Read kumam 1 Crónicas 15 Bible Online

1 Crónicas 15 - kumam bible

1 Crónicas 15

¹Jaw tb'incha'n David qe tja tuj tnam tok tb'i Ttanmi David; ax ikx b'aj tb'incha'n jun lugar jatum tu'n tkub' ten kax k'ub'l tley Dios, ex jaw tb'incha'n jun ja xb'alun tu'n tokx ten kax tuj.

²Atzunte David xi tma'n: O'kx qe aj Leví at kyoklen tu'n t-xi kyi'n kax k'ub'l tley Dios, porke ate Qman jaw sk'onte kye tu'n t-xi kyi'n kax k'ub'l tley ex tu'n kyajb'en te te jumajx.

³Oktzun tchmo'n David kykyaqil aj Israel tuj Jerusalén tu'n tik' laq'b'at kax k'ub'l tley Dios, tu'n tpon tuj lugar otoq b'aj tb'incha'n.

⁴Ax ikx ok tchmo'n David kykyaqil tiyjil Aarón ex qe aj Leví.

⁵Qe tiyjil Coat japun jun syent tuk'il winqin kyb'aj, ex aju nejenel kye, atzun Uriel.

⁶Qe tiyjil Merari japun kab' syent tuk'il winqin kyb'aj, ex aju nejenel kye, atzun Asaías.

⁷Atzun qe tiyjil Gersón japun jun syent tuk'il 30 kyb'aj, ex aju nejenel kye, atzun Joel.

⁸Qe tiyjil Elizafán japun kab' syent kyb'aj, ex aju nejenel kye, atzun Semaías.

⁹Atzun qe tiyjil Hebrón japun 80 kyb'aj, ex aju nejenel kye, atzun Eliel.

¹⁰Atzun qe tiyjil Uziel japun jun syent tuk'il kab'laj kyb'aj, ex aju nejenel kye, atzun Aminadab.

¹¹E tzajtzun ttxko'n David qe pal Sadoc ex Abiatar, ax ikx e tzaj ttxko'n junjun aj Leví, ex atzun qe jlu: Uriel, Asaías, Joel, Semaías, Eliel ex Aminadab,

¹²ex xi tma'n kye: Tu'nju aqeye nejenel kyxol junjun k'loj tiyjil Leví, kyxjansa'n b'aj kyib'e, kyuk'ix qe kyermaniye, tu'ntzun tik' kylaq'b'a'ne kax k'ub'l tley Qman, aju Qdios aj Israel qo', ex tu'n tul kyi'ne tuj lugar b'animaj wu'ne;

¹³ex tnejel maj mya a qeye e tzaj q'inte kax k'ub'l tley Dios, kyja'tzun kub' qcastiw tu'n Qman, ex tu'nju minti' xi qqanin te alkye mer tumel.

¹⁴B'ajtzun kyxjansan kyib' qe pal ex qe aj Leví tu'ntzun tik' laq'b'at kax k'ub'l tley Dios, aju Kydios aj Israel.

¹⁵Ex atzun qe aj Leví e tzaj q'inte kax k'ub'l tley Dios, ex kyq'o'n qe tze' kyuj qe argoy ate'k ttxlaj kax ex tzaj kyiqan kax twi kysemil, ik tza'nx otoq kyaj tma'n Moisés, aju q'mamaj te tu'n Qman.

¹⁶Ax ikx xi tma'n David kye nejenel kye aj Leví tu'n tjaw kysk'o'n junjun kyerman ex tu'n t-xi q'ot kyoklen tu'n kyb'itzan, ex tu'n kychimb'an kyi'j chnab', kitar, arpa ex qe tal laq k'uxb'il, ex tu'n tok kyq'ajtza'n in che tzalaj wen.

¹⁷Atzun kye aj Leví ok kyq'o'n toklen Hemán aju tky'ajal Joel, tuk'ix Asaf aju tky'ajal Berequías, aju at t-xilen tuk'il Hemán; ex kyxol qe tiyjil Merari ok kyq'o'n toklen Etán aju tky'ajal Cusaías, ax at t-xilen tuk'il Hemán ex Asaf.

¹⁸Ax ikx ok q'o'n kyoklen juntl k'loj te onil, ax at kyxilen kyuk'il qeju otoq che ok q'o'n tnejel, ex atzun qe jlu: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, tuk'ix Obed-edom ex Jehiel, aqeju xq'uqil ttzi ja.

¹⁹Aqeju b'itzal, Hemán, Asaf ex Etán, tuj kykwent ta' tu'n tok kyq'ajtza'n qe tal laq q'an k'uxb'il,

²⁰atzun kye Zacarías, Aziel, Semiramot, Jehiel, Uni, Eliab, Maasías ex Benaía, q'i'mlex kitar kyu'n tu'n tok kyq'ajtza'n tq'ajq'ajel tzinin twi'.

²¹Atzun kye Matatías, Elifelehu, Micnías, Obed-edom, Jeiel ex Azazías, q'i'ntoq arpa kyu'n tu'n tok kyq'ajtza'n tq'ajq'ajel julin twi' te tmoj kyb'itz qeju in che b'itzan.

²²Atzunte Quenanías nejenel kye qe b'itzal aj Leví, ex ax tkyajsa'n te nejenel tu'n tjaw juk'et b'itz, porke attoq nim tnab'l ti'j.

²³Atzunte Berequías tuk'ix Elcana, kwentil te kax k'ub'l tley Qman.

²⁴Atzun qe pal Sebanías, Josafat, Natanael, Amasai, Zacarías, Benaía ex Eliezer, atzun qe in che q'ajtzan chun twitz kax k'ub'l tley Dios. Ax ikx kye Obed-edom tuk'ix Jehías, kwentil kax qe.

²⁵Atzunte David kyuk'ix qe tij xjal kyxol aj Israel ex qe nejenel kye jun milchaq soldad, e je'x tja Obed-edom tuk'il nim tzalajb'il q'ilte kax k'ub'l tley Dios.

²⁶Ex tu'nju ate Dios onin kyi'j aj Leví tej tik' laq'b'at kax k'ub'l tley Dios, kyja'tzun xi kyq'o'n wuq tal tor ex wuq tman ẍne'l te chojb'il.

²⁷Ex toktoq jun tkapiẍay David tb'anilxix, ax ikx kye kykyaqil aj Leví, aqeju q'i'n kax kyu'n, ex qe b'itzal, ax ikx te Quenanías aju nejenel ti'j b'itz kyxol qe b'itzal; kykyaqil qe jlu tok kyxb'alun ẍjo'w tb'anilxix, ax ikx toktoq jun tkapiẍay David tb'anilxix b'anin ti'j xb'alun lino.

²⁸Kyja'tzun tten xi kyi'n aj Israel kax k'ub'l tley Dios, in che sch'in tu'n tzalajb'il, ex nno'k kyq'ajtza'n tkach ẍne'l ex chun ex qe tal laq k'uxb'il, tuk'ix kitar ex arpa.

²⁹Tejtzun tpon kax k'ub'l tley Dios tuj tnam tok tb'i Ttanmi David, ate Mical aju tme'jel Saúl etz tke'yin ttzi ventan, ex o til lu rey David in b'ixantoq tuk'il tzalajb'il, ex tzajtzun jun ik'b'il tuj tanmi ti'j David.