Read kumam 1 Crónicas 13 Bible Online

1 Crónicas 13 - kumam bible

1 Crónicas 13

¹Xi tqanin David tconsej kye qe nejenel kye soldad, aqeju at jun milchaq soldad tuj kykwent, ax ikx kye qeju at jun syentchaq soldad tuj kykwent,

²ex te tib'ajxi xi tqanin kye kykyaqil tnam xjal aj Israel kyja': Qa b'a'n tuj kywitze, ex qa ik tajb'il Qman Dios, ¿b'a'npe tu'n tex jun tqanil kye qe qerman ate' tuj tkyaqil tx'otx' kye aj Israel, ex kye kykyaqil pal ex aj Leví, aqeju ate' kyuj kytanmi ex kyuj aldey, tu'n kytzaj qtxko'n, ex tu'n tok kychmon kyib' junx quk'il,

³tu'ntzun ttzaj qi'n kax k'ub'l tley Qdios? Ex atxix tuj tkwent Saúl kyaj qkolin ex minti' nnu'l ti'j qk'u'j, chi David.

⁴Kykyaqil tnam xjal b'a'n ela tuj kywitz tu'n tb'inchet ikju, porke tuj ttxolil ela jlu tuj kywi'.

⁵Ok tchmo'n David kykyaqil aj Israel, tzajx qe' jatum ta' tq'ab' xaq Sihor tb'i, aju tok te mojón tuk'il Egipto, ex pon b'aj max jatum nno'kx tb'eyil tnam Hamat, tu'ntzun t-xi q'ib'aj kax k'ub'l tley Dios tuj tnam Quiriat-jearim.

⁶Xi'tzun David kyuk'ix kykyaqil aj Israel tuj tnam Quiriat-jearim, aju ax juntl tb'i Baala, aju ta' tuj kytx'otx' tiyjil Judá, tu'ntzun tik' laq'b'at kax k'ub'l tley Dios jatum in tzaj na't tb'i Dios, aju najl kyxol qe tilb'ilal querubín.

⁷Jaxtzun kyq'o'n kax tib'aj jun carret ak'aj ex ik' kyi'n tuj tja Abinadab; ate Uza tuk'ix Ahío nejni qe twitz carret.

⁸Atzunte David kyuk'ix kykyaqil aj Israel in che b'ixan twitz Qman tu'n tkyaqil kyipun, ex in che b'itzan tuk'il tq'ajq'ajel kywi' chnab' arpa, kitar, tal tampor, laq k'uxb'il ex chun.

⁹Tejtzun kypon tuj lugar Quidón tb'i, jatum nne'l b'ujet triw, e kub' mejtz'aj qe wakẍ, ex atzunte Uza xi tnuqpi'n tq'ab' tu'n ttzaj ttzyu'n kax.

¹⁰Ex tzaj tq'oj Qman ti'j Uza tu'nju ok tmako'n kax k'ub'l tley Dios, ex ax tuj lugar lu b'i'x kyim Uza tu'n Qman.

¹¹Atzunte David mya b'a'n ela tuj twitz tu'nju otoq kyim Uza tu'n Qman, kyja'tzun ok tq'o'n tb'i lugar lu Pérez-uza,[1] ex axtzun tb'i toksa'n ja'lo.

¹²Tujx q'ij lu tzaj nim t-xob'il David twitz Dios ex tma: Qa ik ttenju ¿tza'n tten tu'n t-xi wi'ne kax k'ub'l tley Dios tuj njaye?

¹³Kyja'tzun minti' pon ti'n David kax k'ub'l tley Dios tuj lugar tok tb'i Ttanmi David, noq o'kx xi tma'n tu'n t-xi kyi'n tuj tja Obed-edom aju aj Gat.

¹⁴Ox xjaw kyaj ten kax k'ub'l tley Dios tuj tja Obed-edom, ex e kub' tky'iwla'n Qman kykyaqil qeju ate' tuj tja Obed-edom ex tkyaqilju at te.