Read kumam 1 Crónicas 21 Bible Online

1 Crónicas 21 - kumam bible

1 Crónicas 21

¹Ok ten Satanás q'ojlel kyi'j aj Israel ex ok ten to'yil te David tu'n tjaw ti'n jun kyajlal aj Israel.

²Xitzun tma'n David te Joab ex kye qe nejenel kye soldad: —Kyxi'ye ex kyi'n jawe kyajlal aj Israel, tzajx qe' kyu'ne tuj Beerseba ex tu'n tpon b'aj max tuj Dan, ex kyi'ntztzune tajlal wuk'ile tu'ntzun nb'inteye jte' xjal at.

³Atzunte Joab xi ttzaq'we'n: —Tu'nwt Qman chmet kyajlal qe xjal etzan tu'n, chmet-xwit jun syent maj ik tza'n at ja'lo. ¿Myapetzun kykyaqil xjal lu tmajena, Tat Rey? ¿Titzun tajb'en jlu teya, Tat Rey? ¿Ex tiqu'n in tzaj ti'na jun mya b'a'n kyib'aj aj Israel? Chi Joab.

⁴Maske ikju, pero ate rey ok tq'o'n il ti'j tu'n tb'inchet jlu, kyja'tzun xi' Joab, b'aj tb'etin tuj tkyaqil kytx'otx' aj Israel ex ultzun meltz'aj tuj Jerusalén.

⁵Xi tq'o'n Joab tajlal tuk'il David, ex japun jun kyajlal aj Israel te jun miyón ex jun syent mil xinaq at kynab'l tuj q'oj, ex kyaje syent tuk'il 70 mil xjal tuj Judá at kynab'l tu'n kyq'ojin.

⁶Ex kyxol qe jlu minti' jaw kyajlal qe tiyjil Leví, ax ikx qe tiyjil Benjamín, porke mya b'a'n ela tuj twitz Joab aju yol tzaj tma'n rey.

⁷Ax ikx te Dios mya b'a'n ela tkyaqil jlu tuj twitz, kyja'tzun tzaj tq'o'n jun castiw kyib'aj aj Israel.

⁸Xitzun tma'n David te Dios: —Ma nb'inchaye jun il ma'xix tu'nju ma nb'inchaye jlu. Ex ja'lo in chin kub'sane twitza Nman, tu'n tkub' tnajsana wile aqine tmajena, porke ma nb'inchaye jlu ik tza'n jun xjal minti' tnab'l, chi David.

⁹Tzajtzun tma'n Qman te Gad aju t-sanjel in ajb'en ttxlaj David:

¹⁰Txi'ya tuk'il David ex q'manxa te: Ox castiw kb'el nq'o'ne twitza, sk'o'n jawa jun kyxol alkye tu'n nb'inchanteye ti'ja, chi Qman, ma tzaj tma'n weye, chikuya te David.

¹¹Xi'tzun Gad tuk'il David ex xi tma'n te: —Chitzun Qman ma tma kyja':

¹²Sk'o'n jawa jun kyxol oxe jlu: Ox ab'q'i we'yaj, ex qa ox xjaw tu'n tkub' kyi'je kyu'n aj q'oj kyi'je ex tu'n kykub' b'yo'ne tu'n kyspad, ex qa ox q'ij tu'n ttzaj tx'u'j yab'il tu'n t-spad Qman tuj kytanmiye ok ttzaj t-anjel b'yol kye xjal tuj tkyaqil kytx'otx' aj Israel. Ximana ti'j alkye ktzajel ttzaq'we'na, tu'ntzun t-xi nma'ne teju ma tzaj samante weye, chi Gad.

¹³Xi ttzaq'we'n David te Gad: —Atine tuj jun nintz b'is, ex ja'lo maslo b'a'n tu'n tkub' ncastiwoye tu'n Qman, porke aju t-xtalb'il Qman nimxix, ex mya tu'n nkub' tz'aqe tuj kyq'ab' xjal.

¹⁴Tzajtzun t-sama'n Qman tx'u'j yab'il kyib'aj aj Israel ex b'i'x e kyim 70 mil xjal.

¹⁵Ex tzaj t-sama'n Dios jun anjel tu'n kykyim qe xjal ate' tuj tnam Jerusalén. Ex tej otoq tzyet tu'n kykyim, tzaj tke'yin Qman ex tzaj nim tb'is ti'j ju mya b'a'n otoq b'ant, xitzun tmayo'n Qman aju anjel in b'yontoq kye xjal, chi kyja': Akux jlu, mi'n kub' tb'yo'na txqantl xjal, chi Dios te anjel. Tujxtzun or lu, tkub'sa'ntoq t-anjel Qman ttxlaj lugar jatum nne'l b'ujet ttxk'omil triw tu'n Ornán aju aj Jebuseo.

¹⁶Jawtzun tke'yin David twitz kya'j ex o til jun t-anjel Qman wa'l twitz kya'j, tuk'ix jun spad tokx tuj tq'ab', otoq jatz ti'n tuj tjayil ex xi tyek'un tib'aj tnam Jerusalén. Atzunte David kyuk'ix qe tij xjal ate' ttxlaj toktoq kyxb'alun ch'i'x twitz, e kub' ẍmeje' tejxi tpon takl tib'aj kywitz twitz tx'otx',

¹⁷ex xitzun tma'n David te Dios: —Wu'ne xi nma'ne tu'n tjaw kyajlal xjal. Aqine ma chin b'inchan il ex ma nb'inchaye mya b'a'n, ex qe xjal lu minti' jun mya b'a'n ma kyb'incha. Aya Nman Dios, in chin kub'sane twitza, q'onkuya castiw lu wib'aje ex kyib'aj qeju ate' tuj njaye, ex mi'n tzaj tq'o'na tx'u'j yab'il kyib'aj qe xjal etzan tu'na.

¹⁸Xitzun tma'n t-anjel Qman te Gad kyja': Q'manxa te David tu'n tjaw tb'incha'n jun altar te Qman tuj lugar jatum nne'l ttxk'omil triw tu'n Ornán aju aj Jebuseo.

¹⁹Xi'tzun David b'inchalte aju otoq tzaj tma'n Gad te, ik tza'nx otoq tzaj tma'n Qman.

²⁰Nne'ltoq ttxk'omil triw tu'n Ornán, ex tej tajtz tke'yin, o til aju anjel; atzun qeju kyaje tky'ajal ate'toq tuk'il xi kyewan kyib'.

²¹Tejtzun tpon laq'e' David jatum ta' Ornán, o ilwaj David tu'n, etztzun tuj lugar jatum nne'l ttxk'omil triw tu'n, kub' ẍmeje' twitz David ex pon takl tib'aj twitz max twitz tx'otx'.

²²Xitzun tma'n David te Ornán: —Q'ontza te weye aju lugar jatum nne'l ttxk'omil triw tu'na, tu'n tjaw nb'incha'ne jun altar te Qman tuj, tu'ntzun tmayet tx'u'j yab'il kyi'j tnam xjal, ex k'ayintza te weye ik tza'nx twi' cabal.

²³Xi ttzaq'we'n Ornán te David: —Q'inxa, aya Tat Rey, ex b'inchama alkye b'a'n tuj twitza, jaku che'x nq'o'ne qe tor tu'n tkub' tpatuna te oyaj, ex atzun qe tze' in che ajb'en tu'n tel ttxk'omil triw jaku che ajb'en te si', ex atzun twitz triw jaku tz'ajb'en te oyaj. Tkyaqil jlu jaku txi nq'o'ne teya, chi Ornán.

²⁴Atzunte rey David xi ttzaq'we'n te Ornán: —Chjonteya tu'n jlu, ex il ti'j tu'n ttzaj nlaq'o'ne teya ik tza'nx twi' cabalxix, porke mlay tz'el wi'ne noq kukx aju at teya, tu'n t-xi nq'o'ne te Qman, ex mlay txi nq'o'ne jun chojb'il te Qman aju mya nkwesteye. Chi rey David.

²⁵Kyja'tzun tten, xi tchjo'n David te Ornán qaq syent q'an pwaq, twi' ju lugar lu.

²⁶Ex atzun jaw tb'incha'n David jun altar te Qman, e kub'tzun tpatun qe oyaj patun in che kub', ex xi tq'o'n qe chojb'il te mojb'ab'l tib'il. Oktzun ten kub'sal twitz Qman, ex tzaj ttzaq'we'n Qman tu'n tqan q'aq' tzaj twitz kya'j, ex kub'il jukpaj tib'aj oyaj tkub' tib'aj altar.

²⁷Atzunte Qman tzaj tma'n te anjel tu'n tku'x tk'u'n t-spad tuj tjayil.

²⁸Tejtzun tke'yinte David qa otoq tzaj tzaq'we'n tu'n Qman tuj lugar jatum nne'l ttxk'omil triw tu'n Ornán aju aj Jebuseo, atzun xi tq'o'n qe chojb'il.

²⁹Aju ja xb'alun te mojb'ab'l tib'il tuk'il Dios, aju otoq jaw tb'incha'n Moisés tuj tzqij tx'otx', tuk'ix ju altar jatum in che kub' patit qe oyaj, max ate'toq tuj lugar te k'ulb'il tuj tnam Gabaón,

³⁰ex minti' xi' David tuj Gabaón tu'n t-xi tqanin te Dios, tu'nju otoq tzaj nim t-xob'il tu'nju otoq til ju spad q'i'n tu'n t-anjel Qman.