Read kumam 1 Crónicas 19 Bible Online

1 Crónicas 19 - kumam bible

1 Crónicas 19

¹Te tib'ajxi jlu kyim Nahas aju rey kye aj Amón, ex aju kyaj ten te kawil te t-xel, ax tky'ajal.

²Ex tma David kyja': Kxel nyek'une nk'ujlalile te Hanún aju tky'ajal qtzan Nahas, porke aju qtzan tman o ten b'a'n wuk'ile, chi David. Xitzun t-sama'n junjun xjal at kyoklen ttxlaj tu'n kyxi' q'uqb'alte tk'u'j Hanún tu'nju otoq kyim tman, ex tej kypon qe xjal at kyoklen ttxlaj David tuj kytx'otx' aj Amón,

³xi kyma'n qe nejenel kye aj Amón te Hanún kyja': ¿Chipetzuna tat rey qa q'uqb'al tk'u'ja ma che tzaj t-sama'n David qe xinaq lu ex qa tu'n ttzaj na't qtzan tmana? ¿Myapetzun ma che ul qe xjal lu tuk'ila noq ke'yilte alkye tumel tu'n kyoktz tuj tnam ex tu'n tkub' kyxitun? Che chi nejenel.

⁴Atzunte Hanún xi tma'n tu'n kytzaj tzyu'n qe xjal at kyoklen ttxlaj David ex tu'n tel matzo'n kyxmaltzi', ax ikx tu'n tel qesit mij kyxb'alun tu'n tjapun max twi kyxix. Te tib'ajxi jlu e ajtz t-sama'n.

⁵Tejtzun tpon tqanil tuk'il David ti'j ju otoq b'aj kyi'j qe xinaq lu, xi tma'n tu'n kyxi kanab'aj, tu'nju otoq tzaj nim kych'ixwi, ex tu'n t-xi q'ma'n kye tu'n kykyaj ten max tuj Jericó, maxi tu'n kyajtz okxi tch'iy kyxmaltzi'.

⁶Eltzun kynik' aj Amón ti'j qa otoq tzaj tq'oj David kyi'j, kyja'tzun ate Hanún ex qe aj Amón xi kysama'n wuq syent tuk'il 40 quintal saq pwaq kye aj Mesopotamia, kye aj Siria, kye aj Maaca ex kye aj Soba, te twi kyk'u'j carwaj tu'n kyajb'en tuj q'oj, ex te twi kyk'u'j soldad in che b'et kyib'aj chej, tu'ntzun kytzaj onil kye aj Amón.

⁷B'anttzun ti'j tu'n kytzaj 32 mil carwaj in che ajb'en tuj q'oj, ax ikx aju rey tuj Maaca kyuk'ix qe t-soldad. Aqe jlu kub' kychmon kyib' twitz tnam Medeba. Ax ikx qe aj Amón e je'tz tuj kytanmi ex ok kychmon kyib' tu'ntzun ttzyet q'oj kyu'n.

⁸Ex o tb'i David jlu, kyja'tzun xi t-sama'n David Joab kyuk'ix kykyaqil soldad.

⁹E je'tztzun qe aj Amón, ex b'aj kytxolb'an kyib' tu'n tb'ant kyten tuj q'oj niqayin ttzi tlamel tnam, atzun qe rey otoq che tzaj tuj txqantl tnam max e kyaj ten tuj kojb'il.

¹⁰Tejtzun tke'yinte Joab kyja'toq kyok tzoqpaj qe aj q'oj kyi'j, at kyja' kytzaj kywitz, ex at kyja' kytzaj kyi'jxi, e jawtzun t-sk'o'n qe soldad mas at kynab'l tu'n kyq'ojin kyxol aj Israel, b'ajtzun kyb'inchan kyib' tu'n kyok tzoqpaj kyi'j aj Siria.

¹¹Atzun qe txqantl soldad e je'x tq'o'n tuj tkwent Abisai aju terman, tu'n kyok tzoqpaj kyi'j aj Amón.

¹²Xitzun tma'n Joab te Abisai: Qa ma kub' wi'je kyu'n aj Siria, b'ix txi'ya onil wuk'ile, ex qatzun ma kub' ti'ja kyu'n aj Amón, jaku chinxe onil tuk'ila.

¹³Kyuwx tk'u'ja ex qq'onk qipun tu'n tklet qtanmi ex tu'n kyklet tnam xjal etzan tu'n Dios. Ex b'ant-xwit tu'n Qman aju b'a'n tuj twitz.

¹⁴Xi'tzun Joab kyuk'ix qe t-soldad tu'n kyok tzoqpaj kyi'j aj Siria, atzun kye aj Siria e je'l oq kywitz.

¹⁵Tejtzun kylonte aj Amón qa otoq che el oq qe aj Siria, ax ikx kye e el oq twitz Abisai aju terman Joab, ex axtzun e okx oq tuj tnam. Atzunte Joab aj meltz'aj tu'n tpon tuj Jerusalén.

¹⁶Tejtzun kylonte aj Siria qa otoq kub' kyi'j kyu'n aj Israel, xitzun kysama'n qe sanjel tu'n kyxi q'ib'aj qe aj Siria, aqeju ate' jlajxi nima Éufrates, ex aju nejenel kye, atzun Sofac aju nejenel kye t-soldad Hadad-ezer.

¹⁷Pon tqanil jlu tuk'il David; kyja'tzun e ok tchmo'n kykyaqil aj Israel, e jik'xtzun tuj nima Jordán ex e pon jatum ate' qe aj Siria, b'ajtzun ttxolb'a'n David qe t-soldad tu'n tok q'oj kyu'n, ex tzyettzun q'oj kyu'n aj Siria kyi'j aj Israel.

¹⁸Ex e el oq aj Siria kywitz aj Israel, ex kub' tb'yo'n David wuq mil xinaq aj Siria ate'jx kyuj carwaj in che ajb'en tuj q'oj, ex 40 mil soldad in che b'et tu'n kyqan; ax ikx kub' tb'yo'n David Sofac aju nejenel kye soldad aj Siria.

¹⁹Tej kylonte qe xjal uk'in tu'n Hadad-ezer qa otoq kub' kyi'j kyu'n aj Israel, b'ant ti'j jun kyyol tuk'il David ex e kyaj ten tjaq' tkawb'il. Atxixtzun tuj q'ij lu, minti'tl o kyajb'e aj Siria tu'n kyonin kyuk'il aj Amón.