Read kumam 2 Reyes 20 Bible Online

2 Reyes 20 - kumam bible

2 Reyes 20

¹Tuj tq'ijlalil lu, tzyet Ezequías tu'n jun yab'il kyuwxix wen; atzunte Isaías aju t-sanjel Dios, aju tky'ajal Amoz, xi' ke'yilte ex xi tma'n te kyja': —Chi Qman in tma'n: Q'manxa kye qeju ate' tuj tjaya alkye tu'n tb'ant kyu'n, ok kymela ex mlay b'anixa tu'nju yab'il tok ti'ja.

²Atzunte Ezequías aj tq'o'n twitz twitz ja ex ok ten na'l Dios kyja':

³In chin kub'sane twitza Nman, tu'n ttzaj tna'na tza'n tten ma chin ajb'ene teya tuj tumelxix ex tz'aqlxix, ex ma nb'inchaye aju in tzalaja ti'j, chi Ezequías. Ex ok ten oq'el kyuwxix wen.

⁴Ex tej na'nxtoq te'lel Isaías ttxa'n pe'n twitz tja rey, tzaj yolin Qman te ex tma kyja':

⁵Taj meltz'aja ex q'manxa te Ezequías aju nejenel kye tnam xjal etzan wu'ne kyja': Ate Qman, aju Tdios David aju qtzan t-xe'chela in tma'n kyja': Ma nb'iye aju tna'j Diosa ex ma wile ta'l twitza ma tz'etz. Kb'antela wu'ne teju yab'il tok ti'ja, ex tuj toxin q'ij ja'lo jaku txi'ya tuj njaye.

⁶K'anq'ila olaj ab'q'itl wu'ne. Aya tuk'ix tnam Jerusalén che kletele wu'ne tuj tq'ab' rey te Asiria. K'okel nkwentine tnam lu noq tu'nju at nk'ujlalile ti'j David aju nmajene, ex tu'n tjaw nimsa'n nb'iye, chi Dios.

⁷Xitzun tma'n Isaías tu'n tb'aj che't txqan twitz higo; b'anttzun ikju ex ok kyq'o'n ti'j rey jatum tok kyaqk'u, ex b'anttzun rey.

⁸Atzunte Ezequías xi tqanin te Isaías: —¿Alkyetzun jun techal ktzajel yek'un weye tu'n tel nnik'e ti'j qa chin b'anixele tu'n Qman, ex qa tuj ox q'ij ja'lo chin xe'le tuj tja?

⁹Xi ttzaq'we'n Isaías: —Atzun jun techal lu ktzajel tyek'un Qman teya, tu'ntzun tel tnik'a ti'j qa kjapunel aju ma tzaj ttziyan: ¿Tajpeya tu'n t-xi laq'e' laj grad xlekun te reloj, ex qa tu'n taj laq'e' laj grad?

¹⁰Xi ttzaq'we'n Ezequías: —Qa ma txi laq'e' laj grad xlekun te reloj, mya kyuw te jlu. Aju mas kyuw, aju tu'n taj laq'e' laj grad.

¹¹Oktzun ten Isaías aju t-sanjel Dios kub'sal twitz Qman tu'n tb'ant jlu, ex tb'inchatzun Qman tu'n taj laq'e' laj grad xlekun, aju otoq marcarinjtz tu'n reloj tkub' ti'j tqan q'ij, aju otoq b'ant tu'n rey Acaz.

¹²Tuj tq'ijlalil lu, o tb'i Merodac-baladán aju tky'ajal Baladán ex rey te Babilonia qa otoq yab't Ezequías, ex e tzaj t-sama'n junjun sanjel q'olte u'j ex oyaj te.

¹³E tk'amtzun Ezequías qe sanjel ex xi tyek'un qe tq'inumab'l kye; aju saq pwaq ex ju q'an pwaq, kyuk'ix qe perjum, tuk'ix aseyt tb'anilxix, tuk'ix jatum k'u'n qe makb'il in che ajb'en tuj q'oj, ex tuk'ix tkyaqilju at tuj k'ub'l tq'inumab'l. Minti' jun ti'xti at tuj tja rey ex tuj enter tkawb'il minti'wt xi tyek'un.

¹⁴Xi'tzun Isaías aju t-sanjel Dios tuk'il rey Ezequías, ex xi tqanin te: —¿Jatum ma che tzaj qe xinaq lu, ex ti ma kyma teya? Xi ttzaq'we'n Ezequías: —Ma che tzaj tuj jun tx'otx' najchaq wen; max ẍe tzaj tuj Babilonia.

¹⁵Xi tqanintl Isaías te: —Ex ¿ti ma kyil tuj tjaya? Xi ttzaq'we'n Ezequías: —Ma kyil tkyaqil aju at tuj njaye. Minti' jun ti'xti kyxol qe nq'inumab'le minti'wt ma txi nyek'une kye.

¹⁶Xitzun tma'n Isaías te Ezequías: —B'intza aju ma tma Qman:

¹⁷Kpol tq'ijlalil che elex q'i'n kykyaqil qe ti'xti ate' tuj tjaya, tuk'ix tkyaqilju o b'aj kychmo'n qtzan t-xe'chela ojtxi, che xe'l q'i'n tu'n kypon tuj Babilonia. Minti' jun ti'xti kyjel ten tzalu.

¹⁸Kyuk'ixpe junjun tiyjila che ul itz'j te tib'ajxi che xel q'i'n tuj Babilonia, ex che okel q'o'n te majen tuj tja rey, chi Isaías.

¹⁹Xi tma'n Ezequías te Isaías: —Aju tqanil ma tzul ti'na aju ma tzaj tma'n Qman, b'a'n te jlu, tu'nju kub' t-ximan qa minti' jun ti'xti tu'n ttzaj ti'j, ex qa kukx tu'n tten tzalajb'il akux itz'xtoq.

²⁰Aju ch'intl tx'olb'ab'en ti'j Ezequías ex kyi'j qe tb'inchb'en ma'xix kyxilen, ex ti'j tza'n tten b'ant tanke te a' tu'n, ex ti'j tb'e a' okx tlaku'n tjaq' tx'otx' tu'n tpon a' tuj tnam, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey te Judá.

²¹Tejtzun tkyim Ezequías aju o kawin te t-xel, atzun Manasés aju tky'ajal.