Read kumam 1 Crónicas 14 Bible Online

1 Crónicas 14 - kumam bible

1 Crónicas 14

¹E pon t-sama'n Hiram aju rey kye aj Tiro qe t-sanjel tuk'il David, kyuk'ix qe albañil ex qe calpinter ex pon kyi'n tze' wi'ten tu'n tjaw kyb'incha'n tja rey.

²El tnik' David ti'j qa ate Qman ok q'onte te te rey kyib'aj aj Israel, ex puro b'a'n ela tkawb'il tu'n Dios, noq tu'nju at tk'ujlalil Dios kyi'j aj Israel, aqeju etzan tu'n.

³Knet txqantl t-xu'jil David tuj Jerusalén, ex tzajtzun txqantl tky'ajal ex tme'jel.

⁴Atzun kyb'i qe tky'ajal e itz'j tuj Jerusalén jlu: Samúa, Sobab, Natán, Salomón,

⁵Ibhar, Elisúa, Elpelet,

⁶Noga, Nefeg, Jafía,

⁷Elisama, Beeliada, ex Elifelet.

⁸Tejtzun kyb'inte aj Filisteo qa otoq tz'ok q'o'n David te rey kyib'aj kykyaqil aj Israel, kykyaqiltzun e je'x jyolte David tu'n ttzyet kyu'n, ex tej tb'inte David jlu, etz q'ojlel kyi'j.

⁹E pontzun qe aj Filisteo ex xi kytxolb'an kyib' tu'n kyq'ojin tuj chq'ajlaj Refaim.

¹⁰Xitzun tqanin David te Qman: —¿B'a'npe tu'n wok tzoqpaje kyi'j aj Filisteo, ex jakupe onina wuk'ile tu'n tkub' kyi'j? Atzunte Qman tzaj ttzaq'we'n: —Tok tzoqpaja kyi'j, ok chin onile tuk'ila tu'n tkub' kyi'j tu'na.

¹¹Jaxtzun David tuj Baal-perazim, kyuk'ix qe t-soldad, ex atzun kub' kyi'j tu'n. Ex tmatzun David kyja': Ik tza'n jun nima in ch'iy wen ex tkyaqil in xi tiqan, kyja'xtzun ma che tenb'a qe aj q'oj wi'je tu'n Qman tej ẍe naj, chi David. Ex kyja'tzun ok kyq'o'n tb'i ju lugar lu Baal-perazim.[2]

¹²Ax ikx kyaj kyxo'n aj Filisteo qe tilb'ilal nno'k kydiosin, atzunte David xi tma'n tu'n kykub' patit.

¹³Atzun kye aj Filisteo e ok tzoqpaj juntl maj kyi'j qe xjal tuj chq'ajlaj Refaim.

¹⁴Kyja'tzun xi tqanin David juntl maj te Dios. Atzunte Dios tzaj ttzaq'we'n kyja': —Mi'n txi'ya q'ojlel kyi'j jatum kyja' kytzaj, mas b'a'n t-xi'ya q'ol welt kyi'jxi ex tok tzoqpaja kyi'j ok tpona kyjaq' qe tze' bálsamo.

¹⁵Ok t-xi tb'i'na kywi' qe tze' mer ik tza'n tq'ajq'ajel qamb'aj in che b'et, jurattzun txi' naja q'ojlel kyi'j, ex atzun jun techal qa aqine chin b'el nej twitza tu'n tkub' kyi'j qe soldad aj Filisteo wu'ne.

¹⁶B'anttzun tu'n David ik tza'nx otoq tzaj tma'n Dios te, ex kub' kyi'j qe soldad aj Filisteo kyu'n, xi'x qe' tuj tnam Gabaón, ex pon b'aj tuj tnam Gezer,

¹⁷ex aju tqanil ti'j ju tb'incha David pon b'aj tuj tkyaqil lugar, ex tu'n Qman tzaj kyxob'il kykyaqil nasyon twitz David.