Read kumam 1 Crónicas 25 Bible Online

1 Crónicas 25 - kumam bible

1 Crónicas 25

¹Ate David kyuk'ix qe nejenel kye soldad jaw kysk'o'n qe tky'ajal Asaf, qe tky'ajal Hemán ex qe tky'ajal Jedutún, tu'n kyajb'en tuj k'ulb'il, tu'n ttzaj kyma'n tqanil aju in tzaj tma'n Dios kye tuk'il tq'ajq'ajel kywi chnab' arpa, kitar ex qe tal laq k'uxb'il. Atzun kyb'i qe xinaq jlu, aqeju in che ajb'en tuj aq'untl:

²Kyxol qe tky'ajal Asaf, atzun qe jlu: Zacur, José, Netanías ex Asarela. Aju nejenel kye, atzun Asaf aju kyman, aju ok q'o'n toklen tu'n rey tu'n ttzaj tma'n tqanil aju in tzaj tma'n Dios te.

³Qe tky'ajal Jedutún qaq kyb'et ex atzun qe jlu: Gedalías, Zeri, Jesaías, Simei, Hasabías ex Matatías. Aju nejenel kye, atzun Jedutún aju kyman, aju in tzaj tma'n tqanil aju in tzaj tma'n Dios te, tuk'il tq'ajq'ajel twi arpa te aq'b'il chjonte te Dios ex tu'n tjaw nimset tb'i.

⁴Qe tky'ajal Hemán atzun qe jlu: Buquías, Matanías, Uziel, Sebuel, Jeremot, Hananías, Hanani, Eliata, Gidalti, Romanti-ezer, Josbecasa, Maloti, Hotir ex Mahaziot,

⁵kykyaqil qe jlu tky'ajal Hemán qe. Ate Hemán b'a'n nab'in tu'n Dios ex in ajb'en ttxlaj rey, tzaj tq'o'n Dios kyajlaj tky'ajal ex oxe tme'jel, ik tza'n otoq tzaj ttziyan te tu'ntzun tten mas nim tipun.

⁶Ok kyb'itzan tuj k'ulb'il tuj tja Qman tuk'ix ju tmoj kyb'itz qe tal laq k'uxb'il, qe chnab' arpa ex kitar. Aju nejenel kye, atzun Hemán, aju kyman. Ate Asaf, Jedutún ex Hemán in kyb'incha'n aju in tma'n rey kye.

⁷Aju kyajlal qeju at kynab'l tu'n kychimb'an, kyuk'ix qe kyerman xnaq'tzamniqe tu'n kyb'itzan tb'i Qman, attoq kab' syent tuk'il 88 kyb'et.

⁸Ex jaw kyi'n swert kyi'j kykyaqil tu'n kyaq'nan tuj k'lojin, tza'nx qe tij xjal ax ikx qe ku'xun, tza'nx qe xnaq'tzal, ikx qeju ma in b'aj kyxnaq'tzan kyib'.

⁹Tej tjaw kyi'n swert kyi'j e kyajtzun ten qe k'loj tuj ttxolil, xi qe' tuj tnejel ex pon b'aj tuj 24 k'loj, ex aqeju nejenel kye, atzun qe jlu: José, Gedalías, Zacur, Izri, Netanías, Buquías, Jesarela, Jesahías, Matanías, Simei, Azareel, Hasabías, Subael, Matatías, Jeremot, Hananías, Josbecasa, Hanani, Maloti, Eleata, Hotir, Gidalti, Mahaziot, ex Romanti-ezer. Ex teylex te junjun kye kyuk'ix qe kyerman ex qe kyk'wa'l, kab'laj kyb'et tuj junjun k'loj.