t-sama'n te jun oyaj te rey te Asiria.

⁹Tzajtzun tb'i'n rey aju tqanb'etz, ok tzoqpaj ti'j tnam Damasco ex tzyet tu'n; te tib'ajxi e je'x tpresin qe xjal najl tuj, atzun e pon ti'n tuj tnam Kir, ex kub' b'yo'n Rezín tu'n.

¹⁰Tejtzun t-xi' rey Acaz tuj tnam Damasco tu'n tk'ulb'ante tib' tuk'il Tiglat-pileser aju rey te Asiria, o til aju altar at ma chixin. Kub'tzun tb'incha'n jun tilb'ilal altar twitz jun u'j, ex xi t-sama'n tu'n tpon tuk'il pal Urías tu'ntzun tkub' tb'incha'n jun altar ik tza'nx jlu.

¹¹Kub'tzun tb'incha'n Urías jun altar ik tza'nx tilb'ilal otoq tzaj t-sama'n rey Acaz max tuj Damasco. Tej tul meltz'aj rey Acaz, otoq b'aj b'ant altar tu'n Urías.

¹²Tejtzun tul meltz'aj rey tajtzlenxi tuj Damasco, o til ju altar otoq b'aj b'ant, xitzun laq'e' ti'j ex kub' tq'o'n oyaj tib'aj.

¹³Ex kub' tpatun jun chojb'il tib'aj, tuk'ix toyaj ti'j twitz awal, kub' tqo'n toyaj ta'l twitz uva tib'aj altar, ex xi ttx'itpu'n kychk'el qe alumaj tib'aj, aqeju e je'x tq'o'n te chojb'il te mojb'ab'l tib'il.

¹⁴Atzunju altar q'an k'uxb'il, aju tkub' twitz tja Qman, aju kyaj ten t-xol ak'aj altar tuk'il tja Qman, el ti'n Acaz tuj tlugar ex kub' tq'o'n tumlal tb'anq'ab' q'ij te ak'aj altar.

¹⁵Te tib'ajxi xi tma'n te Urías kyja': Ja'lo, tib'aj ak'aj ma tij altar kb'el tpatuna oyaj aju patun in kub' te prim, tuk'ix oyaj ti'j twitz awal in xi q'ot te qale, tuk'ix toyaj rey patun in kub', ex toyaj ti'j twitz awal, tuk'ix kyoyaj tnam xjal patun in kub', ax ikx kyoyaj ti'j twitz awal ex ti'j ta'l twitz uva; ax ikx kxel ttx'itpu'na tib'aj altar tkyaqil kychk'el qe oyaj patun in che kub', ex qeju in che'x q'o'n te chojb'il. Atzunju altar q'an k'uxb'il, o'kx tu'n tajb'en te weye tu'n nq'ijine, chi Acaz.

¹⁶Tb'inchatzun pal Urías tkyaqil aju tma rey Acaz te.

¹⁷Eltzun ti'n rey Acaz qe tkyajil pak' kytxlaj kykyaqil kyq'uqb'il tkub'il a', ex el ti'n aju nintz pil tkub' kyib'aj qe tilb'ilal wakẍ q'an k'uxb'il qe, aqeju tzyulte nintz pil, ex kub' tq'o'n tib'aj txqan ab'j b'incha'maj.

¹⁸Ex tu'n ttzalaj rey te Asiria ti'j, el ti'n twitz tja Qman aju wa'lb'il tuk'ix ju xmuj tjawtoq tib'aj, aju otoq jaw b'incha'n tu'n tajb'en tuj q'ij te ojlab'l, ex kyaj tlamo'n ttzi ja tetz ti'jtzi, aju in ajb'en te rey tu'n tokx tuj tja Dios.

¹⁹Aju ch'intl tx'olb'ab'en ti'j Acaz ex ti'j tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey te Judá.

²⁰Tejtzun tkyim, ku'x maqu'n kyxol qtzan t-xe'chel tuj tnam Ttanmi David tb'i. Te tib'ajxi aju o kawin te t-xel, atzun Ezequías aju tky'ajal.