Read kumam 1 Crónicas 17 Bible Online

1 Crónicas 17 - kumam bible

1 Crónicas 17

¹Tej otoq pon b'ant rey David tuj tja, xi tma'n te Natán aju t-sanjel Dios: —B'intza, aqine najl qine tuj jun ja puro tb'anil tze' wi'ten, atzunju kax k'ub'l tley Dios tokxsa'n tuj jun ja xb'alun.

²Atzunte Natán xi ttzaq'we'n: —B'inchama tkyaqil ik tza'nx ma kub' t-ximana, porke a Dios tuk'ila.

³Ex tujx qonik'an lu, tzaj tma'n Dios te Natán kyja':

⁴Txi'ya tuk'il nmajene David ex q'manxa te: Chitzun Qman in tma'n teya: Mya aya kjawil b'inchante jun njaye tu'n ntene tuj.

⁵Atxix tuj q'ij tej kyetz wi'ne aj Israel tuj Egipto, ex kukx ja'lo, mi jun maj ma chin tene tuj jun ja tb'anil; noq o'kx ma chin tene tuj ja xb'alun ex noq ma chin b'etje'ye.

⁶Atxix ojtxi o chin b'ete kyuk'il aj Israel, ok nq'o'ne qe nejenel kyxol tu'n kykawin kyib'aj, ex mi jun maj o txi nma'ne kye tu'n tjaw kyb'incha'n jun ja te k'ulb'il weye, aju puro tb'anil tze' wi'ten.

⁷Kyja'tzun, q'manxa te nmajene David: Aqine Dios aju Tajaw Tkyaqil in xi nma'ne jlu te: Ma tz'el wi'ne tu'n mi'n tpastorintla kyi'j ẍne'l tuj kojb'il, tu'n toka te nejenel kye aj Israel, aqeju etzan wu'ne,

⁸ma chin b'ete junx tuk'ila noq alkyex lugar jatum ma tzik'a tuj; ax ikx o che kub' b'aj nb'yo'ne qe aj q'oj, aqeju e ok tzoqpaj ti'ja, ex k'elel tqanila wu'ne tu'n kyb'inte xjal qa ma' toklena, ik tza'n qe xjal ma' kyoklen ate' tuj tkyaqil twitz tx'otx'.

⁹Ax ikx o b'aj nb'incha'ne jun lugar jatum tu'n kynajan aj Israel tuj, aqeju etzan wu'ne, ex ax ma che kub' nq'o'ne tu'n kynajan tuj kyex kytx'otx', tu'ntzun mi jun tu'n tlab't kyi'j, ex mlay che yajlanjtz juntl maj kyu'n qe xjal b'inchal mya b'a'n, ik tza'n nej,

¹⁰tej kyok nq'o'ne qe nejenel tu'n kykawin kyib'aj qe xjal etzan wu'ne, aqeju aj Israel. Wu'ne kb'el kyi'j kykyaqil aj q'oj ti'ja ex che kyjel ten tjaq' tkawb'ila. Ax ikx kxel nma'ne teya, kchmetel kyb'aj qe tiyjila wu'ne.

¹¹Oktzun ttijina ex ok tkyima, aqine chin okel q'onte jun tky'ajala te rey, ex kkyuwsetel tkawb'il wu'ne,

¹²ex atzunte kjawil b'inchante jun ja te k'ulb'il weye, ex aqine chin kyuwsalte tkawb'il te jumajx.

¹³Aqine chin okel te tman ex atzunte k'okel te nk'wa'le. Ex mlay tz'el npa'ne nk'ujlalile ti'j ik tza'n o b'ant wu'ne ti'j rey ten nej twitza;

¹⁴noq o'kx kkyuwsetel wu'ne tuj njaye te jumajx ex tuj nkawb'ile, ex kyxol qe tiyjil kukx kjawil nsk'o'ne jun tu'n tok te rey te jumajx, chi Qman, tzaj tma'n te Natán.

¹⁵Xi ttx'olb'a'n Natán tkyaqil jlu te David cabalxix ik tza'nx otoq til ex otoq tb'i.

¹⁶Atzunte rey David okx yolil tuk'il Qman ex tma kyja': Nman Dios, ¿alkyetzun qine ex ti kyoklen qe wiyjile, tu'nju ma tzaj tq'o'na woklene te rey?

¹⁷Ex mya ma' ma tz'ela jlu tuj twitza, Nman Dios; ax ikx ma tzaj tma'na aju kb'ajel kyi'j qe wiyjile tuj tq'ijlalil tzul, qa che okel te rey. Ma chin ok tq'o'na ik tza'n jun xjal ma' toklen.

¹⁸¿Alkye mas yol b'a'n txi nma'ne teya tu'nju ma chin ok tq'o'na te jun xjal ma' toklen? Porke b'a'n tu'na alkye qine, aqine tmajena.

¹⁹Aya Nman, noq tu'nju at tk'ujlalila wi'je, ex ik tza'nx tajb'ila, ma tb'inchaya tkyaqil tb'inchb'ena ma'xix kyxilen tu'n tel nik'b'aj kyi'j.

²⁰Aya Nman Dios, mi a'l juntl ik tza'n teya, ex mi a'l juntl Dios at, noq o'kx aya, ik tza'n tkyaqilju o qb'iye ti'ja,

²¹ex minti' juntl nasyon ik tza'n kye aj Israel, aqeju etzan tu'na, porke o'kxku junx nasyon lu sk'o'maj tu'na tuj tkyaqil twitz tx'otx'. Tu'na ma che tzoqpet tu'n kyok te jun tnam etzan tu'na, ex ma tz'el tqanil kyi'j qe tb'inchb'ena nim kyipumal ex ma'xix kyxilen. Tej kyetz tkolpi'na tuj Egipto e ik' tlajo'na qe txqantl nasyon kywitz,

²²ex tu'na ma che ok qe aj Israel te jun tnam etzan tu'na te jumajx; atzun teya, Nman, ma tz'oka te Kydios.

²³Kyja'tzun Nman Dios, kyuwsama ju yol ma tzaj ttziyana weye ex kye qe wiyjile che ul itz'j te tib'ajxi, ex japunx tu'na aju ma tmaya.

²⁴Ex aju yol tzaj ttziyana, kuchiwt tu'n tjapun tu'na, ex aju tb'iya kuchiwt kukx tu'n tjaw nimset te jumajx ex tu'n tq'manjtz kyja': Ate Qman aju Tajaw Tkyaqil, atzun Kydios aj Israel, ex atzunju axix tok Kydios aj Israel. Ex kuchiwt tu'n mi'n kykub' yupj qe wiyjile che ul itz'j te tib'ajxi.

²⁵Aya Nman Dios, ma tzaj tma'na weye qa che kyuwsetel qe wiyjile tu'na tu'n kyok te rey; tu'ntzun jlu, maske tmajena qine, ma nnimarin wib'e tu'n nkub'sane twitza.

²⁶Ja'lo Nman, aya Dios ma tzaj ttziyana tu'n ttzaj tq'o'na nimxix t-xtalb'ila weye,

²⁷kuchiwt b'a'n ma tz'ela tuj twitza tu'n tkub' tky'iwla'na qe wiyjile che okel te rey te tib'ajxi, ex kukx tu'n kyten twitza. Aya Nman, ma che kub' tky'iwla'na, ex kukx che kb'el ky'iwla'n te jumajx.