Read kumam 2 Reyes 24 Bible Online

2 Reyes 24 - kumam bible

2 Reyes 24

¹Tuj tq'ijlalil tej in kawintoq Joacim, ul Nabucodonosor aju rey te Babilonia ex okx tzoqpaj q'ojlel tuj tx'otx', atzunte Joacim kyaj ten ox ab'q'i tjaq' tkawb'il. Ch'expettzun tnab'l Joacim ex jaw ti'n tib' ti'j.

²Ex e tzaj t-sama'n Qman txqan eleq' ti'j Joacim; at aj Caldeos, at aj Siria, at aj Moab ex at aj Amón. E tzaj t-sama'n qe jlu kyi'j aj Judá tu'ntzun kynaj kyu'n, ik tza'n otoq tma Qman kye qe tmajen aqeju t-sanjel.

³Tzaj jlu kyi'j aj Judá tu'nju otoq kub' t-ximan Qman tu'n tb'ant ikju, tu'ntzun mi'n kytentl twitz, tu'n kylaj kykyaqil qe il otoq tb'incha Manasés,

⁴ax ikx tu'n tlaj kychk'el qe xjal minti' kyil e kub' tb'yo'n ex o noj tuj tkyaqil tnam Jerusalén tu'n chik'. Kyja'tzun minti'x kub' tnajsa'n Qman til.

⁵Aju ch'intl tx'olb'ab'en ti'j Joacim ex tuk'ix tkyaqilju o tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey te Judá.

⁶Tejtzun tkyim aju o kawin te t-xel, atzun Joaquín aju tky'ajal.

⁷Aju rey te Egipto ya minti'tl etz tuj ttanmi, tu'nju otoq tz'el q'i'n tkyaqil tetzb'il tu'n rey te Babilonia, tzajx qe' ttzi tq'ab' xaq te Egipto ex pon b'aj max ttzi nima Éufrates.

⁸Toktoq Joaquín twi' wajxaqlaj ab'q'i tej tok te rey, ex noq ox xjaw o kawin tuj Jerusalén. Aju ttxu' Joaquín Nehusta tb'i, aju tme'jel Elnatán aju aj Jerusalén.

⁹Ex mya b'a'n e ela qe tb'inchb'en Joaquín tuj twitz Qman, ik tza'nx kyb'inchb'en qtzan t-xe'chel.

¹⁰Tuj tq'ijlalil lu kub' b'e kyu'n qe t-soldad Nabucodonosor aju rey te Babilonia tu'n kypon tuj Jerusalén, ex b'aj kytxolb'an kyib' ti'jele tnam tu'n kyok tzoqpaj ti'j.

¹¹Tej lu qe kytxolb'antoq kyib' ti'jele tnam, pon Nabucodonosor kyuk'il.

¹²Xitzun tq'on tib' Joaquín aju rey te Judá tuj tkwent rey te Babilonia, tuk'ix ttxu', kyuk'ix qeju at kyoklen ttxlaj, ex qe nejenel ex qe xinaq q'uqli tk'u'j kyi'j, e je'xtzun ti'n Nabucodonosor tu'n kyxi' q'i'n tuj juntl tx'otx' najchaq. O b'aj jlu tuj twajxaqin ab'q'i toklen Nabucodonosor te rey.

¹³Te tib'ajxitzun jlu, etz ti'n Nabucodonosor tkyaqil q'inumab'l tokx tuj tja Qman, tuk'ix aju tokx tuj tja rey. O b'ant jlu ik tza'nxju otoq tma Qman. E b'aj tpa'n kykyaqil qe makb'il q'an pwaq kytx'otx'il, aqeju otoq che b'aj b'ant tu'n Salomón aju rey kye aj Israel tu'n kyajb'en tuj tja Qman.

¹⁴E je'xtzun ti'n kykyaqil qe xjal aj Jerusalén tu'n kyxi' pres, kyuk'ix kykyaqil qe nejenel, ex qe soldad kyuw kyk'u'j tuj q'oj, ex kykyaqil qe xjal b'a'n che b'inchante tkyaqil txkaj aq'untl tb'anilxix, ex qe tx'inol k'uxb'il; laj mil japun kyb'et qe xjal e je'x ti'n. Minti' xjal kyaj ten tuj Judá, o'kx qe xjal mas meb'a e kyaj ten.

¹⁵Tuk'ix Joaquín xi ti'n Nabucodonosor pres, tuk'ix ttxu', ex qe t-xu'jil, kyuk'ix qe xjal at kyoklen ttxlaj, ex qe xjal mas ma' kyoklen tuj Judá. E ex q'i'n tuj Jerusalén tu'n kyxi' najal max tuj Babilonia.

¹⁶Wuq mil japun kyajlal xjal ma' kyoklen e je'x q'i'n tu'n rey te Babilonia; ex jun mil japun kyajlal xjal b'a'n che b'inchan tkyaqil txkaj aq'untl tb'anilxix ex qe tx'inol k'uxb'il, ex parttzun qe xinaq at nim kyipun ex at nim kynab'l tuj q'oj.

¹⁷Oktzun tq'o'n rey te Babilonia Matanías te rey te t-xel Joaquín. Ate Matanías terman tman Joaquín. B'aj tch'expu'n rey tb'i Matanías ex Sedequías juntl tb'i ok tq'o'n.

¹⁸Toktoq Sedequías twi' 21 ab'q'i tej tok te rey, ex junlaj ab'q'i o kawin tuj Jerusalén. Aju ttxu' Sedequías Hamutal tb'i, ex tme'jel Jeremías aju aj Libna.

¹⁹Ex mya b'a'n e ela qe tb'inchb'en tuj twitz Qman, ik tza'nx otoq tb'incha rey Joacim.

²⁰Kyja'tzun tzaj tq'oj Qman ti'j tnam Jerusalén ex kyi'j aj Judá, ex e ex tlajo'n tu'n mi'n kytentl twitz. Te tib'ajxi jaw ti'n tib' Sedequías ti'j rey te Babilonia.