Read kumam 1 Crónicas 23 Bible Online

1 Crónicas 23 - kumam bible

1 Crónicas 23

¹Tej otoq ten David nim ab'q'i ex otoq tijin wen, oktzun tq'o'n toklen Salomón aju tky'ajal tu'n tok te rey kye aj Israel.

²Ex e ok tchmo'n kykyaqil qe nejenel kye aj Israel, ax ikx qe pal ex qe aj Leví,

³ex e b'aj ajla'n qe aj Leví, aqeju otoq japun 30 ab'q'i kyu'n ex qa mastl, ex japun jun kyajlal tu'n tkyaqil te 38 mil xinaq.

⁴Kyxol qe jlu e el pa'n 24 mil tu'n kyajb'en tuj aq'untl tuj tja Qman, qaq mil tu'n kyok te ma' kyoklen ex te jwes,

⁵kyaje mil tu'n kyok ten kwentil ttzi tja Dios, ex juntl kyaje mil tu'n tjaw kynimsa'n tb'i Qman ex tu'n kyajb'en qe chnab' kyu'n, aqeju otoq che b'aj chmet tu'n David tu'n kyajb'en te nimb'il tb'i Qman.

⁶E b'ajtzun pa'n qe tu'n David tuj ox k'loj, ik tza'n kyiyjil ox tky'ajal Leví, ex atzun qe jlu: Gersón, Coat ex Merari.

⁷Qe tky'ajal Gersón, atzun qe jlu: Laadán ex Simei.

⁸Qe tky'ajal Laadán ox kyb'et ex atzun qe jlu: Jehiel tb'i tnejel, Zetam tb'i tkab'in ex Joel tb'i toxin.

⁹Ex qe tky'ajal Simei ax ikx ox kyb'et ex atzun qe jlu: Selomit, Haziel ex Harán. Atzun qe jlu e ok te nejenel kyxol qe tiyjil Laadán.

¹⁰Qe tky'ajal Simei kyaje kyb'et ex atzun qe jlu: Jahat, Ziza, Jeús ex Bería.

¹¹Aju tnejel, atzun Jahat, ex atzun tkab'in, atzun Ziza, ex ate Jeús ex Bería, mya nim kyk'wa'l tzaj, kyja'tzun e je'x ajla'n mer ik tza'n jun ja xjal qe.

¹²Qe tky'ajal Coat kyaje kyb'et ex atzun qe jlu: Amram, Izhar, Hebrón ex Uziel.

¹³Qe tky'ajal Amram, atzun qe jlu: Aarón ex Moisés. Ate Aarón jaw sk'o'n tu'n Dios tu'n t-xi tq'o'n qe oyaj xjansa'maj, tu'n tkub' tpatun storak twitz Qman, tu'n tajb'en te, ex kukx tu'n tqanin ky'iwb'il kyib'aj xjal. Aju aq'untl lu, tu'n Aarón tu'n tb'ant ex kyu'n tiyjil te jumajx.

¹⁴Atzunte Moisés aju xinaq sk'o'maj tu'n Dios, kyuk'ix qe tky'ajal, ax xi q'i'n kyajlal kyuk'il qe tiyjil Leví.

¹⁵Qe tky'ajal Moisés atzun qe jlu: Gersón ex Eliezer.

¹⁶Ate Sebuel tky'ajal Gersón ex nejenel kyxol terman.

¹⁷Ate Eliezer junx tky'ajal tzaj, atzun Rehabías, ex minti' txqantl tk'wa'l tzaj, atzunte Rehabías nim tky'ajal tzaj.

¹⁸Ate Selomit tky'ajal Izhar ex nejenel kyxol terman.

¹⁹Qe tky'ajal Hebrón atzun qe jlu: Jeraías tb'i tnejel, Amarías tb'i tkab'in, Jahaziel tb'i toxin, ex Jecamán tb'i tkyajin.

²⁰Qe tky'ajal Uziel atzun qe jlu: Micaías tb'i tnejel, ex Isías tb'i tkab'in.

²¹Qe tky'ajal Merari atzun qe jlu: Mahli ex Musi. Qe tky'ajal Mahli atzun qe jlu: Eleazar ex Cis.

²²Ate Eleazar kyim minti' jun tky'ajal tzaj, noq o'kx qe tme'jel e tzaj, ex e b'aj najan kyuk'il qe tky'ajal Cis aju terman kyman.

²³Qe tky'ajal Musi ox kyb'et ex atzun qe jlu: Mahli, Edar ex Jeremot.

²⁴Kykyaqil qe jlu tiyjil Leví qe. Tej tjaw kyajlal, ku'x tz'ib'an kyb'i qeju otoq japun winqin ex qa mastl ab'q'i kyu'n. Nejenel qe te junjun k'loj kyiyjil, ex in che aq'nantoq tuj tja Qman.

²⁵Otoq tma David: Tu'n Qman aju Kydios aj Israel ma kub' kyi'j aj q'oj, tu'ntzun kyten qe xjal etzan tu'n tuj txub'txaj, ex axtzun tu'n tnajan te jumajx tuj Jerusalén.

²⁶Kyja'tzun ya mlay tzik' kylaq'b'a'n aj Leví aju ja xb'alun te mojb'ab'l tib'il tuk'il Dios, ax ikx qe makb'il in che ajb'en tuj k'ulb'il, chi David.

²⁷Kyja'tzun, ik tza'nx ju yol kyaj tma'n David tej na'nxtoq tkyim, jaw jun kyajlal aj Leví, aqeju otoq japun winqin ex qa mastl ab'q'i kyu'n,

²⁸ex e kyaj ten tjaq' kykawb'il pal aqeju tiyjil Aarón, tu'n tb'ant aq'untl kyu'n tuj tja Qman, kyuj qe ttxa'n pe'n ex kyuj qe tal cuart, ex tu'n tb'aj kytx'jo'n kyi'j qe makb'il xjansa'maj qe, ax ikx ti'j txqantl aq'untl tuj tja Qman.

²⁹Tuj kykwent ta' qe pan xjansa'maj, aqeju in che kub' q'o'n tuj txolin, ax ikx aju arin tu'n tajb'en te oyaj, ex qe tal pan xaxj minti' t-samel kyuj tu'n tjaw mal kyk'u'j, ex qe oyaj tzq'ajsa'maj tuj sartén ex tuj xk'o'n. Ax ikx kykyaqil txkaj malb'il ex echb'il tuj kykwent ta' kykyaqil.

³⁰Ax ikx il ti'j tu'n kyten tuj tja Qman kykyaqil q'ij te prim ex te qale, tu'n t-xi kyq'o'n chjonte te Qman ex tu'n tjaw kynimsa'n tb'i,

³¹ex tu'n t-xi kyq'o'n te Qman qe oyaj patun in che kub' kyuj qe q'ij te ojlab'l, kyuj qe ninq'ij, ok ttzaj ke'yin juntl ak'aj xjaw, ex kyuj qe ninq'ij nim kyoklen; kukx tu'n kyajb'en te Qman ik tza'n kyajlal ex tumel kyajni b'ant ti'j.

³²Ex tuj kykwent ta' tu'n tok kykwentin ja xb'alun te mojb'ab'l tib'il tuk'il Dios, ax ikx ju Lugar Xjan ex tu'n kyonin kye qe kyerman aqeju tky'ajal Aarón ti'j aq'untl tuj tja Qman.