Read kumam 1 Crónicas 22 Bible Online

1 Crónicas 22 - kumam bible

1 Crónicas 22

¹Kyja'tzun tma David: Atzun kb'antel tja Dios tzalu, tuk'ix ju altar jatum tu'n tkub' kypatun aj Israel kyoyaj.

²Te tib'ajxi jlu xi tma'n David tu'n tok kychmon kyib' qe stranjer xjal, aqeju najlqe kyxol aj Israel, ex e ok tq'o'n te xpe'lil ab'j, tu'n tajb'en tu'n tjaw b'inchet tja Dios.

³Ax ikx b'aj tchmo'n David txqan k'uxb'il nimxix tu'n kyb'aj klawsyit qe tlamel, ex tu'n kyb'aj mojb'et tz'lom, ax ikx b'aj tchmo'n nim q'an k'uxb'il minti' b'ant tmalonjtz,

⁴tuk'ix nimxix tze' wi'ten, porke qe xjal najlqe tuj Sidón ex tuj Tiro otoq tzul kyi'n nimku tze' wi'ten tuk'il David.

⁵Ex tma David: Aju tja Qman kjawil b'inchet, il ti'j tu'n tok tb'anilxix ke'yin ex minti' juntl kpol ik tza'n te, ex aju nky'ajale Salomón ma ku'xunx ta', na'nx tok tnab'l. Tu'ntzun jlu, b'i'x kyjel nchmo'ne tkyaqil aju k'ajb'el tu'n tb'ant tja Dios, chi David. Kyja'tzun, tej na'nxtoq tkyim David, kyaj tchmo'n tkyaqil aju at tu'n tajb'en.

⁶Tzajtzun ttxko'n David aju tky'ajal, Salomón tb'i, ex xi tkyuwsa'n te tu'n tjaw tb'incha'n tja Qman aju Kydios aj Israel.

⁷Xitzun tma'n te kyja': Nky'ajal, ximantoq wu'ne tu'n tjaw nb'incha'ne jun ja te nimb'il te Qman aju Ndiose.

⁸Ex tzaj tma'n Qman weye: Ma wile nimku xjal o tz'el kychk'el tu'na, ex nimku q'oj o tz'ok tu'na; tu'ntzun jlu mya aya kjawil b'inchante jun ja tu'n tjaw nimsa'n nb'iye tuj.

⁹Ex tzul itz'j jun tky'ajala, ex ok tkawin tky'ajala lu, minti' q'oj k'okel, porke wu'ne ktel tuj txub'txaj ex mlay che tzaj qe aj q'oj q'ojlel ti'j; kyja'tzun Salomón[3] k'okel tb'i q'a lu, ex tuj tq'ijlalil ok tkawin che tel aj Israel tuj txub'txaj ex tuj tzalajb'il.

¹⁰Ate Salomón kjawil b'inchante jun ja te nimb'il weye. Ate k'okel te nk'wa'le, ex atzun weye chin okele te tman, ex kyxol qe tiyjil kukx che jawil nsk'o'ne qe rey tu'n kykawin kyib'aj aj Israel, chi Qman.

¹¹Ja'lotzun nky'ajal, awt Qman Dios ten tuk'ila ex onin teya tu'n tjaw b'inchet tja Dios aju Tdiosa, ik tza'nx o tzaj ttziyan tu'n tb'inchanteya.

¹²Ex awt Qman tzaj q'onte tojtzqib'la ex tnab'la ok tkawina kyib'aj aj Israel, tu'ntzun tjapun tu'na aju tley Qman aju Tdiosa.

¹³Tkyaqil b'a'n k'elel te teya qa ma tz'ok tilil tu'na tu'n kyjapun qe tley ex qe t-xnaq'tzb'il, aqeju e tzaj tma'n Qman te Moisés tu'n tajb'en kye aj Israel. Tenx tipuna ex kyuwx tk'u'ja, mi'n xob'a ex mi'n tzaj b'aj tk'u'ja.

¹⁴B'intza, ma tz'ok tilil wu'ne tu'n tb'aj nchmo'ne aju k'ajb'el ti'j tja Qman; ma chmet 75 mil quintal q'an pwaq wu'ne, wuq syent tuk'il 50 mil quintal saq pwaq, ex nimxix q'an k'uxb'il, ex k'uxb'il mlay b'ant tmalonjtz. Ax ikx ma b'aj nchmo'ne tze' ex ab'j, ex b'a'n tu'n tok ttz'aqsa'na mastl.

¹⁵Ex nimku aq'nal at tuk'ila, qe xjal xpe'lil ab'j, qe albañil, qe calpinter, ex nimku xinaq at kynab'l tu'n kyb'inchante tkyaqil txkaj aq'untl

¹⁶ti'j q'an pwaq, ti'j saq pwaq, ti'j q'an k'uxb'il, ex ti'j k'uxb'il. Kyja'tzun, tzyuma aq'untl ex awt Qman onil teya, chi David te Salomón.

¹⁷Ax ikx xi tma'n David kye kykyaqil nejenel kye aj Israel tu'n kyonin tuk'il Salomón aju tky'ajal, ex xi tma'n kye:

¹⁸A Qman at kyuk'ile, ya minti'tl in che q'ojin qe txqantl nasyon kyi'je, porke a Qman o onin weye tu'n tkub' kyi'j wu'ne ex kykyaqil qeju najlqe kyuj o che kyaj tq'o'n Qman tjaq' nkawb'ile, ex aqeju tnam lu ma che kyaj ten tjaq' tkawb'il Qman ex tjaq' kykawb'il xjal etzan tu'n.

¹⁹Kyja'tzun, ja'lo kynimanxe Qman aju Kydiose tu'n tkyaqil kyk'u'je; kyb'incham kytene tu'n tjaw kyb'incha'ne tja Qman tu'ntzun ttzaj q'it ju kax k'ub'l tley ex qe makb'il xjansa'maj, tu'n kyul q'it tuj ja aju kjawil b'inchet te nimb'il te Qman.