Read kumam 2 Reyes 4 Bible Online

2 Reyes 4 - kumam bible

2 Reyes 4

¹Attoq jun xu'j, t-xu'jilb'en jun t-sanjel Dios, xi' q'malte te Eliseo kyja': —O kyim nchmile, ex b'a'n tu'na o niman te Qman. Atzun ja'lo ma tzul jun xjal tzaj q'onte tch'ex, ex taj tu'n kyxi ti'n qe kab'e wale tu'n kyok te tmajen, tu'ntzun tchjet k'as.

²Xitzun tma'n Eliseo te: —¿Alkye tajb'ila tu'n nb'inchanteye teya? Q'mantza weye alkye jun ti'xti at teya tuj tjaya, chi Eliseo. Xi ttzaq'we'n xu'j: —Aqine ajb'el teya, minti' jun ti'xti at tuj njaye, noq o'kx jun tal xar chib'j aseyt at.

³Xitzun tma'n Eliseo te: —Chux txi'ya ex qaninxa qe tmajena xar kye qe tvesina, chmon b'aja nimku xar, kykyaqil qeju minti' kyuj.

⁴Ex tokxtzuna tuj tjaya kyuk'ix qe tala, lamo'n etza tlamel ja ex nojsa'n ku'xa kykyaqil qe xar tu'n aseyt, ex part che b'el tq'o'na qeju otoq che noj.

⁵Ajtzun xu'j ex okx tuja kyuk'ix qe tal ex etz tlamo'n tja. Oktzun ten xu'j nojsalte kye xar aqeju in che pon kyi'n qe tal.

⁶Tejtzun kynoj kykyaqil qe xar, xi tma'n te jun tal kyja': —Q'intza txqantl xar. Ex xi ttzaq'we'n tal: —Ya minti' txqantl xar. B'i'xtzun we' tu'n tb'et aseyt.

⁷Te tib'ajxi jlu, xi' xu'j tuk'il t-sanjel Dios q'malte ti'j aju otoq b'ant, ex xi tma'n t-sanjel Dios te: —Txi'tzuna ja'lo k'ayilte aseyt ex chjon aja tk'asa. Ex aju kjel ten k'ajb'el teya ex kye qe tala tu'n kyanq'ine.

⁸At jun q'ij ik' aj Eliseo tuj tnam Sunem ex attoq jun xu'j ma' toklen najl tuj tnam lu, nimxix o kub'san twitz tu'n tik' Eliseo wa'l tja. Tkyaqil maj ok tik' Eliseo tuj tnam lu, atzun in wa'n.

⁹Atzunte xu'j xi tma'n te tchmil: —B'intza, b'a'n wu'ne aju xinaq lu kok'x nnik' aj visitarilte qe, jun xjal xjan, t-sanjel Dios te.

¹⁰¿Myape b'a'n tuj twitza tu'n tb'ant jun tal ja qu'n ma twi ja, tu'n tajb'en te te? Ex k'okex qq'o'n jun watb'il tuj, tuk'ix jun mes ex jun siy, tuk'ix jun kandil. Oktzun tik' b'etzalte qe, b'a'n tu'n tokx ten tuj, chi xu'j.

¹¹At jun q'ij pon Eliseo ex ax kyaj ten tuj tal ja lu, ma twi ja, ex ax o tan,

¹²ex xi tma'n te Giezi aju tmajen: —Txkontza aju xu'j aj Sunem. Tzajtzun txko'n xu'j tu'n majen, ex tej tpon xu'j twitz, xitzun tma'n Eliseo te tmajen:

¹³—Q'manxa te xu'j kyja': Puro b'a'n ma tb'inchaya qeye. ¿Alkye tajb'ila tu'n tb'ant qu'ne teya? ¿Tajpeya tu'n qyoline ti'ja twitz rey ex qa twitz nejenel kye soldad? Chikuya, txi tma'na te xu'j. —B'a'n atinwe kyxol qe nxjalile, chi xu'j tzaj ttzaq'we'n.

¹⁴¿Titzun kb'antel qu'n teju xu'j lu? Chi Eliseo. Xi ttzaq'we'n Giezi: —Aju xu'j lu minti' jun tal at, ex aju tchmil ya ma tijin.

¹⁵—Txkontza xu'j juntl maj, chi Eliseo. Xi'tzun ju majen txkolte xu'j, ex aju xu'j ax kub' we' ttzi ja.

¹⁶Xitzun tma'n Eliseo te: —Tuj juntl ab'q'i, ax tyemp jlu, tzul itz'j jun tala, ex kb'el tchle'na tuj tq'ab'a. Atzunte xu'j xi ttzaq'we'n: —Mi'n tat aya t-sanjel Dios, mi'n chin kub' t-sb'u'na.

¹⁷Ex o b'ant ik tza'nx o tma Eliseo, ok ten tal xu'j, ex tuj juntl ab'q'i ul itz'j jun tal.

¹⁸O ch'iy tal q'a. Pon jun q'ij, xi' ke'yilte tman, porke matoq ta' tman kyuk'il qeju in che chmon twitz awal,

¹⁹ex minab'en ok ten k'wa'l sch'il ti'j tman: —Ay nwi'ye, nchyo'n nwi'ye wen. Xitzun tma'n tman te jun majen: —Q'inxa k'wa'l lu tuk'il ttxu'.

²⁰Tzajtzun q'i'n k'wa'l tu'n majen ex xi q'i'n tuk'il ttxu'. Kub'tzun tq'uqb'a'n txub'aj twi tqan, ex tej tpon chilkuq'ij o kyim k'wa'l.

²¹Ex jax q'i'n k'wa'l tu'n ttxu' ma tuj tal ja in ajb'en te t-sanjel Dios ex kub' tq'o'n tib'aj watb'il. Etztzun, ex b'ix kyaj tlamo'n tlamel ja.

²²Tzaj ttxko'n naj tchmil ex xi tma'n te: —Samantza jun majen tu'n t-xi' wuk'ile tuk'ix jun bur, porke ma chinxe tuk'il t-sanjel Dios, ex ja'lo chin ul meltz'aje.

²³—¿Tiqu'n ma txi'ya lolte t-sanjel Dios ja'lo? Baqa tnejel q'ij te xjaw, ex baqa q'ij te ojlab'l jlu, chi tchmil xi tqanin. —Mi'n b'isuna, chi xu'j xi ttzaq'we'n.

²⁴Xitzun tma'n xu'j te tmajen tu'n tb'ant tten ju bur tu'n, ex xi tma'ntl te: —Qo', nejkuya. Mi'n qo we' tu'na tuj b'e; maxi qo web'il okxi t-xi nma'ne teya.

²⁵Kyja'tzun tten xi' xu'j ex pon twi witz Carmelo jatum ta'toq t-sanjel Dios. Tejtzun tke'yinte Eliseo xu'j lu najchaq kyja' ttzaj, xi tma'n te Giezi aju tmajen: —Ke'yinxa, lu ju xu'j aj Sunem tzul.

²⁶Qelinxa kanul ti'j, ex qaninxa te tza'n ta', ex tza'n ta' tchmil ex tal. Xi'tzun ju majen, atzunte xu'j tma qa b'a'n ate'toq.

²⁷Tejtzun tpon xu'j twi witz jatum ta'toq Eliseo, e tzaj tchle'n qe tqan Eliseo. Xitzun laq'e' Giezi tu'n tel tpa'n ju xu'j ti'j, ex xi tma'n Eliseo te: —E tten xu'j, porke nim tb'is at ex na'nx ttzaj tma'n Qman weye ti in b'aj.

²⁸Xitzun tma'n ju xu'j te Eliseo: —Tat, ¿baqa xi nqanine teya tu'n ttzaj jun wale? ¿Baqa minti' xi nma'ne teya tu'n mi'n nkub' t-sb'u'na?

²⁹Atzunte Eliseo xi tma'n te Giezi: —B'incham ttena, q'inxa nky'aqo'che ex txi'ya. Qa ma tz'ok tk'ulb'an tib'a tuk'il jun xjal, mi'n txi tq'olb'e'na; ex qa at jun ma tzaj q'olb'en teya, mi'n txi ttzaq'we'na. Oktzun tpona, b'ix kub' tq'o'na nky'aqo'che tib'aj twitz tal k'wa'l, chi Eliseo.

³⁰Atzunte ttxu' tal k'wa'l xi tma'n te Eliseo: —Kxel nma'ne jun yol axix tok twitz Qman ex twitza, mlay chin aj meltz'aje qa mya ajuna ma txi' wuk'ile. Xi'tzun Eliseo tuk'il xu'j.

³¹Otoq txi' nej Giezi kywitz, ex otoq kub' tq'o'n ky'aqo'ch tib'aj twitz tal q'a, ex aju tal q'a minti' ul tnab'l, kyja'tzun etz Giezi kanul ti'j Eliseo, ex xi tma'n te: —Aju tal k'wa'l minti' ma tzul tnab'l.

³²Tejtzun tokx Eliseo tuja, aju k'wa'l kyimnitoq ex pak'l tkub' twi watb'il.

³³Tokxlenxitzun Eliseo, etz tlamo'n ja ex ok ten na'l Dios. Tjunalx te kyaj ten tuk'il tal k'wa'l tuja.

³⁴Jaxtzun Eliseo twi watb'il ex kub' mutze' tib'aj tal k'wa'l, ok tmojb'a'n ttzi' tuk'il ttzi' tal k'wa'l, ax ikx qe tb'aq' twitz, ex qe tq'ab' junx kyuk'il qe tq'ab' tal k'wa'l, ex kub' tmojb'a'n t-ximlal tuk'il t-ximlal tal k'wa'l. Aju t-ximlal tal k'wa'l o qe' tu'n tok tmeq'majal.

³⁵Jawtzun we' Eliseo ex o b'etje' tik' wen ma tuja; jax juntl maj twi watb'il ex ok tmojb'a'n juntl maj t-ximlal tuk'il te tal k'wa'l. Minab'entzun tzaj asyamin wuq maj ttxa'n tal k'wa'l, ex e jaw ke'yin qe tb'aq' twitz.

³⁶Tzajtzun txko'n Giezi tu'n Eliseo, ex xi tma'n te: —Txkontza aju xu'j aj Sunem. Tzajtzun txko'n xu'j tu'n Giezi, ex tej tpon xu'j jatum ta' Eliseo, xi tma'n Eliseo te: —Q'inxa tala.

³⁷Xitzun laq'e' xu'j, ex kub' t-xo'n tib' twitz tx'otx' t-xe tqan Eliseo; tzajtzun ti'n tal ex etz tuja.

³⁸Te tib'ajxi jlu, aj meltz'aj Eliseo tuj Gilgal. Tuj tq'ijlalil lu tzaj nimxix we'yaj kyxol aj Israel, ex at jun maj lutoq qe t-sanjel Dios q'uql qe ti'jele Eliseo ex xi tma'n Eliseo te tmajen: Q'o'n jaxa ju k'il matij tib'aj q'aq', ex b'inchama ch'in chib'j tuk'il tk'ok'jal tu'n tajb'en kye qe t-sanjel Dios.

³⁹At jun kye xi' tuj kojb'il jyolte ch'in itzaj, ex ok noj ti'j jun wi' aq' tjaq' k'ul, tzaj ti'n junjun twitz, mer ik tza'n k'um, ex tu'n jlu noj t-ẍjo'w. Tejtzun tul meltz'aj ok ten paẍulte kye ex ku'x tq'o'n tuj chib'j, minti'toq b'a'n tu'n ti jil qe jlu.

⁴⁰Te tib'ajxi xi q'o'n te kychi' qe t-sanjel Dios, ex tejtzun t-xi kynik'b'e'n aju chib'j, e jaw sch'in: —Aya t-sanjel Dios, aju chib'j lu at venen tuj. Ex ya minti'tl xi kychyo'n.

⁴¹Xitzun tma'n Eliseo: —Kyi'ntza ch'in arin. Tejtzun tku'x tq'o'n arin tuj k'il, xi tma'n kye: —Chuxtzun kyq'onxe kychi' qe xjal ja'lo. Ex xitzun kychyo'n qe xjal, ex ya minti'tl jun mya b'a'n at tuj k'il tkub'il chib'j.

⁴²Te tib'ajxi, pon jun xinaq tzajni tuj lugar Baal-salisa, xi tq'o'n te Eliseo winqin pan sebad matoq tetzlen tuj jorni, tuk'ix triw ak'aj tku'x tuj tpa. Xitzun tma'n Eliseo te tmajen: —Q'onxa jlu kye qe xjal tu'ntzun kywa'n ti'j.

⁴³Ex xi ttzaq'we'n majen: —¿Tza'n tten tu'n t-xi nq'o'ne jlu te kye jun syent xjal? Xi ttzaq'we'n Eliseo: —Q'onxa kye xjal tu'ntzun kywa'n, porke ma tma Qman tu'n kywa'n ex atx kjel ten.

⁴⁴Kyja'tzun xi tq'o'n majen kywa, ex e wa'ntzun qe xjal, ex atx wab'j kyaj ten ik tza'nx otoq tma Qman.