Read kumam 2 Reyes 21 Bible Online

2 Reyes 21 - kumam bible

2 Reyes 21

¹Toktoq Manasés twi' kab'laj ab'q'i tej tok te rey ex o kawin 55 ab'q'i tuj Jerusalén. Aju ttxu' Manasés Hepsiba tb'i.

²Ex mya b'a'n e ela qe tb'inchb'en tuj twitz Qman, porke o tb'incha axju mya b'a'n in kyb'incha'ntoq qe nasyon otoq che ex tlajo'n Qman kywitz aj Israel.

³E jaw tb'incha'n juntl maj qe ja te kyk'ulb'il xjal kywi' qe witz, aqeju otoq che kub' t-xitun Ezequías aju qtzan tman; e jaw tb'incha'n qe altar twitz tilb'ilal Baal, ex kub' tb'incha'n jun tilb'ilal xu'j dios Asera, ik tza'n o tb'incha Acab aju rey kye aj Israel; ax ikx o k'ulun twitz q'ij, twitz xjaw ex kywitz kykyaqil che'w.

⁴Ex e jaw tb'incha'n qe altar tuj tja Qman, jatum otoq tma Qman qa atzun tu'n ttzaj na'n tb'i te jumajx tuj Jerusalén.

⁵Jaw tb'incha'n txqantl altar tuj tnejel ex tuj tkab'in ttxa'n tpe'n tja Qman, ex e ajb'en tu'n tu'n kyk'ulun xjal twitz q'ij, twitz xjaw ex kywitz kykyaqil che'w.

⁶Ax ikx kub' tpatun tk'wa'l te chojb'il, o xnaq'tzan ti'j tu'n tb'ant tq'ijin ex tu'n kytxket kyanmi kyimni tu'n, ex e ok tq'o'n qe xjal spiritist ex qe xjal b'a'n che ky'a'n tu'n kyten kyxol xjal. Jumajx mya b'a'n e ela qe tb'inchb'en tuj twitz Qman, ex tu'n jlu tzaj tq'oj Qman ti'j.

⁷Ax ikx okx tq'o'n tuj tja Dios jun tilb'ilal xu'j dios Asera, aju b'aj tb'incha'n. Ex otoq tma Dios te David ex te Salomón aju tky'ajal kyja': Aju tja Dios at tuj Jerusalén, aju tnam o jaw nsk'o'ne kyxol kykyaqil k'loj kyiyjil aj Israel, atzun ktzajel na'n nb'iye tuj te jumajx.

⁸Mlay che ex nlajo'ntle qe aj Israel tuj tx'otx' xi nq'o'ne kye qe kyxe'chel qa ma che japun nleye kyu'n, ex qa ma kyb'incha tkyaqil aju o txi nma'ne kye, ex qa ma japun kykyaqil nxnaq'tzb'ile kyu'n, aju xi tma'n nmajene Moisés kye, chi Dios.

⁹Atzun kye minti' xi kyb'i'n. A Manasés xi q'inte kye tuj b'e mya b'a'n, ex mas nim mya b'a'n o kyb'incha ik tza'n in kyb'incha'ntoq qe nasyon otoq che naj tu'n Qman kywitz.

¹⁰Kyja'tzun tzaj yolin Qman kyuk'il qe t-sanjel, aqeju tmajen, chi kyja':

¹¹Ma tb'incha Manasés nimku mya b'a'n, mas nimxix mya b'a'n ma tb'incha ik tza'n in kyb'incha'n aj Amorreo, aqeju ate'toq tuj tx'otx' nej. Ex tu'n Manasés ma che b'inchan aj Judá il, tu'nju ma che ok ten k'ulul kywitz tilb'ilal kydios xjal.

¹²Tu'ntzun jlu, aqine Kymane, aju Kydios aj Israel, in chin q'mante jlu: Ktzajel wi'ne mya b'a'n kyib'aj aj Jerusalén ex kyib'aj aj Judá, okxi tel twinqil kyẍkyin qeju che b'il ti'j.

¹³Kb'el nxitune tnam Jerusalén ik tza'n o tenb'a tnam Samaria wu'ne, ex b'i'x che najel qe aj Jerusalén wu'ne, ik tza'n o tenb'a Acab wu'ne kyuk'ix qe tiyjil. Kyjel ten tnam Jerusalén minti' jun xjal tuj, ik tza'n in b'aj tx'jet jun plat, nne'l su't a' ti'j ex in kub' mutzb'at.

¹⁴Atzun ch'intl tnam xjal etzan wu'ne, che kyjel nkoline ex che xel nq'o'ne tuj kyq'ab' qe aj q'oj kyi'j, tu'ntzun tel q'i'n tkyaqilju at kye ex tu'n tkub' kyi'j kyu'n.

¹⁵Porke aju kyb'inchb'en puro mya b'a'n ma tz'el tuj nwitze, ex kukx in tzaj nq'oje kyu'n, atxix tuj q'ij tej kyetz wi'ne qe kyxe'chel tuj Egipto ex kukx ja'lo, chi Dios.

¹⁶Tu'n kylaj qe il tb'incha Manasés, kyja'tzun e b'inchan qe aj Judá il tu'n. Tu'ntzun jlu, jumajx mya b'a'n e ela qe kyb'inchb'en tuj twitz Qman. Mya o'kx jlu, ax ikx e kub' tb'yo'n Manasés nimku xjal minti' kyil tuj Jerusalén, ex o noj enter tnam Jerusalén tu'n kychk'el xjal.

¹⁷Aju ch'intl tx'olb'ab'en ti'j Manasés ex ti'j tkyaqilju o tb'incha, kyuk'ix qe il e b'ant tu'n, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Judá.

¹⁸Tejtzun tkyim, ku'x maqu'n t-xol tqan awal te tja rey, aju tqan tawal Uza. Te tib'ajxi aju o kawin te t-xel, atzun Amón aju tky'ajal.

¹⁹Toktoq Amón twi' 22 ab'q'i tej tok te rey, ex o kawin kab'e ab'q'i tuj Jerusalén. Aju ttxu' Amón Mesulemet tb'i, aju aj Jotba, ex tme'jel Haruz.

²⁰Ex jumajx mya b'a'n e ela qe tb'inchb'en tuj twitz Qman, ik tza'nx qe tb'inchb'en Manasés aju qtzan tman,

²¹ex xi lpe' ti'j mya b'a'n tb'incha qtzan tman, ex o k'ulun kywitz qe tilb'ilal aqeju otoq k'ulun qtzan tman kywitz.

²²Kyja'tzun kyaj tkolin Amón Qman, aju Kydios qtzan t-xe'chel, ex minti' xi tniman tyol.

²³Qe xjal at kyoklen ttxlaj jaw kyi'n kyib' ti'j ex kub' kyb'yo'n tuj tja, aju tja rey.

²⁴Ex qe tnam xjal e kub' kyb'yo'n qeju otoq che kub' b'yonte te rey Amón, ex ok kyq'o'n Josías aju tky'ajal, te rey.

²⁵Aju ch'intl tx'olb'ab'en ti'j Amón ex ti'j tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Judá.

²⁶Ku'x maqu'n Amón tuj tpantyón tkub' tuj tqan tawal Uza. Te tib'ajxi aju o kawin te t-xel, atzun Josías aju tky'ajal.