Read kumam 1 Crónicas 11 Bible Online

1 Crónicas 11 - kumam bible

1 Crónicas 11

¹Ok kychmon kyib' kykyaqil aj Israel tu'n kyxi' yolil tuk'il David tuj tnam Hebrón, ex atzun xi kyma'n te kyja': Ax termaniya qo'ye,

²axix tok, maske atoq te Saúl tok te rey, pero aya in xi ẍaqlunte kye aj Israel tuj q'oj. Ax ikx o tzaj tma'n Qman aju Tdiosa teya kyja': Aya k'okel kwentin kye xjal etzan wu'ne, ex aya k'okel te nejenel kye, che chi aj Israel.

³Kyja'tzun tten e je'x kykyaqil qe kytijil xjal aj Israel yolil tuk'il David max tuj tnam Hebrón; atzunte David b'ant ti'j jun tyol kyuk'il, ex ok tq'o'n Qman te testiw ti'j. Atzun kye ok kyq'o'n toklen David tu'n tok te rey kyib'aj aj Israel, ik tza'n otoq tzaj ttziyan Dios te Samuel.

⁴E je'x David kyuk'ix kykyaqil aj Israel tuj Jerusalén aju tok juntl tb'i Jebús. Atzun najl qe aj Jebuseo tuj tx'otx' lu,

⁵ex xi kyma'n te David: Teya mlayx tz'oktza tzalu, che chi. Maske ikju, pero kub' ti'j cuartel tuj Sión tu'n David, aju tok tb'i ja'lo Ttanmi David.

⁶Atzunte David otoq tma kyja': Alkye ma tz'ok tzoqpaj q'ojlel tnejel kyi'j aj Jebuseo, k'okel nq'o'ne toklen te nejenel kye soldad, chi David. Ex aju ok tzoqpaj tnejel tu'n tq'ojin, atzun Joab aju tal Sarvia, ex oktzun q'o'n toklen xjal lu te nejenel kye soldad.

⁷Atzunte David ax kyaj ten najal tuj cuartel; tu'ntzunju ok kyq'o'n tb'i lugar lu Ttanmi David.

⁸Ex jaw tb'incha'n David tnam ti'jele, xi qe' ti'j lugar otoq b'aj nojsa'n tuj tu'n tok te chq'ajlaj, ex jaw tb'incha'n muro tkyaqil ti'jele. Atzunte Joab xi tb'incha'n mijtl tnam.

⁹Aju tipumal David kyja' t-xi' jawni ex attoq Qman tuk'il, aju Tajaw Tkyaqil.

¹⁰Atzun qe soldad lu ate' tuk'il David mas kyuw kyk'u'j tuj q'oj, ax ikx e onin ti'j tu'n tkawin, kyuk'ix kykyaqil aj Israel, ex ok kyq'o'n David te rey, ik tza'nx otoq kyaj tma'n Qman kye.

¹¹Atzun jun tajlal lu kyi'j qe soldad kyuw kyk'u'j tuj q'oj ate' tuk'il David: Ox kyb'aj soldad kyuwxix kyk'u'j tuj q'oj, ex ate Jasobeam aju tky'ajal Hacmoni tok te nejenel kye. At jun maj kub' tb'yo'n ox syent xinaq tu'n tlans.

¹²Atzun tkab'in Eleazar tb'i, aju tky'ajal Dodo aju aj Ahohitas, atzun jun kyxol qeju oxe kyuwxix kyk'u'j tuj q'oj.

¹³Ate Eleazar o ten tuk'il David tuj Pas-damim tej tok kychmon kyib' aj Filisteo tuj lugar lu tu'n kyq'ojin kyi'j aj Israel. Tuj lugar lu attoq jun kojb'il awa'n tqan sebad tuj, ex tej kyel oq qe soldad aj Israel kywitz aj Filisteo,

¹⁴atzunte Eleazar minti' el oq, ax kyaj we' kywitz aj Filisteo tuj tmij kojb'il kyuk'ix qe tuk'il, e ok ten q'ojlel ex kub' kyi'j kyu'n. Kyja'tzun tten, ate Qman tzaj oninte kye tu'n kykamb'an.

¹⁵At jun maj at ox kyxol qe 30 soldad kyuw kyk'u'j tuj q'oj e je'x kanul ti'j David t-xe pik Adulam. Atzun qe soldad aj Filisteo atzun kykub'sa'n tuj chq'ajlaj Refaim.

¹⁶Atzun ta'toq David tuj cuartel tej kypon txqan soldad aj Filisteo tuj Belén.

¹⁷Tzajtzun txqetle'n ti'j David ex tma kyja': Noqwit at jun saj q'inte ch'in nk'a'ye a', aju tku'x tuj xoch tkub' ttzi tlamel tnam Belén, chi David.

¹⁸Aqeju ox xinaq kyuwxix kyk'u'j tuj q'oj e okx tuj campament kye aj Filisteo, jatz kyi'n a' tuj xoch tkub' ttzi tlamel tnam Belén, ex xi kyi'n tuk'il David. Ex minti' tkuya David tu'n t-xi tk'a'n, noq o'kx kub' tqo'n twitz tx'otx' te jun oyaj te Qman,

¹⁹ex tma: Awt Dios onin weye tu'n mi'n t-xi nk'a'ne a' lu, ex qa ma txi nk'a'ne, junx ta' jlu mer ik tza'n a kychk'el qe xinaq kxel nk'a'ne, aqeju xi kyoyin kyib' tu'n kykyim tej ẍe'x aj q'ilte a', chi David, ex minti' xi tk'a'n. Atzun jlu o b'ant kyu'n qeju ox soldad kyuwxix kyk'u'j tuj q'oj.

²⁰Ate Abisai aju terman Joab toktoq toklen te nejenel kyi'j qeju 30 soldad kyuw kyk'u'j tuj q'oj. At jun maj ok tzoqpaj q'ojlel kyi'j ox syent xinaq tu'n tlans ex e kub' tb'yo'n. Kyja'tzun e yolin xjal ti'j qa mas at tnab'l tu'n tq'ojin kywitz qeju 30 xinaq,

²¹ex o tk'am mas nimb'ilte kywitz qe txqantl tuk'il, ex ok q'o'n toklen te nejenel kye. Ex minti' o pon ik tza'n qeju oxe te tnejel.

²²Ax ikx ate Benaía aju tky'ajal Joiada, aju najl tuj tnam Cabseel. Aju xinaq lu kyuwxix tk'u'j tuj q'oj, o tb'incha nimku b'inchb'en ex kub' tb'yo'n kab'e xjal aj Moab nim kyipun. At jun q'ij tej tkub' nim ttxa che'w, ku'x tuj jun toy' jul ex tujx jul lu kub' tb'yo'n jun b'alun.

²³Ax ikx kub' tb'yo'n Benaía jun aj Egipto ma'xix twa'l, aju twa'l b'alo te ox var, ex q'i'ntoq jun tlans ma' tk'itz ex ma' tqan. Ok tzoqpaj Benaía ti'j xjal lu tuk'il jun tze', el ti'n tlans tuj tq'ab', ex kub' tb'yo'n tu'nx tlans.

²⁴Tu'nju tb'inchb'en Benaía lu, aju tky'ajal Joiada, e yolin xjal ti'j qa mas at tnab'l tu'n tq'ojin kywitz qeju 30 xinaq kyuw kyk'u'j tuj q'oj,

²⁵ex o tk'am mas nimb'ilte kywitz qe txqantl tuk'il, ex minti' pon ik tza'n qeju oxe tnejel. Ex ok tq'o'n David toklen Benaía te nejenel kye qeju xq'uqil te.

²⁶Aqeju kyuw kyk'u'j tuj q'oj, atzun qe jlu: Asael aju terman Joab, Elhanán aju tky'ajal Dodo, aju aj Belén,

²⁷Samot aju aj Harod, Heles aju aj Pelón,

²⁸Ira aju tky'ajal Iques, aju aj Tecoa, Abiezer aju aj Anatot,

²⁹Sibecai aju aj Husa, Ilai aju aj Ahoh,

³⁰Maharai aju aj Netofa, Heled aju tky'ajal Baana, ex ax aj Netofa,

³¹Itai aju tky'ajal Ribai, ex aj Gabaa aju ta' tuj tx'otx' kye aj Benjamín, Benaía aju aj Piratón,

³²Hurai aju najl ttzi tq'ab' xaq Gaas, Abiel aju aj Arba,

³³Azmavet aju aj Bahurim, Eliaba aju aj Saalbón,

³⁴qe tky'ajal Jasem aju aj Gizón, Jonatán aju tky'ajal Sage ex aj Harar,

³⁵Ahíam aju tky'ajal Sacar, aju ax aj Harar, Elifal aju tky'ajal Ur,

³⁶Hefer aju aj Mequera, Ahías aju aj Pelón,

³⁷Hezro aju aj Carmel, Naarai aju tky'ajal Ezbai,

³⁸Joel aju terman Natán, Mibhar aju tky'ajal Hagrai,

³⁹Selec aju aj Amón, Naharai aju aj Beerot, a jlu iqal qe makb'il in che ajb'en tuj q'oj tu'n Joab aju tal Sarvia,

⁴⁰Ira aju aj Jatir, Gareb aju ax aj Jatir,

⁴¹Urías aju aj Heteo, Zabad aju tky'ajal Ahlai,

⁴²Adina aju tky'ajal Siza aju aj Rubén, ex aju xjal lu nejenel kye qe tiyjil Rubén ex uk'in 30 xinaq tu'n,

⁴³Hanán aju tky'ajal Maaca, Josafat aju aj Mitán,

⁴⁴Uzías aju aj Astarot, Sama tuk'ix Jehiel, aqe jlu tky'ajal Hotam qe ex aj Aroer qe,

⁴⁵Jediael aju tky'ajal Simri, tuk'ix Joha aju ax terman, aqe jlu aj Tiza,

⁴⁶Eliel aju aj Mahavi, Jerebai tuk'ix Josabía, aqe jlu tky'ajal Elnaam qe, Itma aju aj Moab,

⁴⁷Eliel, Obed ex Jaasiel, aqe jlu aj Soba qe.