Read kumam 2 Reyes 25 Bible Online

2 Reyes 25 - kumam bible

2 Reyes 25

¹Tuj laj tajlal tlajin xjaw te tb'elajin ab'q'i toklen Sedequías te rey, kub' b'e tu'n rey Nabucodonosor, kyuk'ix kykyaqil t-soldad, tu'n kyq'ojin ti'j tnam Jerusalén, ex b'aj kytxolb'an kyib' ti'jele. Ok kyjokan tx'otx' ti'j muro tu'n kyok tzoqpaj ti'j tnam.

²Kukxtoq txolin ti'j tnam tujxi tjunlajin ab'q'i toklen Sedequías te rey.

³Tuj b'elaj tajlal tkyajin xjaw te ab'q'i lu, tzaj nim we'yaj tuj tnam, ex ya minti'tl kywa xjal at.

⁴Extzun kyxoptz'i'n jun toy' muro tok ti'jele tnam, ex maske txolin ti'j tnam kyu'n aj Babilonia, ex te qonik'an ex oq rey tuj tnam kyuk'ix kykyaqil qe soldad. Ex atzun e ex ttzi tlamel tkub' kyxol kab'e muro, tuj b'e nne'x kyxol tqan tawal rey, ex atzun b'e xi kyi'n aju in ku'x tuj chq'ajlaj te nima Jordán.

⁵Ex e je'x lpe' qe soldad aj Babilonia ti'j rey Sedequías tu'n tkub' ti'j kyu'n, ex atzun kub' ti'j kyu'n tuj chq'ajlaj te tnam Jericó. Kykyaqil qe t-soldad otoq che el sputj ex otoq kyaj kolin kyu'n.

⁶Tzyettzun rey kyu'n aj Caldeos ex xi kyi'n twitz rey te Babilonia tuj tnam Ribla. Atzun kub' q'o'n t-sentens Sedequías tu'n Nabucodonosor,

⁷Xi tma'n Nabucodonosor tu'n kykub' b'yet qe tky'ajal Sedequías twitzx; atzunte Sedequías e jatz q'i'n qe tb'aq' twitz, ex b'aj k'alo'n tu'n caden tu'n t-xi q'i'n pres tuj Babilonia.

⁸Tuj twuqin q'ij te jwe'yin xjaw te tb'elajlajin ab'q'i toklen Nabucodonosor te rey tuj Babilonia, pon Nabuzaradán tuj Jerusalén. Aju xjal lu ma' toklen ex nejenel kye soldad kwentil tja rey Nabucodonosor.

⁹Ok tqoptz'i'n q'aq' ti'j tja Qman ex ti'j tja rey, ex kyi'j qe txqantl ja ate' tuj tnam, ax ikx kyi'j kyja kykyaqil xjal ma' kyoklen.

¹⁰Atzun kykyaqil qe soldad aj Caldeos aqeju e je'x tuk'il, b'aj kyxitun qe muro tok ti'jele tnam Jerusalén.

¹¹E je'xtzun ti'n Nabuzaradán qe xjal e knet tu'n tuj tnam, kyuk'ix qeju otoq txi kyq'on kyib' tuj tkwent rey te Babilonia, ex kyuk'ix junjuntl xjal, tu'n kypon ti'n tuj Babilonia.

¹²O'kx qe xjal mas tal meb'a e kyaj tq'o'n tu'n kyaq'nan tjaq' tqan uva ex tuj kojb'il.

¹³Atzun kye aj Caldeos b'aj kyb'uchin kykyaqil qe ti'xti q'an k'uxb'il ttx'otx'il aqeju ate' tuj tja Qman: qe tqan ja, qe tq'uqb'il tkub'il a' ex ju nintz pil, ex xi kyi'n tkyaqil q'an k'uxb'il lu tuj Babilonia.

¹⁴Ax ikx xi kyi'n qe k'il, qe palet, qe matzb'il tu'n kyel k'put kywi mech kye kandil, qe pak', kyuk'ix txqantl makb'il q'an k'uxb'il ttx'otx'il in che ajb'en tuj k'ulb'il.

¹⁵Ax ikx xi ti'n nejenel kye soldad kwentil tja rey kykyaqil ti'xti q'an pwaq ex saq pwaq kytx'otx'il, qe ẍla'k ex qe laq.

¹⁶Tu'nju nimxix, kyja'tzun minti' b'aj kymlo'n talil q'an k'uxb'il kyi'j kab'e tqan ja, tuk'ix nintz pil tkub'il a', ex qe kyq'uqb'il tkub'il a', aqeju tu'n Salomón xi tma'n tu'n kyb'aj b'ant tu'n kyajb'en tuj tja Dios.

¹⁷Kykab'il tqan ja b'elaj var twa'l junjun, ex tkub' jun adorn q'an k'uxb'il tuj twi' junjun te kab'e var tuk' mey twa'l, ex toksa'n q'an k'uxb'il kyi'jele xawk'in tten, ex kyoksa'n tilb'ilal karnad ẍoq' ti'j. Kykab'il tqan ja lu junx ta' b'inchb'en kye.

¹⁸Ax ikx aju tnejel pal Seraías tuk'ix tkab'in pal Sofonías, ex kyuk'ix ox kwentil ttzi tlamel tja Dios e je'x q'i'n pres tu'nju nejenel kye soldad.

¹⁹Ex kyxol qe xjal ax najlqetoq tuj tnam, xi ti'n Nabuzaradán aju xjal tok te nejenel kye soldad aj Judá, kyuk'ix jwe' xinaq in che ajb'en teku rey, tuk'ix ju nejenel kyi'j qe xjal in che pon q'i'n tu'n kyok te soldad, ex kyuk'ix 60 xinaq ma' kyoklen ate' tuj tnam.

²⁰Kykyaqil qe jlu e je'x ti'n Nabuzaradán twitz rey te Babilonia tuj tnam Ribla tuj tx'otx' Hamat, ex atzun ta'toq.

²¹Ex atzun xi tma'n rey tu'n kykub' b'yo'n. Kyja'tzun tten, e ex q'i'n qe xjal aj Judá tuj kytanmi tu'n kypon q'i'n tuj juntl tnam najchaq.

²²Ate Nabucodonosor aju rey te Babilonia ok q'onte Gedalías te gobernador, aju tky'ajal Ahicam ex tal tchman Safán, tu'ntzun tten te nejenel kyxol qe xjal otoq che kyaj ten tuj Judá.

²³Ex tej kyb'inte qe nejenel kye soldad tuj Judá ex qe txqantl xjal qa otoq tz'ok q'o'n Gedalías te gobernador tu'n rey te Babilonia, e je'xtzun ke'yilte tuj tnam Mizpa, kyuk'ix txqantl xjal kyuk'il. Atzun qe jlu e je'x: Ismael aju tky'ajal Netanías, Johanán aju tky'ajal Carea, Seraías, aju tky'ajal Tanhumet aju aj Netofa, ex tuk'ix Jaazanías tky'ajal jun xinaq aj Maaca.

²⁴Xi ttziyan Gedalías jun yol axix tok kye ex kye qe txqantl xinaq uk'in kyu'n, ex tma: —Mi'n che xob'e kywitz qe nejenel kye aj Caldeo, ax che tenkje tzalu tuj tx'otx' Judá ex che ajb'ene te rey te Babilonia; qa ma b'ant kyu'ne ikju, b'a'n k'elel te kyeye.

²⁵Ex tuj twuqin xjaw pon Ismael aju tky'ajal Netanías ex tal tchman Elisama, aju at t-xilen tuk'il rey te Judá, pon tuj Mizpa kyuk'ix laj xinaq tuk'il. Atzun qe e kub' b'yonte Gedalías kyuk'ix qe xjal aj Judá ex qe aj Caldeo, aqeju ate'toq tuk'il.

²⁶Atzun qe txqantl xjal e je'x oq tuj Egipto, tza'nx qe xjal ma' kyoklen ax ikx qe xjal ch'in kyoklen, kyuk'ix qe nejenel kye soldad e je'x oq, tu'nju tzaj kyxob'il kywitz qe aj Caldeo.

²⁷Tuj 27 tajlal tkab'lajin xjaw tej otoq b'ant 37 ab'q'i tokxlen presin Joaquín aju rey te Judá, tzaj q'aq'an tk'u'j Evil-merodac ti'j ex etz ti'n tuj pres. A jlu o b'ant tuj tnejel ab'q'i ttzyetlen tkawin Evil-merodac aju rey te Babilonia.

²⁸Puro b'a'n o tb'incha rey ti'j Joaquín, ex mas ma' ch'intl toklen ok tq'o'n kywitz qe txqantl rey ate' tuk'il tuj Babilonia.

²⁹Kyja'tzun tten el tch'expu'n Joaquín aju t-xb'alun toksa'n ti'j tuj pres, ex junx o wa'n junx tuk'il rey tkyaqil q'ij tejxi tkyim.

³⁰Tkyaqil q'ij o tk'am Joaquín jun onb'il te tu'n rey te Babilonia tuj tkyaqil tanq'ib'l.