Read kumam 1 Crónicas 20 Bible Online

1 Crónicas 20 - kumam bible

1 Crónicas 20

¹Tejtzun tel jun ab'q'i, tuj tq'ijlalil ok in che etz qe rey q'ojlel ik tza'nx kycostumr, xi' Joab kyuk'ix nimku soldad tuk'il, ex kub' kyxitun qe kytanmi aj Amón, ex b'aj kytxolb'an kyib' qe t-soldad ti'j tnam Rabá, ok tzoqpaj ti'j ex b'i'x b'aj t-xitun tkyaqil. Atzunte David ax otoq kyaj ten tuj Jerusalén.

²Tejtzun tpon David, el ti'n aju coron tjax tuj twi' ju rey kye aj Rabá. Aju coron lu q'an pwaq ex toktoq qe tal ab'j tb'anil ti'j; aju talil 75 libr, ex jaxtzun kyq'o'n tuj twi' David. Ax ikx etz ti'n David nimku makb'il tb'anilxix ex wi'yilxix tuj tnam lu,

³kyuk'ix qe xjal otoq che kyaj anq'in tuj tnam, ex e ok tq'o'n aq'nal kyi'j sier, kyi'j k'uxb'il tu'n tel ttxk'omil triw, ex kyi'j qe siwb'il k'uxb'il. Iklex o tb'incha David kyi'j kykyaqil tnam kye aj Amón. Te tib'ajxi ajtz meltz'aj tu'n tul tuj Jerusalén kyuk'ix kykyaqil qe t-soldad.

⁴Te tib'ajxi jlu ok juntl q'oj kyuk'il aj Filisteo tuj tnam Gezer. Atzun kub' b'yo'n Sipai tu'n Sibecai aju aj Husa. Atzun elni tiyjil Sipai ti'j kyiyjil qe xjal ma' kywa'l; kyja'tzun tten kub' kyi'j aj Filisteo.

⁵Ex tuj juntl q'oj ok kyuk'il aj Filisteo, kub' b'yo'n ju xjal Lahmi tu'n Elhanán aju tky'ajal Jair; ate Lahmi terman Goliat aju aj Gat, ex aju tlans q'i'n, matij tqan ex ma' tk'itz.

⁶Ok juntl q'oj tuj tnam Gat. Attoq jun xinaq ma' twa'l, qaqchaq tal tq'ab' ti'j junjun tq'ab', ex qaqchaq tal tqan ti'j junjun tqan, 24 tu'n tkyaqil. Ax elni tiyjil ti'j kyiyjil qe xjal ma' kywa'l.

⁷Ate xinaq lu ok ten ik'lelte kye aj Israel, ex kub' b'yo'n tu'n Jonatán aju tky'ajal Simea, aju terman David.

⁸Aqeju xjal ma' kywa'l lu, tiyjil Refa qe, aju aj Gat, ex e kub' b'yo'n tu'n David ex kyu'n qe t-soldad.