Read kumam 2 Reyes 8 Bible Online

2 Reyes 8 - kumam bible

2 Reyes 8

¹Otoq txi tma'n Eliseo te xu'j aju otoq jaw anq'in tal, tu'n t-xi' najal tuj juntl lugar kyuk'ix qeju ate' tuj tja, tu'nju otoq tma Qman qa tu'n ttzaj jun nintz we'yaj tuj tx'otx' lu, ex wuq ab'q'i tu'n tten.

²B'anttzun tten xu'j ex tb'incha ik tza'nx otoq txi tma'n t-sanjel Dios te; xi' kyuk'ix qeju ate' tuj tja tuj tx'otx' kye aj Filisteo, ex matzun kyaj ten najal ma chixin wuq ab'q'i.

³Tb'ajlenxi wuq ab'q'i ajtztzun meltz'aj xu'j tuj kytx'otx' aj Filisteo, ex xi' tuk'il rey qanilte tu'n tajtz q'o'n juntl maj tja ex ttx'otx'.

⁴In yolintoq rey tuk'il Giezi aju tmajen Eliseo aju t-sanjel Dios, ex otoq txi tqanin tu'n ttzaj q'ma'n te kykyaqil qe b'inchb'en ma'xix kyxilen otoq che b'ant tu'n Eliseo.

⁵Ex tujx or lu, tej in q'mantoq Giezi te rey ti'j tza'n tten otoq jaw anq'in tal jun xu'j tu'n Eliseo, tej tpon ju xu'j yolil tuk'il rey ti'j tja ex ti'j ttx'otx'. Xitzun tma'n Giezi te: —Tat Rey, atzun xu'j lu, ex atzun tal lu aju jaw anq'in tu'n Eliseo.

⁶Xitzun tqanin rey te xu'j ti otoq b'aj ti'j, ex tzaj tma'n xu'j aju otoq b'aj ti'j. Te tib'ajxi xi tma'n rey te jun xjal at toklen ttxlaj tu'n taj tq'o'n juntl maj tkyaqil tetzb'il xu'j, tuk'ix tkyaqil twi' twitz awal aju otoq tzaj tq'o'n ju tx'otx' atxix tej tex xu'j tuj ttx'otx' ex tejxi tpon meltz'aj.

⁷Te tib'ajxi jlu, xi' Eliseo tuj tnam Damasco. Tuj tq'ijlalil lu otoq yab't Ben-adad aju rey te Siria, ex xi q'ma'n te qa otoq pon t-sanjel Dios.

⁸Xitzun tma'n rey te Hazael: —Q'inxa jun oyaj ex txi'ya tuk'il t-sanjel Dios, ex q'manxa te tu'n t-xi tqanin te Qman qa ok chin b'anixele tu'nju yab'il lu.

⁹Xi'tzun Hazael tuk'il t-sanjel Dios, ex xi ti'n qe oyaj, aqeju mas tb'anil at tuj Damasco, iqan kyu'n 40 chej camey. Tejtzun tpon twitz xi tma'n te: —Ate Ben-adad aju rey te Siria ik tten ik tza'n tk'wa'la, ex ma chin tzaj sama'ne tu'n, tu'n t-xi nqanine teya qa tu'n tb'anix teju yab'il tok ti'j.

¹⁰Xitzun tma'n Eliseo te: —Txi'ya ex q'manxa te kyja': Kb'anixela teju yab'il, chikuya te. Pero ma tzaj tyek'un Qman weye qa ilxix ti'j tu'n tkyim.

¹¹Axtzun xi b'aj twitz Eliseo ti'j Hazael, ex tu'n jlu tzaj tch'ixwi Hazael. Ok ten t-sanjel Dios oq'el,

¹²ex xi tqanin Hazael te: —¿Tiqu'n in oq'a, Tat? Xi ttzaq'we'n Eliseo: —Porke b'a'n wu'ne, ok tb'incha'ya mya b'a'n kyi'j aj Israel, k'okel tq'o'na kyq'aq'al qe ja te kykolb'il kyib', che b'el tb'yo'na tu'n spad qe ku'xun at kyxol, che b'el t-xo'na qe k'wa'l twitz tx'otx' tu'n kykyim, ex kb'elex tjaqo'na kyk'u'j qe xu'j ch'ixtoq tul kyal, chi Eliseo.

¹³Xi ttzaq'we'n Hazael: —¿Tza'n tten tu'n nb'inchanteye jun ti'xti ik tza'n jlu? Porke aqine minti' woklene, ik ntene ik tza'n jun tx'yan. Atzunte Eliseo xi ttzaq'we'n: —Ma tzaj tyek'un Qman weye qa aya k'okel te rey kye aj Siria.

¹⁴B'ajtzun tq'olb'en tib' Hazael tuk'il Eliseo ex xi'tzun tuk'il tpatrón, ex xi tqanin rey te: —¿Ti ma tma Eliseo teya? —Ma tma weye qa ok b'anixela teju yab'il, chi Hazael xi ttzaq'we'n.

¹⁵Ex tuj juntl q'ij xi' Hazael, tzaj ti'n jun xb'alun, ok tak'sa'n tu'n a', kub' tq'o'n tib'aj twitz rey, ex tu'n jlu b'i'x kyim rey. Te tib'ajxi jlu, atzun Hazael o kawin te t-xel.

¹⁶Lajo'ntoq jwe' ab'q'i ttzyetlen tkawin Joram aju tky'ajal Acab kyxol aj Israel, tej ttzyet tkawin Joram aju tky'ajal Josafat tuj Judá.

¹⁷Otoq japun 32 ab'q'i tu'n Joram tej ttzyet tkawin, ex wajxaq ab'q'i o kawin tuj Jerusalén.

¹⁸Ex xi lpe' ti'j kyb'inchb'en qe rey kye aj Israel ex kyi'j qe tiyjil Acab, porke o moje' tuk'il jun tme'jel Acab; kyja'tzun, aju tb'inchb'en mya b'a'n ela tuj twitz Qman.

¹⁹Ex minti' tajb'e Qman tu'n kynaj aj Judá, noq tu'nju tk'ujlalil ti'j David, ex tu'nju otoq txi ttziyan te qa kukx tu'n kyten qe tiyjil te rey.

²⁰Tuj tq'ijlalil tej tkawin Joram, jaw kyi'n kyib' aj Edom ti'j Judá tu'n mi'n kukx kyten tjaq' tkawb'il, ex ok kyq'o'n jun kyex kyrey.

²¹Xi'tzun Joram tuj tnam Zair kyuk'ix kykyaqil qe tcarwaj in che ajb'en tuj q'oj, b'aj kytxolb'an kyib' aj Edom kyi'jele. Jawtzun we' Joram te qonik'an kyuk'ix qe nejenel kye tcarwaj, e ok tzoqpaj kyi'j aj Edom, ex e je'l oq qe t-soldad Joram ex e aj meltz'aj kyja.

²²Kyja'tzun tten etz Edom tjaq' tkawb'il Judá ex kukx tten ja'lo. Ex ax tyemp lu etz tnam Libna tjaq' tkawb'il Judá.

²³Aju ch'intl tx'olb'ab'en ti'j Joram ex ti'j tkyaqilju tb'incha, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey te Judá.

²⁴Tejtzun tkyim Joram, ku'x maqu'n kyxol qtzan tman tuj tnam Ttanmi David tb'i. Te tib'ajxi aju o kawin te t-xel, atzun Ocozías aju tky'ajal.

²⁵Otoq b'ant kab'laj ab'q'i ttzyetlen tkawin Joram aju tky'ajal Acab kyib'aj aj Israel, tej ttzyet tkawin Ocozías aju tky'ajal Joram aju rey te Judá.

²⁶Toktoq Ocozías twi' 22 ab'q'i tej ttzyet tkawin, ex jun ab'q'i o kawin tuj Jerusalén. Aju ttxu', Atalía tb'i, aju tal tchman Omri, aju otoq ten te rey kye aj Israel.

²⁷Ok lpe' Ocozías ti'j tb'inchb'en Acab ex ti'j kyb'inchb'en qe tiyjil. Mya b'a'n e ela qe tb'inchb'en tuj twitz Qman, tu'nju o moje' tman tuk'il jun tme'jel Acab.

²⁸Moje' tyol Ocozías tuk'il Joram aju tky'ajal Acab, tu'n kyxi' q'ojlel ti'j Hazael aju rey te Siria, max tuj tnam Ramot aju at tuj Galaad. Ex o k'ixb'i Joram kyu'n aj Siria.

²⁹Ajtztzun meltz'aj Joram tu'n tul tuj tnam Jezreel tu'n tq'anit ẍil ti'j, aju otoq tza'w kyu'n aj Siria tuj tnam Ramot, tuj q'oj otoq tz'ok tuk'il Hazael aju rey te Siria. Tu'nju otoq tza'w Joram, xi'tzun Ocozías ke'yilte max tuj tnam Jezreel.