Read kumam 1 Crónicas 16 Bible Online

1 Crónicas 16 - kumam bible

1 Crónicas 16

¹Kyja'tzun tten tzaj kyi'n kax k'ub'l tley Dios, ex okx kyq'o'n tuj ja xb'alun, aju otoq jaw tb'incha'n David. Te tib'ajxi jlu xi kyq'o'n oyaj patun in kub', ex xi kyq'o'n chojb'il te mojb'ab'l tib'il tuk'il Qman.

²Tejtzun tb'aj tq'o'n David qe chojb'il, e kub' tky'iwla'n qe tnam xjal tuj tb'i Qman,

³ex xi tq'o'n kye kykyaqil aj Israel, teyle te junjun, tza'nx qe xinaq, ax ikx qe xu'j, jun pan, jun piẍ chib'j ex jun piẍ kylo' twitz uva tzqijsa'maj.

⁴Atzunte David ok tq'o'n kyoklen junjun aj Leví tu'n kyajb'en twitz kax k'ub'l tley Dios, tu'n ttzaj kyna'n tb'i Qman, tu'n t-xi kyq'o'n chjonte te ex tu'n tjaw kynimsa'n tb'i Kydios aj Israel.

⁵Aju nejenel, atzun Asaf, atzun tkab'in nejenel, atzun Zacarías, ex lepchix Jeiel, Semiramot, Jehiel, Matatías, Eliab, Benaía, Obed-edom, ex Jeiel; atzun qe jlu at kychinb' kitar ex arpa. Atzunte Asaf nno'k q'ajtzante qe tal laq k'uxb'il,

⁶ex atzun qe pal Benaía, ex Jahaziel, kukxtoq tok kyq'ajtza'n chun twitz kax k'ub'l tley Dios.

⁷Tujxtzun q'ij lu, xi tma'n David tnejel maj te Asaf ex kye txqantl tuk'il tu'n t-xi kyb'itzan aju b'itz lu te aq'b'il chjonte te Qman.

⁸Kyq'onxe chjonte te Qman ex che kub'sane twitz. Kyq'manxe qe tb'inchb'en kye tnam.

⁹Che b'itzane b'itz te nimb'il te ex che yoline kyi'j qe tb'inchb'en ma' kyxilen.

¹⁰Che tzalajxe ti'j tb'i Dios Xjan, tzalajxwit kyanmi qeju in che jyon ti'j Qman.

¹¹Kqaninxe onb'il te Qman aju at tipumal; che laq'exe tuk'il, ex ax che tene.

¹²Kyna'ntze qe tb'inchb'en ma' kyxilen ex nim kyipumal, ex kyna'ntze qe tley tzaj tma'n.

¹³Aqeye tiyjil Israel aju tmajen Dios, ex aqeye tk'wa'l Jacob, sk'o'maj qeye tu'n,

¹⁴atzun Qman jlu aju Qdios, ex a in kawin tib'aj tkyaqil twitz tx'otx'.

¹⁵Maske ma tzik' jun mil k'loj kyiyjil xjal, ex mlay tzik' tna'l tu'n aju tyol kyaj b'ant ti'j kyuk'il.

¹⁶Mlay tzik' tna'l tu'n aju tyol kyaj b'ant ti'j tuk'il Abraham, aju tyol axix tok xi ttziyan te Isaac,

¹⁷ex kyaj tkyuwsa'n ju yol lu te Jacob, tu'n tok ik tza'n jun ley, ex kyaj tkyuwsa'n te jumajx te Israel.

¹⁸Chi kyja': Teya kxel nq'o'ne aju tx'otx' Canaán tu'n tok te tetzb'ila.

¹⁹Mya nim kyb'aj tej kyten tuj kytx'otx' aj Canaán, stranjer xjal qe,

²⁰noq in che b'etje' tuj kytx'otx' junjun nasyon ex tjaq' kykawb'il junjun rey,

²¹ex minti' xi tq'o'n Dios amb'il tu'n kyyajlanjtz kyu'n txqantl xjal, noqpe xi tma'n kye rey kyja':

²²Mi'n tz'ok kyq'o'n kyq'ab'e kyi'j qe xjal sk'o'maj wu'ne, ex mi'n kyb'inchaye jun mya b'a'n kyi'j qe nsanjele.

²³Che b'itzane te Qman kykyaqile aqeye najl twitz tx'otx'; kyq'manxe tkyaqil q'ij tqanil kolb'il tu'n,

²⁴che yoline ti'j tajwalil ex kyi'j qe tb'inchb'en ma'xix kyxilen, kyq'manxe qe jlu kye kykyaqil xjal ex kye kykyaqil nasyon,

²⁵porke ate Qman ma' t-xilen ex b'a'n tu'n tjaw nimset tb'i. Mas tu'n qxob' twitz kywitz qe txqantl kydios xjal.

²⁶Qe tilb'ilal nno'k kydiosin xjal minti' kyajb'en, atzunte Qman, a o b'inchante kya'j,

²⁷txolin ti'j tu'n tajwalil ex tu'n t-spik'umal; at nim tipumal ex tzalajb'il tuj tnajb'il.

²⁸Kykyaqile, aqeye xjal najl twitz tx'otx', kynimsa'nktze tb'i Qman, kynimsa'nktze tb'i tu'nju at tipumal ex tajwalil.

²⁹Kyq'onxe nimb'il te Qman tu'nju ma' t-xilen; kyi'ntz kyoyaje ex che laq'etze twitz; che k'ulune twitz Qman tu'nju tb'anilxix te ex xjan te.

³⁰Kykyaqile, aqeye xjal najl twitz tx'otx', che lu'lune tu'n kyxob'ile twitz. Tu'n kub' tq'o'n t-simyentil tx'otx' tu'n mi'n tyukch.

³¹B'a'n tu'n ttzalaj kya'j ex tx'otx'; b'a'n tu'n t-xi q'ma'n kyuj qe nasyon: Ate Qman Rey.

³²E tjulin mar tuk'ix tkyaqilju at tuj. B'a'n tu'n kytzalaj qe kojb'il tuk'ix tkyaqilju at kyuj.

³³E kyjaw sch'in qe tze' tuj chk'ul tu'n tzalajb'il twitz Qman, aju tzul tu'n tkawin twitz tx'otx'.

³⁴Kyq'onxe chjonte te Qman, ex puro b'a'n te, ex aju tk'ujlalil kukx at te jumajx.

³⁵Ex kymanxe: Qo tkloma, aya Dios Klol qeye. Qo tchmon oka ex q'in ajtza qo'ye kyuj qe nasyon, tu'ntzun tjaw qnimsa'ne tb'iya xjan ex tu'n tjaw qnimsa'na tuk'il tzalajb'il.

³⁶Nimanxwit tb'i Qman aju Qdios aqo' aj Israel, tuj tkyaqil tab'q'iyil. Che chi, b'aj kyb'itzan. Ex kykyaqiltzun tnam xjal xi kytzaq'we'n: Ikxwitju, ex e oktzun ten nimsal tb'i Qman.

³⁷Kyja'tzun kyaj q'o'n Asaf tu'n David kyuk'ix txqantl tuk'il, tu'n kyajb'en tkyaqil q'ij twitz kax k'ub'l tley Dios, noq alkyex jun ti'xti il ti'j tu'n tb'ant junjun q'ij,

³⁸ex kyaj q'o'n Obed-edom tu'n David kyuk'ix txqantl tuk'il, 68 kyb'aj, tu'n kyajb'en junx kykyaqil, tuk'ix juntl Obed-edom aju tky'ajal Jedutún, ex tuk'ix Hosa. Atzun qe kab'e lu e kyaj tq'o'n te kwentil ttzi tja Dios.

³⁹Ax ikx aju pal Sadoc kyuk'ix qe txqantl pal in che ajb'en tuk'il, e kyaj tq'o'n David twitz ja xb'alun te Qman, tuj lugar te k'ulb'il at tuj Gabaón,

⁴⁰tu'ntzun t-xi kyq'o'n te Qman aju oyaj patun in kub' tib'aj altar tkyaqil q'ij, prim ex qale, ik tza'nx tz'ib'amaj tuj tley Qman, aju kyaj tma'n tu'n tb'ant kyu'n aj Israel.

⁴¹Ax ikx kyaj tq'o'n David Hemán ex Jedutún kyuk'il, kyuk'ix qe txqantl xjal otoq che jaw sk'o'n, ex otoq jaw t-sch'in kyb'i, tu'n kyb'itzan kyja': Kyq'onxe chjonte te Qman, tu'nju at tk'ujlalil te jumajx.

⁴²Atzun qe jlu in che q'ajtzantoq chun ex qe tal laq k'uxb'il, kyuk'ix txqantl chnab' te tmoj kyb'itz qeju in che b'itzan tb'i Qman. Atzun qe tky'ajal Jedutún kykyajsa'n qe te kwentil ttzi ja.

⁴³Te tib'ajxi jlu kykyaqil aj Israel e aj kyja; ax ikx te David aj tja tu'n kykub' tky'iwla'n qeju ate' tuj tja.