Read kumam 1 Crónicas 10 Bible Online

1 Crónicas 10 - kumam bible

1 Crónicas 10

¹E ok tzoqpaj aj Filisteo q'ojlel kyi'j aj Israel, ex atzun kye aj Israel e el oq kywitz, ex nimku e kyim twi witz Gilboa.

²Atzun kye aj Filisteo e ok lpe' q'ojlel ti'j Saúl ex kyi'j qe tky'ajal. Kub' b'yo'n Jonatán kyu'n, tuk'ix Abinadab ex Malquisúa.

³Te tib'ajxi e ok tzoqpaj ti'j Saúl, ex ch'ixtoq kypon kanun ti'j ok kyk'ixb'isa'n tu'n kyplech.

⁴Kyja'tzun xi tma'n Saúl teju onil te: Q'in jatz t-spadiya ex chin t-xayunkuya tu'n, tu'ntzun mi'n kyul qe xjal mya nimal Dios wi'je ex tu'n mi'n kyxmayin wi'je. Ex aju onilte minti' kub' tuj twitz tu'n tb'inchante ikju, tu'nju tzaj nim t-xob'il ti'j. Jatztzun ti'n Saúl t-spad ex xi tmutzq'in tib' tib'aj twi t-spad.

⁵Tejtzun tke'yinte ju onilte qa otoq kyim Saúl, ax ikx te xi tmutzq'in tib' tib'aj twi t-spad ex kyim.

⁶Kyja'tzun, tuj q'ij lu kyim Saúl kyuk'ix qe oxe tky'ajal ex kykyaqil qeju at kyoklen ttxlaj.

⁷Ex tej kylonte kykyaqil aj Israel aqeju najlqe tuj chq'ajlaj, qa otoq che el oq qe kysoldad ex otoq kyim Saúl kyuk'ix qe tky'ajal, kyajtzun kykolin qe kytanmi, ax ikx kye e je'l oq. E pon aj Filisteo kyuj qe kytanmi ex axtzun e kyaj ten najal kyuj.

⁸Tuj juntl q'ij, tej kyxi' aj Filisteo tu'n tel kyi'n tkyaqil ti'xti q'i'n kyu'n qe kyimni, knet Saúl kyu'n, kyuk'ix qe tky'ajal, kyimni qe twi witz Gilboa.

⁹Eltzun kyi'n t-xb'alun Saúl ex el kytamtz'u'n twi', ex xi kyi'n kyuk'ix qe tmakb'il in che ajb'en tuj q'oj, ex xi kysama'n qe sanjel kyuj kykyaqil kytanmi tu'ntzun t-xi q'ot tqanil kye xjal, ax ikx kye kydios.

¹⁰Ex qe tmakb'il Saúl in che ajb'en tuj q'oj ok kyyob'an tuj tja kydios, ex atzunju twi' jaw kyyob'an tuj tja juntl kydios Dagón tb'i.

¹¹Ex tej kyb'inte qe aj Jabes, aju tnam at tuj tx'otx' Galaad, ti'j ju otoq kyb'incha aj Filisteo ti'j Saúl,

¹²b'ant ti'j kyu'n kykyaqil xinaq kyuw kyk'u'j, tu'n kyxi' q'ilte t-ximlal Saúl ex kyximlal qe tky'ajal, ex pon kyi'n max tuj tnam Jabes. Atzun ku'x kymaqu'n kyximlal t-xe' jun wi' tze' k'ol. Te tib'ajxi kub' kyyo'n wuq q'ij we'yaj.

¹³Kyja'tzun tten kyim Saúl tu'n tlaj ju mya b'a'n otoq b'ant tu'n, o b'inchan il tu'nju minti' xi tniman tkawb'il Qman ex tu'nju xi tqanin t-xjel te jun xu'j b'a'n q'ijin,

¹⁴ex minti' xi tqanin te Qman. Kyja'tzun kyim Saúl tu'n Qman, ex aju kawb'il xi tq'o'n Qman te David aju tky'ajal Isaí.